Ayaldamada avtobus kütip twrğan jolauşılar. Almatı qalası. Foto: QT / Kültegin Aspanwlı

Almatı qalasında sırqattar sanına qatıstı rekord tağı da jañardı. Qoğamdıq densaulıq saqtau basqarması qalada epidemiologiyalıq jağday naşarlap ketkenin rastadı. Biılğa PTR testi oñ şıqqan 21 mıñnan astam adam tirkeldi. Särsenbi küni 717 sırqat anıqtaldı. Onıñ 630-ında simptomdıq belgileri bar, 87-si simptomsız.

Qoğamdıq densaulıq saqtau basqarmasınıñ resmi mälimetinşe, ötken täulikte 400 adam auruhanağa jatqızılğan jäne 491 adam üyine jiberilgen. Naurız ayınıñ ortasında bas sanitar däriger Jandarbek Bekşin bir künde auruhanağa jatqızılğandar sanı 500-den assa, qalada lokdaun küşeytilip, blok-beket qoyılatının eskertken.

Täuliktegi ösim 1,8. Keyingi 7 künde 100 mıñ twrğınğa şaqqandağı auruşañdıq körsetkişi 231,3 boldı. Aldıñğı aptada bwl 215,2 edi. Jalpı qalada dayındalğan 6,1 mıñ orınnıñ 3520-sında sırqat emdelude. Ondağı 2,7 mıñ adamnıñ jağdayı naşar, 692 adam auır jäne 86 nauqas tım auır hälde. Sonday-aq, 71 bala jeñil jäne ortaşa küyde stacionarda jatır.

Bıltır birinşi tolqında – «mausım-şilde qırğınında» 6372, qazan ayında jürgen ekinşi tolqında 3607 jäne biıl köktemgi üşinşi tolqında äzirge 14 582 jağday tirkeldi.

Almatıda bir jılda koronavirus pen pnevmoniya sırqattarınıñ qatarı 45 mıñnan asqan. Mwnıñ 32,5%-ı, yağni 14 mıñ adam osı köktemde tirkelgen. Ökinişke qaray, osı aralıqta 155 almatılıq köz jwmğan. Osı künge deyin qalada 49 mıñ twrğın vakcinanıñ alğaşqı jäne 12 mıñı ekinşi dozasın saldırğan.

BAÄ, Mısır, Mal'div, Ispaniya, Türkiya, Gruziya, Belarus', Şri-Lanka, Saud Arabiyası, QHR, Oñtüstik Koreya, Germaniya, Ukraina, Resey Federaciyası, Äzirbayjan, Täjikstan, Özbekstan jäne Qırğızstan tärizdi elderden Almatı qalasına 1 naurızdan beri jüzdegen halıqaralıq äue reysi keldi. Köktem tuğalı Alatau baurayına 609 reyspen 88 mıñ jolauşı wşıp kelgen: 84 mıñ adam PTR qorıtındısımen, 4539 adam PTR anıqtamasınsız. Osınıñ saldarınan jwğu jäne ölimge soqtıru qateri joğarı britandıq jäne oñtüstikafrikalıq ştamdar tirkelip, özge öñirlerge taralğan.

Elde qañtar ayınıñ ekinşi jäne aqpan ayınıñ alğaşqı jartısında nauqastar qatarı kürt köbeygen. Aqpan ayınıñ ekinşi jartısında birşama kemigen edi, dese de naurızda qayta arttı. Qazir täuligine 2 mıñğa juıq sırqat jäne 15 şaqtı ölim jağdayı tirkelip jatır. Köktem tuğalı 52 mıñnan asa (KVI+ 50,5 mıñ, KVI- 1,8 mıñ) nauqas anıqtaldı, 511 adam (KVI+ 418, KVI- 93) ömirden qayttı. Qalanıñ bas sanitar därigeri Jandarbek Bekşin keyingi bes aptada 10 qaulı şığardı. Sebebi qabıldanğan ereje men qatañdatılğan lokdaun şarası kütkendey nätije bermedi. Mwnı düysenbi küngi brifingte Bekşin demalıs künderi qoğamdıq kölikti toqtatu jäne sauda qatarlarınıñ jwmısın şekteu siyaqtı şeşim «tiimsiz bolmağanın», yağni bwdan indet ahualı jaqsarmağanın moyındadı. Ol üş aptadan asa uaqıt «qızıl aymaqta» twrğan qalada tirkelip jatqan nauqastar virustı «köbine jayau jürginşilerdiñ joldarı men sayabaqta» jwqtırğanın aytadı.

Bıltır 13 naurızdan beri COVID-19 infekciyasın jwqtırğandar qatarı 264 mıñğa, 1 tamızdan bılayğı koronavirus pnevmoniyası 51 mıñğa jetken. DDSW derekqorı men Wlttıq statistikada Qazaqstanda auırğandar sanı 315 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi. Sonday-aq pandemiya kezinde jalpı virus jwqqandardıñ 5,5 mıñı (KVI+ / U07.1 – 3190, KVI- / U07.2 – 721, ilespe aurulardan – 1619) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi.

"The Qazaq Times"