قازاقستاندا تاعى 2,5 مىڭداي سىرقات، 25 ءولىم جاعدايى تىركەلدى

كوكتەم تۋعالى قازاقستاندا 141,5 مىڭنان اسا سىرقات تىركەلىپ ۇلگەردى. رەسپۋبليكانىڭ ءۇشىنشى تولقىندا قىزىل ايماققا وتكەنىنە ايدان استى. مامىر ءايىنىڭى العاشقى ونكۇندىگىندەگى مەرەكەلەرگە وراي دەمالىس كەزىندە رەسمي ستاتيستيكا تەحنيكالىق فاكتور سەبەبىنەن ەداۋىر كەمىگەن ەدى. بۇگىندە ەسەپ قالپىنا كەلە باستادى. كۇندەلىكتى انىقتالىپ جاتقان ناۋقاستار سانى ەكى مىڭنان، ال ءولىم جاعدايى 20-دان جوعارى. بۇل پاندەميا كەزىندەگى ەڭ اۋىر كەزەڭ. سالدارىنان قازاقستان جارتى جىلعا جۋىق الەمدە ەڭ كوپ ادام اۋىرعان 50 ەلدىڭ قاتارىندا تۇر.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 12 مامىردا كوروناۆيرۋس (كۆي+) جۇققان 2283 ادام، ال 11-ءى كۇنى كوروناۆيرۋس پنەۆمونياسىنا (كۆي-) شالدىققان 173 ادام تىركەلدى. قازىر ەلدە 40 مىڭعا تاياۋ ادام (كۆي+ بويىنشا 39 143, كۆي- بويىنشا 483) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستاردىڭ باسىم بولىگى ادەتتەگىدەي الماتى قالاسى (597) مەن استانادا (389) تىركەلدى. بۇدان وزگە ىندەت قاراعاندى (250), الماتى (216), پاۆلودار (109), اقمولا (104), بقو (97) قايتا ءورشىدى. وتكەن تاۋلىكتە اۋرۋدان ايىققان 2791 ادام ۇيىنە جىبەرىلگەن. سەيسەنبىدە جيىنى 20 ادام قايتىس بولعان.

#COVID_پنەۆمونياسى 11 مامىردا اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 173 ناۋقاس ەسەپكە الىندى. ۆەدومستۆو دەرەگىنشە، الماتى (33), جامبىل (23) وبلىستارى ەانە الماتى قالاسى (14), استانا مەن تۇركىستان وڭىرىندە (ارقايسىندا ون ءبىر-ون بىردەن) كوپتەپ انىقتالعان. سونىمەن قوسا، 70 ادام ايىعىپ شىققان، تاعى 5 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 39 626 ناۋقاستىڭ 14 مىڭى اۋرۋحانادا، 25,5 مىڭى امبۋلاتورلىق باقىلاۋدا. احۋالى ناشار 788 ناۋقاستىڭ جاعدايى قيىن، ونداعى 183 ادامنىڭ ءحالى وتە اۋىر. بۇدان وزگە 116 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وسىلايشا ازىرگە ۆيرۋستىڭ تارالۋ قاتەرى جاعىنان سقو، قوستاناي، قىزىلوردا، جامبىل، ماڭعىستاۋ جانە تۇركىستان وبلىسى «جاسىل ايماقتا». الماتى، شقو، اقتوبە، اتىراۋ وبلىستارى مەن شىمكەنت «سارى»، ال اقمولا، بقو، پاۆلودار، قاراعاندى وبلىستارى، الماتى قالاسى مەن استانا «قىزىل ايماقتا» تۇر.

ەلدە قاڭتار ايىنىڭ ەكىنشى جانە اقپان ايىنىڭ العاشقى جارتىسىندا ناۋقاستار قاتارى كۇرت كوبەيگەن. اقپان ايىنىڭ ەكىنشى جارتىسىندا ءبىرشاما كەمىگەن ەدى، دەسە دە ناۋرىزدا قايتا ارتتى. قازىر ورتاشا ەسەپپەن تاۋلىگىنە كەمىندە 2 مىڭ سىرقات جانە 20 شاقتى ءولىم جاعدايى تىركەلىپ جاتىر. ءساۋىر ايىنداعى اۋرۋشاڭدىق ناۋرىزعا قاراعاندا 2 ەسەگە ارتتى. جالپى وسى كوكتەمدە ازىرگە 141,5 مىڭنان (كۆي+ 137 مىڭ، كۆي- 4 مىڭ) اسا ناۋقاس انىقتالدى. سونداي-اق، وتكەن بىرەر ايدا رەسمي راستالعان ءولىمنىڭ ۇشتەن ءبىرى، ياعني 1800-دەي ادام (كۆي+ 1512, كۆي- 285) ومىردەن قايتتى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 350 مىڭنان، 1 تامىزدان بىلايعى كوروناۆيرۋس پنەۆمونياسى 53 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 404 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 6,6 مىڭى (كۆي+ / U07.1 – 3984, كۆي- / U07.2 – 847, ىلەسپە اۋرۋلاردان – 1773) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 1773 ادامدى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان. ەسكەرەر جايت، مينيسترلىك 2020 جىلى كۆي- ستاتيستيكاسىن ەسەپكە الماس بۇرىن جىلداعىدان ءۇش ەسەگە وسكەن پنەۆمونيانىڭ 256 مىڭ جاعدايىنان (بىلتىرعى قاڭتار-شىلدە ارالىعىنداعى) كوروناۆيرۋستىق ءتۇرىن انىقتاپ-زەرتتەۋدەن باس تارتقان. ماماندار وسى كەيستەردى وبەكتيۆتى تۇردە زەردەلەگەندە شىنايى ەسەپ قازىرگىدەن الدەقايدا كوپ بولار ەدى دەپ ەسەپتەيدى. دەمەك جوعارىداعى سان دا ناقتى بولماۋى مۇمكىن.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 47-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 1 ملن 757 مىڭ ادام كوروناۆيرۋسقا قارسى رەسەيلىك Sputnik V, وتاندىق QazVac جانە ءتۇبى قىتايلىق Hayat-Vax ۆاكتسيناسىنىڭ العاشقى دوزاسىن العان.

"The Qazaq Times"