Densaulıq saqtau ministrligi QT swrau hatına bergen jauabında jalpıhalıqtıq vakcinaciya nauqanınıñ byudjeti turalı habarladı. Otandıq vakcinanıñ är dozasına 2 mıñ teñge şamasında jwmsalmaq.

Resmi derekke qarağanda, «Qazaqstan Respublikası Ükimetiniñ rezervinen qarajat bölu turalı» 31 naurızdağı qaulığa säykes vakcinaciya nauqanında qoldanatın qwraldarğa 50 mlrd 229 mln teñge qarajat bölingen. Qarjı Reseydiñ «Sputnik V» vakcinasınıñ 2 mln 60 mıñ, «QazCovid-in» otandıq vakcinasınıñ 15 mln 680 mıñ dozasın jäne eguge qajetti 20 millionğa tarta şpric satıp aluğa jwmsalmaq.

«Sputnik V vakcinasınıñ 2 060 000 dozasın satıp alu üşin 18 mlrd 024,6 mln, QazCovid-in otandıq vakcinasınıñ 15 680 000 dozasına 31 mlrd 610,9 mln jäne vakcina saluğa arnalğan 19 800 000 dana şpric satıp aluğa – 594 mln teñge qarajat bölindi», – delingen vedomstvo jauabında.

QazVac / QazCovid-in ekpesi klinikalıq sınaqtıñ üşinşi kezeñine ötken 15-inşi ekpe bolğanımen, barlıq kezeñde oğan nebäri 3244 adam ğana qatısqan. Şeteldik Pfizer, Moderna nemese «Sputnik V» ekpeleriniñ üşinşi kezeñinde 30 mıñnan astam adam ekpe alğan. Osığan deyin otandıq vakcinanı jasap jatqan Biologiyalıq qauipsizdik problemaları ğılımi-zertteu institutınıñ bas direktorı Künswlu Zakar'ya sınaqqa qatısatın eriktiler sanı wlğayğan sayın tiimdilik körsetkişi tömendeui mümkin ekenin mälimdegen.

Qazaqstandıq vakcina Jambıl oblısında salınıp jatqan, qwnı 7 mlrd teñge bolatın zauıtta şığarılmaq. Äu basta bilik vakcina naurız ayınan bastap şığa bastaydı degenimen öndiris ornınıñ qwrılısı küzge şegerildi. Üşinşi kezeñ 9 şilde ayaqtaladı. Sondıqtan vice-prem'er Eralı Toğjanov mälimdeuinşe, vakcina jazğıtwrımda jäne zauıt aşılğanğa deyin Türkiyada qwtığa qwyıladı.

Vedomstvoaralıq komissiya törağası Toğjanov säuirde 50 mıñ, mamırda 50 mıñ jäne özge aldağı aylarda 100 mıñ dozadan şığarılatının jetkizgen. Biraq qarjı QazVac-tıñ 15,6 mln dozağa bölingen.

“The Qazaq Times”