Älemde COVID-19 jwqtırğandardıñ jalpı sanı 127 millionğa jetti. Düniejüzilik densaulıq saqtau wyımınıñ mälimeti boyınşa britandıq ştam Europanıñ barlıq öñirinde anıqtalğan. Sarapşılar koronavirustıñ birinşi tolqının jeñil eñsergen elderdiñ özi üşinşi tolqınğa tosqauıl bola almağanın aytadı.

AQŞ-tıñ 20 ştatında virustıñ mutacialanğan türin jwqtırğandardıñ sanı artqan. Bir ğana Florida ştatında indetti jwqtırğandardıñ ortaşa körsetkişi täuligine 5000 adamnan astı. Al ştat boyınşa vakcinalanğan twrğındarınıñ sanı bolsa 15% ğana. Biraq Amerikanıñ birqatar ştattarında qoğamdıq orındardağı karantin şaraları, kerisinşe, jeñildetilgen.

Qazir Europanıñ 27 elinde tolıq nemese jartılay lokdaun engizildi. Germaniyadağı Robert Koh instituınıñ sarapşıları üşinşi tolqınnıñ zardabı aldıñğıdan da auır boluı mümkin deydi. Epidemiologiyalıq ahualdıñ naşarlauına baylanıstı bilik birneşe erejeni qatañdattı. Mäselen, endi özge elden kelgen azamattar Germaniyağa qonğannan keyin emes, wşaqqa minbey twrıp, koronavirusqa test tapsıru kerek. Sonday-aq virus jwqtıru deñgeyi joğarı memleketten oralğandar 10 kün oqşaulanuı tiis.

Bel'giyada senbiden bastap twrmıstıq zattar dükenderine tek aldın ala jazılu arqılı kiruge boladı. Swlulıq salondarı men şaştarazdar tolığımen jabılğan. Al düysenbiden bastap balabaqşalardan basqa barlıq oqu orındarı qaşıqtan jwmıs isteu rejimge köşedi. Ötken aptada Bel'giyada indettiñ jwğu qarqını 40%-ğa ösken.

Wlıbritaniya ükimeti şekaranı tamızğa deyin jabudı qarastırıp jatır. Endi büginnen bastap şekteu şaraları şet el azamattarına ğana emes, britandıqtardıñ özderine de qatıstı bolmaq. YAğni britan azamatı sayahat üşin äzirge özge elge şığa almaydı. Bwl talaptarğa  bağınbağandar üşin jaza qatañ. Äuejayda belgili bir sebepsiz kelgenderge 5 mıñ funt nemese şamamen 3 mln tenge ayıppwl salınbaq.

Pol'şada eki aptağa qosımşa şekteu şaraları engizildi. Elde ülken kölemdegi twrmıstıq dükender jabıluda, qalğan sauda ortalıqtarında satıp aluşılar sanına qatañ şekteuler engizilude. Şaştarazdar men swlulıq salondarı jabıladı, al balabaqşalardı tek därigerlerdiñ, äskeri qızmetşilerdiñ, policiya men ört söndiruşilerdiñ otbasıları ğana paydalana aladı.

Portugaliyada oqıtuşılar, mwğalimder men balabaqşa tärbieşilerin AstraZeneca vakcinasımen egu bastaldı. Atalğan preparattı qoldanu ötken düysenbiden bastap qayta bastaldı. El biligi jaña egu ortalıqtarınıñ aşıluımen vakcinaciyanı jedeldetu arqılı şekteu şaraların birtindep jeñildetuge ümittenip otır, biraq äzirge tötenşe jağday rejimi tağı bir ret wzartıldı.

Ukrainada pandemiyanıñ üşinşi tolqını bastalıp, virus jwqtırğandardıñ sanı täuligine 15 mıñ adamğa deyin jetti. Qazir eldiñ 5 oblısı koronavirustıñ taraluı boyınşa qauipti «qızıl» deñgeyde twr. Al emhanalardağı tösek orındarınıñ 70%-dan astamı nauqasqa tolı. Osığan baylanıstı karantin şaraları qatañdatıla bastadı. Apta basında qabıldanğan Ukraina ükimetiniñ qaulısı boyınşa şet elderden otanına oralğan el azamattarı da soñğı 48 sağatta jasalğan arnayı testti şekara qızmetkerlerine körsetui tiis.

Qazaqstanda da koronavirus deregi artqan. Densaulıq saqtau ministrliginiñ resmi mälimetinşe, elde 28 naurız koronavirus jwqqan 1492 adam, al 27-si küni koronavirus pnevmoniyasına şaldıqqan 22 adam tirkeldi. Qazir elde 24 mıñğa juıq  adam (U07.1 nemese KVI+ boyınşa 21 691, U07.2 nemese KVI- boyınşa 2106) auırıp jatır. Virus keysteri jii tirkelgen Almatıda 21 naurızdan küşinde twrğan karantin şekteuleri 12 säuirge deyin wzartıldı. Bwğan qosa Almatı biligi bir täulikte auırğandar 500-den assa qatañ karantin engizetinin eskertken.

"The Qazaq Times"