AGM-158 qanattı zımıranı. Foto: AP.

Tayuan (Tayvan') Wlttıq Qorğanıs ministrligi AQŞ-tıñ alıs qaşıqtıqqa wşatın qanattı zımırandarın satıp aluğa tırısıp jatqanın mälimdedi. El resmileriniñ mälimdemesine qarağanda, Tayuan qazir AQŞ-tan satıp alıp jatqan qorğanıs qwraldarınan tıs wzaq aralıqqa wşatın AGM-158 qanattı zımırandarın satıp alu boyınşa qwlşıns jasap keledi.

AGM-158 – amerikalıq Lokhid Martinnıñ önimi, älemdegi eñ ozıq qanattı zımırannıñ biri. 370 şaqırım qaşıqtıqqa deyin wşa alatın zımıran özin wşırğan zımıran qondırğısı nemese jauıngerlik wşaqtardı da qorğay aladı. Sonday-aq, öndiruşi Lokhid Martin bwl zımırannıñ köbinde joğarı qwnğa ie nısandardı joyuğa bağıttalatının, özindik bekem qorğanısqa ie, twraqtı jäne qozğalıstağı nısanağa da döp tietinin mälimdegen. Radarğa körinbeytin AGM-158 kündiz ben tünde de öziniñ jauıngerlik qabiletin özgertpeydi.

Tayuannıñ äskerileri, qorğanıs salasınıñ mamandarı bwğan deyin de Qıtaydıñ äskeri qısımına qarsı küresu üşin qorğanıs quatın arttırudı alğa qoyıp keldi. Bwl maqsatta Tayuan Wlttıq qorğanıs ministrligi Qwrama Ştattardan ozıq äskeri tehnikalardı köptep satıp aluda. Bwlardan tıs, joğarıda atalğan AGM-158 qanattı zımırandarın da satıp aluğa tırısuda. Reuters agenttigi osıdan bwrın Tayuan öziniñ de alıs qaşıqtıqqa wşatın zımırandarın zerttep jasap jatqanın mälimdegen.

Resmi Beyjiñ Tayuandı Qıtaydıñ bir provinciyası dep sanaydı. Özimen diplomatiyalıq qarım-qatınas ornatqan elderden de «Bir Qıtay» principin moyındaudı eñ aldımen talap etedi. Cay Iıñ Vın hanım prezident bolğalı beri Beyjiñniñ Tayuanğa bağıttalğan äskeri qısımı küşeydi. Soñğı birneşe jılda bwnday qısım eñ joğarı şekke jetti. Tipti, qazir qıtaylıq resmiler «Wlı Qıtay birligin küşpen jüzege asıru» nietin jasırmaytın boldı. Amerikalıq jäne özge de Batıs elderiniñ sarapşıları Qıtay basşısı Şi Jinpiñniñ (Si Czin'pin) bastı maqsatı bilikten ketkenge deyin Tayuandı tolığımen Beyjiñge qaratu dep sanaydı.

Sarapşılar, Qıtay Halıq-azattıq armiyasımen salıstırğanda Tayuan aralınıñ äskeri quatı älsiz. Alayda, Tayuannıñ da özindik artıqşılıqtarı bar. Prezidenti Cay Iıñ Vın (Cay Ing-Ven) qaqtığıs jağdayında Azattıq armiya şabuılın toqtatu üşin wzaq qaşıqtıqtağı soqqılardı qoldanıp, «asimmetriyalıq» tejeu ​​küşin damıtudıñ mañızdılığın atap ötken bolatın.

“The Qazaq Times”