Miting küni jwmısı küşeyetin policey men onıñ köligi. Almatı qalası. 24 säuir 2021 jıl. Foto: QT / Kültegin Aspanwlı

1 mamırğa belgilengen sankciyalanbağan miting qarsañında Qazaqstannıñ är öñirinde azamattıq belsendiler policiyağa şaqırıla bastağanı habarlandı. Azattıq mälimetine qarağanda, keybiri äkimşilik jazağa tartılıp, qamalğan.

29 säuirde Almatı qalasınıñ mamandandırılğan audanaralıq äkimşilik sotı belsendi Rakila Beknazarovanı 15 täulikke qamadı. Bwl turalı belsendi Ayjan Baysova Facebook-tağı paraqşasında habarladı.

Azattıq radiosınıñ mälimetinşe, sot kabineti saytında Rakila Beknazarovanıñ sotı ötkeni jaylı aqparat bolsa da, qaulısı äzirge salınbağan. Onıñ isin sud'ya Ğaliya Qasımova habarlağan.

Aqparatqa qarağanda, Beknazarova 2 säuir qalalıq policiya departamenti ğimaratı mañında qızılordalıq belsendi Mwratbay Baymağambetovti qoldağanı üşin äkimşilik qamauğa alınğan. Oğan «beybit jiın ötkizu tärtibin bwzdı» degen ayıp tağılğan.

Bir kün bwrın däl osınday ayıppen almatılıq belsendi Gülmira Ahmanova 12 täulikke qamalğan. Sot qaulısında Ahmanovanıñ 2 säuirde 17 adamnan qwralğan toppen birge qızılordalıq belsendi Mwratbay Baymağambetovti qoldap, policiya ğimaratı mañında «rwqsatsız akciya» ötkizgeni (488-bap 6-böligi, «Beybit jiın ötkizu tärtibin bwzu») jazılğan. Jinalğandar «Bostandıq!» dep ayqaylağan.

Ondağı mälimet boyınşa, Gülmira Ahmanova özine tağılğan ayıptı moyındamağan. Qaulıda Ahmanovanıñ «şarağa belsendi qatısqanı» policiya qızmetkeriniñ tüsirip alğan videosımen de däleldengeni körsetilgen.

Mwratbay Baymağambetov – «tıyım salınğan wyımnıñ isine aralastı» dep ayıptalıp, jaqında bostandığı eki jılğa şektelgen qızılordalıq belsendi. (Säuir basında onıñ tergeu izolyatorında belgisiz jağdayda jaraqattanıp, auruhanağa tüskeni, otanı bastan keşirgeni habarlanğan. Oblıstıq QAJ departamenti belsendi tergeu amaldarına qarsılıq bildirip, «özin jaraqattadı» degen. Al resmi organnıñ sözine kümändanğan belsendiler oğan ombudsmendi kirgizudi talap etip, Almatıda bir top adam policiya ğimaratında onı qoldau akciyasın ötkizgen edi).

Bwğan deyin quğındağı bwrınğı bankir, şetelde twratın Aqorda opponenti Mwhtar Äblyazov jaqtastarın 1 mamırda jappay narazılıqqa şaqırğan edi. Osığan deyin miting taqırıbı: sayasi twtqındarğa bostandıq, Europarlament rezolyuciyasınıñ orındaluı, mäjbürli vakcinaciyağa jol bermeu jäne qımbatşılıq bolatını habarlandı.

Qazaqstanda osığan wqsas beybit miting ötetini habarlanğan kezde jer-jerde policiyanıñ belsendilerdi bölimşege şaqırıp, wstap, qamauı jiiley bastaydı. Almatılıq belsendi Sabırjan Hasenov 29 säuirde operaciyanı bastan keşirip, tösekte tañılıp jatqanına qaramastan policeylerdiñ ädetine basıp, üyin toruıldap jürgenine şağımdandı.

Belsendilerdiñ aytuınşa, miting qarsañında policiyağa şaqırtu, üydiñ aldın küzetu siyaqtı oqiğalar Qazaqstannıñ özge aymaqtarında da, onıñ işinde Pavlodar, Qostanay, Şımkent qalalarında da jalğasıp jatır. Keybir belsendiler äleumettik jelide özderiniñ atınan jalğan akkaunt pen habarlamalar payda bolıp, biliktiñ özderin sonday amalmen qaralauğa tırısıp jatqanına şağımdandı.

Mwhtar Äblyazov qwrğan «Qazaqstannıñ demokratiyalıq tañdauı» jäne «Köşe partiyası» elde «ekstremistik wyım» retinde tanılıp, qızmetine tıyım salınğan, biraq jaqtastarı sot şeşimderimen kelispeydi. Europarlament ekeuin de beybit wyım retinde oppoziciyalıq qozğalıs dep atağan.

Zañda «rwqsat alu» turalı norma alınıp tastalğanımen, jergilikti bilik pen Bas prokuratura «rwqsat etilmegen» dep tanığan ärqanday miting-şeruler qarsañında elde belsendilerdiñ wstaluı, policiyağa şaqırıluı nemese üyden şığarmay wstauı ädetke aynalğanı belgili. Adam qwqıqtarın qorğaumen aynalısatın halıqaralıq wyımdar, qwqıq qorğauşılar jäne belsendiler biliktiñ bwl äreketin jii sınaydı.

"The Qazaq Times"