Jolauşılar Kök bazar ayaldamasında kölik kütip twr. Twrğındar medicinalıq betperde tağuğa tügeldey män bere qoymaydı. Almatı qalası. Mamır 2021 jıl. Foto: QT / Kültegin Aspanwlı

Köktem tuğalı Qazaqstanda 141,5 mıñnan asa sırqat tirkelip ülgerdi. Respublikanıñ üşinşi tolqında qızıl aymaqqa ötkenine aydan astı. Mamır ayınıñi alğaşqı onkündigindegi merekelerge oray demalıs kezinde resmi statistika tehnikalıq faktor sebebinen edäuir kemigen edi. Büginde esep qalpına kele bastadı. Kündelikti anıqtalıp jatqan nauqastar sanı eki mıñnan, al ölim jağdayı 20-dan joğarı. Bwl pandemiya kezindegi eñ auır kezeñ. Saldarınan Qazaqstan jartı jılğa juıq älemde eñ köp adam auırğan 50 eldiñ qatarında twr.

Densaulıq saqtau ministrliginiñ resmi mälimetinşe, elde 12 mamırda koronavirus (KVI+) jwqqan 2283 adam, al 11-i küni koronavirus pnevmoniyasına (KVI-) şaldıqqan 173 adam tirkeldi. Qazir elde 40 mıñğa tayau adam (KVI+ boyınşa 39 143, KVI- boyınşa 483) auırıp jatır.

#COVID PTR testi arqılı koronavirus jwqqanı rastalğan nauqastardıñ basım böligi ädettegidey Almatı qalası (597) men astanada (389) tirkeldi. Bwdan özge indet Qarağandı (250), Almatı (216), Pavlodar (109), Aqmola (104), BQO (97) qayta örşidi. Ötken täulikte aurudan ayıqqan 2791 adam üyine jiberilgen. Seysenbide jiını 20 adam qaytıs bolğan.

#COVID_pnevmoniyası 11 mamırda aqparatı bir täulikke keşigip beriletin koronavirus pnevmoniyasına şaldıqqan 173 nauqas esepke alındı. Vedomstvo dereginşe, Almatı (33), Jambıl (23) oblıstarı eäne Almatı qalası (14), astana men Türkistan öñirinde (ärqaysında on bir-on birden) köptep anıqtalğan. Sonımen qosa, 70 adam ayığıp şıqqan, tağı 5 adam köz jwmğan.

#Jalpı  DenMin deregine qarağanda, emdelip jatqan 39 626 nauqastıñ 14 mıñı auruhanada, 25,5 mıñı ambulatorlıq baqılauda. Ahualı naşar 788 nauqastıñ jağdayı qiın, ondağı 183 adamnıñ häli öte auır. Bwdan özge 116 sırqat ökpeni jasandı jeldetu apparatımen tınıstap jatır.

Osılayşa äzirge virustıñ taralu qateri jağınan SQO, Qostanay, Qızılorda, Jambıl, Mañğıstau jäne Türkistan oblısı «jasıl aymaqta». Almatı, ŞQO, Aqtöbe, Atırau oblıstarı men Şımkent «sarı», al Aqmola, BQO, Pavlodar, Qarağandı oblıstarı, Almatı qalası men astana «qızıl aymaqta» twr.

Ükimet mälimetinşe, köktem basında genomdıq zertteu nätijesinde eldiñ basım böliginen virustıñ braziliyalıq, britandıq jäne oñtüstikafrikalıq ştamdarı anıqtalğan.

Elde qañtar ayınıñ ekinşi jäne aqpan ayınıñ alğaşqı jartısında nauqastar qatarı kürt köbeygen. Aqpan ayınıñ ekinşi jartısında birşama kemigen edi, dese de naurızda qayta arttı. Qazir ortaşa eseppen täuligine keminde 2 mıñ sırqat jäne 20 şaqtı ölim jağdayı tirkelip jatır. Säuir ayındağı auruşañdıq naurızğa qarağanda 2 esege arttı. Jalpı osı köktemde äzirge 141,5 mıñnan (KVI+ 137 mıñ, KVI- 4 mıñ) asa nauqas anıqtaldı. Sonday-aq, ötken birer ayda resmi rastalğan ölimniñ üşten biri, yağni 1800-dey adam (KVI+ 1512, KVI- 285) ömirden qayttı.

Bıltır 13 naurızdan beri COVID-19 infekciyasın jwqtırğandar qatarı 350 mıñnan, 1 tamızdan bılayğı koronavirus pnevmoniyası 53 mıñnan asqan. DDSW derekqorı men Wlttıq statistikada Qazaqstanda auırğandar sanı 404 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 6,6 mıñı (KVI+ / U07.1 – 3984, KVI- / U07.2 – 847, ilespe aurulardan – 1773) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 1773 adamdı jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan. Eskerer jayt, ministrlik 2020 jılı KVI- statistikasın esepke almas bwrın jıldağıdan üş esege ösken pnevmoniyanıñ 256 mıñ jağdayınan (bıltırğı qañtar-şilde aralığındağı) koronavirustıq türin anıqtap-zertteuden bas tartqan. Mamandar osı keysterdi ob'ektivti türde zerdelegende şınayı esep qazirgiden äldeqayda köp bolar edi dep esepteydi. Demek joğarıdağı san da naqtı bolmauı mümkin.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 47-orında twr.

Ükimettiñ soñğı deregine qarağanda, Qazaqstanda 1 mln 757 mıñ adam koronavirusqa qarsı reseylik Sputnik V, otandıq QazVac jäne tübi qıtaylıq Hayat-Vax vakcinasınıñ alğaşqı dozasın alğan.

"The Qazaq Times"