50 ملرد ەسەبى: QazVac ۆاكتسيناسىنىڭ 15 ملن دوزاسى وندىرىلەدى

دەنساۋلىق ساقتاۋ مينيسترلىگى QT سۇراۋ حاتىنا بەرگەن جاۋابىندا جالپىحالىقتىق ۆاكتسيناتسيا ناۋقانىنىڭ بيۋدجەتى تۋرالى حابارلادى. وتاندىق ۆاكتسينانىڭ ءار دوزاسىنا 2 مىڭ تەڭگە شاماسىندا جۇمسالماق.

رەسمي دەرەككە قاراعاندا، «قازاقستان رەسپۋبليكاسى ۇكىمەتىنىڭ رەزەرۆىنەن قاراجات ءبولۋ تۋرالى» 31 ناۋرىزداعى قاۋلىعا سايكەس ۆاكتسيناتسيا ناۋقانىندا قولداناتىن قۇرالدارعا 50 ملرد 229 ملن تەڭگە قاراجات بولىنگەن. قارجى رەسەيدىڭ «سپۋتنيك V» ۆاكتسيناسىنىڭ 2 ملن 60 مىڭ، «QazCovid-in» وتاندىق ۆاكتسيناسىنىڭ 15 ملن 680 مىڭ دوزاسىن جانە ەگۋگە قاجەتتى 20 ميلليونعا تارتا شپريتس ساتىپ الۋعا جۇمسالماق.

«سپۋتنيك V ۆاكتسيناسىنىڭ 2 060 000 دوزاسىن ساتىپ الۋ ءۇشىن 18 ملرد 024,6 ملن، QazCovid-in وتاندىق ۆاكتسيناسىنىڭ 15 680 000 دوزاسىنا 31 ملرد 610,9 ملن جانە ۆاكتسينا سالۋعا ارنالعان 19 800 000 دانا شپريتس ساتىپ الۋعا – 594 ملن تەڭگە قاراجات ءبولىندى»، – دەلىنگەن ۆەدومستۆو جاۋابىندا.

QazVac / QazCovid-in ەكپەسى كلينيكالىق سىناقتىڭ ءۇشىنشى كەزەڭىنە وتكەن 15-ءىنشى ەكپە بولعانىمەن، بارلىق كەزەڭدە وعان نەبارى 3244 ادام عانا قاتىسقان. شەتەلدىك Pfizer, Moderna نەمەسە «سپۋتنيك V» ەكپەلەرىنىڭ ءۇشىنشى كەزەڭىندە 30 مىڭنان استام ادام ەكپە العان. وسىعان دەيىن وتاندىق ۆاكتسينانى جاساپ جاتقان بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا سىناققا قاتىساتىن ەرىكتىلەر سانى ۇلعايعان سايىن تيىمدىلىك كورسەتكىشى تومەندەۋى مۇمكىن ەكەنىن مالىمدەگەن.

قازاقستاندىق ۆاكتسينا جامبىل وبلىسىندا سالىنىپ جاتقان، قۇنى 7 ملرد تەڭگە بولاتىن زاۋىتتا شىعارىلماق. ءاۋ باستا بيلىك ۆاكتسينا ناۋرىز ايىنان باستاپ شىعا باستايدى دەگەنىمەن ءوندىرىس ورنىنىڭ قۇرىلىسى كۇزگە شەگەرىلدى. ءۇشىنشى كەزەڭ 9 شىلدە اياقتالادى. سوندىقتان ۆيتسە-پرەمەر ەرالى توعجانوۆ مالىمدەۋىنشە، ۆاكتسينا جازعىتۇرىمدا جانە زاۋىت اشىلعانعا دەيىن تۇركيادا قۇتىعا قۇيىلادى.

ۆەدومستۆوارالىق كوميسسيا توراعاسى توعجانوۆ ساۋىردە 50 مىڭ، مامىردا 50 مىڭ جانە وزگە الداعى ايلاردا 100 مىڭ دوزادان شىعارىلاتىنىن جەتكىزگەن. بىراق قارجى QazVac-تىڭ 15,6 ملن دوزاعا بولىنگەن.

“The Qazaq Times”