«Üşinşi tolqındağı» reanimaciya zalınıñ körinisi. Wyqıda ya es-tüssiz jatqan nauqastardıñ bet-älpeti bwldıratıp montajtaldı. I.S.Jekenova atındağı qalalıq klinikalıq jwqpalı aurular auruhanasınıñ Türksib audanındağı filialı. Säuir 2021 jıl. Almatı qalası. Foto: QT / Kültegin Aspanwlı

Densaulıq saqtau ministrligi eldegi jwqpalı aurularğa arnalğan orınnıñ 41%-ı bos emes ekenin, sonday-aq Almatı qalası men oblısı jäne astanadağı jağday naşarlağanın mälimdedi.

Üş öñirde auruhanağa tüsken sırqattar sanı eleuli türde artqan.

«12 säuirdegi jağday boyınşa, respublikadağı jwqpalı aurularğa arnalğan 30 109 tösek-orınnıñ 41%-ında nauqastar jatır. Rezerv retinde qosımşa 30 025 tösek-orın äzirlengen. Elordada, Almatı qalası men oblısında jükteme wlğaydı. Astana men Almatıda ärqaysında şamamen 1,2 mıñ orınnan rezerv qorı bar», – dedi densaulıq saqtau ministri Aleksey Coy.

Resmi derekke sensek, auruhanağa jatqızılğandar qatarı da köbeygen. Ministrdiñ mälimetinşe, 12 naurızda auruhanada 4713 adam jatqan bolsa, al 12 säuir 12 349 adam stacionarda emdelip jatır. Qazirgi tañda reanimaciya bölimşelerinde 2752 orınnıñ  27%-ı jwmıs istep twr.

«Astanadağı jansaqtau bölimşeleri 66%, Almatı qalasında 50% jüktemede jwmıs istep jatır. Ondağı sırqattar sanı 2,4 esege arttı» dedi ol.

Jeksenbi küni qalada 610 adamnan koronavirus anıqtaldı. Al senbide 5 adam qaytıs bolğan. Osı uaqıtqa deyin Almatı qalasında är 100 mıñ twrğınnıñ 1,1 mıñına virus jwqqan. Bwdan özge koronavirus pnevmoniyasımen auırğandar bar. Ötken aptadağı jağdayğa say, reproduktivti körsetkiş (R sanı) – 1,2 bolğan.

*11 säuir tirkelgen 610 nauqastıñ 529-ında simptomdıq belgileri bar jäne 81-i simptomsız. Sıyımdılığı 6,1 mıñ bolatın infekciyalıq stacionarlarda  3872 adam jatır. Sonday-aq, 260 nauqas auruhanağa jatqızılğan jäne auruınan ayıqqan 69 adam üyine şığarılğan.

*Soñğı azat joldağı aqparat äkimdiktiñ resmi mälimeti keşikkendikten qayta tolıqtırıldı.

"The Qazaq Times"