كەيىنگى ەكى اپتادا ءۇندىستاندا بولعان قازاقستاندىقتار پتر جانە ۆاكتسينالاۋ سەرتيفاكتىنا قاراماستان ۇيدە 14 تاۋلىك كارانتيندە بولادى. سەيسەنبىدەگى ۇكىمەت وتىرىسىندا دەنساۋلىق ساقتاۋ ءمينيسترى الەكسەي تسوي مالىمدەدى.
«ءۇندىستاندا كۇن سايىن 400 مىڭعا جۋىق ادام كوروناۆيرۋس جۇقتىرىپ جاتىر. ەپيدەميولوگيالىق جاعدايدىڭ ناشارلاۋىنا بايلانىستى، كەڭ تارالعان شتامم يمپورتىن بولدىرماۋعا باعىتتالعان شارالار قابىلداندى. قازاقستانعا ءۇشىنشى ەلدەر ارقىلى كەلگەن ادامدار جانە سوڭعى 14 كۇن ىشىندە ۇندىستانعا بارعان ادامدار، پتر جانە كوۆيدكە قارسى ۆاكتسينالاۋ سەرتيفيكاتىنىڭ بار-جوعىنا قاراماستان، ۇيدە 14 كۇن وقشاۋلانادى»، – دەدى مينيستر.
اشىق دەرەكتەرگە قاراعاندا, مامىر ايىنىڭ ءۇش كۇنىندە ءۇندىستاندا 1,1 ميلليوننان اسا سىرقات تىركەلگەن. ءدال وسى ارالىقتا 11 مىڭنان اسا ادام قايتىس بولعان. كوكتەمگى پاندەميا انتيرەكوردتىق جاڭارتۋلارمەن اۋىر جاعدايدا ءوتىپ جاتىر.
قازاقستان ۇكىمەتىنىڭ مالىمەتىنشە، كوكتەم باسىندا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق جانە وڭتۇستىكافريكالىق شتامدارى انىقتالعان.
ەلدە قاڭتار ايىنىڭ ەكىنشى جانە اقپان ايىنىڭ العاشقى جارتىسىندا ناۋقاستار قاتارى كۇرت كوبەيگەن. اقپان ايىنىڭ ەكىنشى جارتىسىندا ءبىرشاما كەمىگەن ەدى، دەسە دە ناۋرىزدا قايتا ارتتى. قازىر تاۋلىگىنە كەمىندە 2,5 مىڭ سىرقات جانە 20 شاقتى ءولىم جاعدايى تىركەلىپ جاتىر. ءساۋىر ايىنداعى اۋرۋشاڭدىق ناۋرىزعا قاراعاندا 3 ەسەگە ارتتى. جالپى وسى كوكتەمدە ازىرگە 120 مىڭ (كۆي+ 116 مىڭ، كۆي- 3,7 مىڭ) ناۋقاس انىقتالدى. سونداي-اق، وتكەن بىرەر ايدا رەسمي راستالعان ءولىمنىڭ ۇشتەن ءبىرى، ياعني 1540 ادام (كۆي+ 1290, كۆي- 250) ومىردەن قايتتى.
بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 330 مىڭعا، 1 تامىزدان بىلايعى كوروناۆيرۋس پنەۆمونياسى 53 مىڭعا جەتكەن. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 383 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردىڭ 6193-ءى (كۆي+ / U07.1 – 3762, كۆي- / U07.2 – 812, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى.
قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 47-ورىندا تۇر.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟