تايۋان (تايۆان) ۇلتتىق قورعانىس مينيسترلىگى اقش-تىڭ الىس قاشىقتىققا ۇشاتىن قاناتتى زىمىراندارىن ساتىپ الۋعا تىرىسىپ جاتقانىن مالىمدەدى. ەل رەسميلەرىنىڭ مالىمدەمەسىنە قاراعاندا، تايۋان قازىر اقش-تان ساتىپ الىپ جاتقان قورعانىس قۇرالدارىنان تىس ۇزاق ارالىققا ۇشاتىن AGM-158 قاناتتى زىمىراندارىن ساتىپ الۋ بويىنشا قۇلشىنس جاساپ كەلەدى.

AGM-158 – امەريكالىق لوكحيد مارتيننىڭ ءونىمى، الەمدەگى ەڭ وزىق قاناتتى زىمىراننىڭ ءبىرى. 370 شاقىرىم قاشىقتىققا دەيىن ۇشا الاتىن زىمىران ءوزىن ۇشىرعان زىمىران قوندىرعىسى نەمەسە جاۋىنگەرلىك ۇشاقتاردى دا قورعاي الادى. سونداي-اق، ءوندىرۋشى لوكحيد مارتين بۇل زىمىراننىڭ كوبىندە جوعارى قۇنعا يە نىسانداردى جويۋعا باعىتتالاتىنىن، وزىندىك بەكەم قورعانىسقا يە، تۇراقتى جانە قوزعالىستاعى نىساناعا دا ءدوپ تيەتىنىن مالىمدەگەن. رادارعا كورىنبەيتىن AGM-158 كۇندىز بەن تۇندە دە ءوزىنىڭ جاۋىنگەرلىك قابىلەتىن وزگەرتپەيدى.

تايۋاننىڭ اسكەريلەرى، قورعانىس سالاسىنىڭ ماماندارى بۇعان دەيىن دە قىتايدىڭ اسكەري قىسىمىنا قارسى كۇرەسۋ ءۇشىن قورعانىس قۋاتىن ارتتىرۋدى العا قويىپ كەلدى. بۇل ماقساتتا تايۋان ۇلتتىق قورعانىس مينيسترلىگى قۇراما شتاتتاردان وزىق اسكەري تەحنيكالاردى كوپتەپ ساتىپ الۋدا. بۇلاردان تىس، جوعارىدا اتالعان AGM-158 قاناتتى زىمىراندارىن دا ساتىپ الۋعا تىرىسۋدا. Reuters اگەنتتىگى وسىدان بۇرىن تايۋان ءوزىنىڭ دە الىس قاشىقتىققا ۇشاتىن زىمىراندارىن زەرتتەپ جاساپ جاتقانىن مالىمدەگەن.

رەسمي بەيجىڭ تايۋاندى قىتايدىڭ ءبىر پروۆينتسياسى دەپ سانايدى. وزىمەن ديپلوماتيالىق قارىم-قاتىناس ورناتقان ەلدەردەن دە «ءبىر قىتاي» ءپرينتسيپىن مويىنداۋدى ەڭ الدىمەن تالاپ ەتەدى. تساي يىڭ ۆىن حانىم پرەزيدەنت بولعالى بەرى بەيجىڭنىڭ تايۋانعا باعىتتالعان اسكەري قىسىمى كۇشەيدى. سوڭعى بىرنەشە جىلدا بۇنداي قىسىم ەڭ جوعارى شەككە جەتتى. ءتىپتى، قازىر قىتايلىق رەسميلەر «ۇلى قىتاي بىرلىگىن كۇشپەن جۇزەگە اسىرۋ» نيەتىن جاسىرمايتىن بولدى. امەريكالىق جانە وزگە دە باتىس ەلدەرىنىڭ ساراپشىلارى قىتاي باسشىسى شي ءجينپيڭنىڭ (سي تسزينپين) باستى ماقساتى بيلىكتەن كەتكەنگە دەيىن تايۋاندى تولىعىمەن بەيجىڭگە قاراتۋ دەپ سانايدى.

ساراپشىلار، قىتاي حالىق-ازاتتىق ارمياسىمەن سالىستىرعاندا تايۋان ارالىنىڭ اسكەري قۋاتى ءالسىز. الايدا، تايۋاننىڭ دا وزىندىك ارتىقشىلىقتارى بار. پرەزيدەنتى تساي يىڭ ۆىن (تساي ينگ-ۆەن) قاقتىعىس جاعدايىندا ازاتتىق ارميا شابۋىلىن توقتاتۋ ءۇشىن ۇزاق قاشىقتىقتاعى سوققىلاردى قولدانىپ، «اسيممەتريالىق» تەجەۋ ​​كۇشىن دامىتۋدىڭ ماڭىزدىلىعىن اتاپ وتكەن بولاتىن.

“The Qazaq Times”