الماتى قالاسىندا جانساقتاۋ بولىمشەلەرىنىڭ جارتىسى تولعان

دەنساۋلىق ساقتاۋ مينيسترلىگى ەلدەگى جۇقپالى اۋرۋلارعا ارنالعان ورىننىڭ 41%-ى بوس ەمەس ەكەنىن، سونداي-اق الماتى قالاسى مەن وبلىسى جانە استاناداعى جاعداي ناشارلاعانىن مالىمدەدى.

ءۇش وڭىردە اۋرۋحاناعا تۇسكەن سىرقاتتار سانى ەلەۋلى تۇردە ارتقان.

«12 ساۋىردەگى جاعداي بويىنشا، رەسپۋبليكاداعى جۇقپالى اۋرۋلارعا ارنالعان 30 109 توسەك-ورىننىڭ 41%-ىندا ناۋقاستار جاتىر. رەزەرۆ رەتىندە قوسىمشا 30 025 توسەك-ورىن ازىرلەنگەن. ەلوردادا، الماتى قالاسى مەن وبلىسىندا جۇكتەمە ۇلعايدى. استانا مەن الماتىدا ارقايسىندا شامامەن 1,2 مىڭ ورىننان رەزەرۆ قورى بار»، – دەدى دەنساۋلىق ساقتاۋ ءمينيسترى الەكسەي تسوي.

رەسمي دەرەككە سەنسەك، اۋرۋحاناعا جاتقىزىلعاندار قاتارى دا كوبەيگەن. ءمينيستردىڭ مالىمەتىنشە، 12 ناۋرىزدا اۋرۋحانادا 4713 ادام جاتقان بولسا، ال 12 ءساۋىر 12 349 ادام ستاتسيوناردا ەمدەلىپ جاتىر. قازىرگى تاڭدا رەانيماتسيا بولىمشەلەرىندە 2752 ورىننىڭ  27%-ى جۇمىس ىستەپ تۇر.

«استاناداعى جانساقتاۋ بولىمشەلەرى 66%، الماتى قالاسىندا 50% جۇكتەمەدە جۇمىس ىستەپ جاتىر. ونداعى سىرقاتتار سانى 2,4 ەسەگە ارتتى» دەدى ول.

جەكسەنبى كۇنى قالادا 610 ادامنان كوروناۆيرۋس انىقتالدى. ال سەنبىدە 5 ادام قايتىس بولعان. وسى ۋاقىتقا دەيىن الماتى قالاسىندا ءار 100 مىڭ تۇرعىننىڭ 1,1 مىڭىنا ۆيرۋس جۇققان. بۇدان وزگە كوروناۆيرۋس پنەۆمونياسىمەن اۋىرعاندار بار. وتكەن اپتاداعى جاعدايعا ساي، رەپرودۋكتيۆتى كورسەتكىش (R سانى) – 1,2 بولعان.

*11 ءساۋىر تىركەلگەن 610 ناۋقاستىڭ 529-ىندا سيمپتومدىق بەلگىلەرى بار جانە 81-ءى سيمپتومسىز. سىيىمدىلىعى 6,1 مىڭ بولاتىن ينفەكتسيالىق ستاتسيونارلاردا  3872 ادام جاتىر. سونداي-اق، 260 ناۋقاس اۋرۋحاناعا جاتقىزىلعان جانە اۋرۋىنان ايىققان 69 ادام ۇيىنە شىعارىلعان.

*سوڭعى ازات جولداعى اقپارات اكىمدىكتىڭ رەسمي مالىمەتى كەشىككەندىكتەن قايتا تولىقتىرىلدى.

"The Qazaq Times"