Almatı äuejayı. Foto: Vladimir Tret'yakov

Keyingi eki aptada Ündistanda bolğan qazaqstandıqtar PTR jäne vakcinalau sertifaktına qaramastan üyde 14 täulik karantinde boladı. Seysenbidegi Ükimet otırısında densaulıq saqtau ministri Aleksey Coy mälimdedi.

«Ündistanda kün sayın 400 mıñğa juıq adam koronavirus jwqtırıp jatır. Epidemiologiyalıq jağdaydıñ naşarlauına baylanıstı, keñ taralğan ştamm importın boldırmauğa bağıttalğan şaralar qabıldandı. Qazaqstanğa üşinşi elder arqılı kelgen adamdar jäne soñğı 14 kün işinde Ündistanğa barğan adamdar, PTR jäne kovidke qarsı vakcinalau sertifikatınıñ bar-joğına qaramastan, üyde 14 kün oqşaulanadı», – dedi ministr.

Aşıq derekterge qarağanda, mamır ayınıñ üş küninde Ündistanda 1,1 millionnan asa sırqat tirkelgen. Däl osı aralıqta 11 mıñnan asa adam qaytıs bolğan. Köktemgi pandemiya antirekordtıq jañartularmen auır jağdayda ötip jatır.

Qazaqstan ükimetiniñ mälimetinşe, köktem basında genomdıq zertteu nätijesinde eldiñ basım böliginen virustıñ braziliyalıq, britandıq jäne oñtüstikafrikalıq ştamdarı anıqtalğan.

Elde qañtar ayınıñ ekinşi jäne aqpan ayınıñ alğaşqı jartısında nauqastar qatarı kürt köbeygen. Aqpan ayınıñ ekinşi jartısında birşama kemigen edi, dese de naurızda qayta arttı. Qazir täuligine keminde 2,5 mıñ sırqat jäne 20 şaqtı ölim jağdayı tirkelip jatır. Säuir ayındağı auruşañdıq naurızğa qarağanda 3 esege arttı. Jalpı osı köktemde äzirge 120 mıñ (KVI+ 116 mıñ, KVI- 3,7 mıñ) nauqas anıqtaldı. Sonday-aq, ötken birer ayda resmi rastalğan ölimniñ üşten biri, yağni 1540 adam (KVI+ 1290, KVI- 250) ömirden qayttı.

Bıltır 13 naurızdan beri COVID-19 infekciyasın jwqtırğandar qatarı 330 mıñğa, 1 tamızdan bılayğı koronavirus pnevmoniyası 53 mıñğa jetken. DDSW derekqorı men Wlttıq statistikada Qazaqstanda auırğandar sanı 383 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardıñ 6193-i (KVI+ / U07.1 – 3762, KVI- / U07.2 – 812, ilespe aurulardan – 1619) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 47-orında twr.

"The Qazaq Times"