Bıltır jemqorlıq küdigine ilinip, üyqamaqta otırğan Qazaqstannıñ eks-densaulıq saqtau ministri Eljan Birtanovtıñ densaulığı naşarlağan. Bwl jaylı onıñ advokatı Dmitriy Kuryaçenko «Astana»  telearnasınıñ jurnalisterine aytıp bergen.

Advokattıñ sözinşe, Birtanovqa qazir medecinalıq kömek körsetilip jatır.

Eks-ministrdiñ qorğauşısı «Astana» telearnasına bergen swhbatında Birtanovtıñ kinäsiz ekenin däleldeytin ayğaqtar bar ekenin aytıp, onı negizsiz wstap otırğanın alğa tartqan.

«Kerisinşe, onıñ kinäsizdigin jäne qatısı joğın däleldeytin faktiler bar. Ayıp densaulıq saqtau salasındağı integraciyalıq platforma jasauşı horvattıñ «Erikson Nikola Tesla» kompaniyasınıñ öz mindetterin orındamağanı jaylı küdikke negizdelgen. Alayda tipti medicina mekemesindegi hattar dauı platformanıñ jwmıs istep twrğanın däleldeydi» – dedi advokat.

2017 jıldıñ qañtarınan bastap densaulıq saqtau ministri qızmetin atqarğan 49 jastağı Eljan Birtanov bıltır mausımda koronaviruspen auırğandar sanı kürt köbeyip, auruhanalarda orın jetpey jatqan twsta qızmetinen bostılğan. Al qaraşa ayında ol «iri kölemde qarjı jımqıru» küdigi boyınşa wstaldı. Ol sol kezden beri üyqamaqta otır. 26 naurızda sot onıñ qamau merzimin 30 säuirge deyin wzartqan.

"The Qazaq Times"