الەمدە COVID-19 جۇقتىرعانداردىڭ جالپى سانى 127 ميلليونعا جەتتى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا بريتاندىق شتام ەۋروپانىڭ بارلىق وڭىرىندە انىقتالعان. ساراپشىلار كوروناۆيرۋستىڭ ءبىرىنشى تولقىنىن جەڭىل ەڭسەرگەن ەلدەردىڭ ءوزى ءۇشىنشى تولقىنعا توسقاۋىل بولا الماعانىن ايتادى.

اقش-تىڭ 20 شتاتىندا ۆيرۋستىڭ مۋتاتسيالانعان ءتۇرىن جۇقتىرعانداردىڭ سانى ارتقان. ءبىر عانا فلوريدا شتاتىندا ىندەتتى جۇقتىرعانداردىڭ ورتاشا كورسەتكىشى تاۋلىگىنە 5000 ادامنان استى. ال شتات بويىنشا ۆاكتسينالانعان تۇرعىندارىنىڭ سانى بولسا 15% عانا. بىراق امەريكانىڭ بىرقاتار شتاتتارىندا قوعامدىق ورىندارداعى كارانتين شارالارى، كەرىسىنشە، جەڭىلدەتىلگەن.

قازىر ەۋروپانىڭ 27 ەلىندە تولىق نەمەسە جارتىلاي لوكداۋن ەنگىزىلدى. گەرمانياداعى روبەرت كوح ينستيتۋىنىڭ ساراپشىلارى ءۇشىنشى تولقىننىڭ زاردابى الدىڭعىدان دا اۋىر بولۋى مۇمكىن دەيدى. ەپيدەميولوگيالىق احۋالدىڭ ناشارلاۋىنا بايلانىستى بيلىك بىرنەشە ەرەجەنى قاتاڭداتتى. ماسەلەن، ەندى وزگە ەلدەن كەلگەن ازاماتتار گەرمانياعا قونعاننان كەيىن ەمەس، ۇشاققا مىنبەي تۇرىپ، كوروناۆيرۋسقا تەست تاپسىرۋ كەرەك. سونداي-اق ۆيرۋس جۇقتىرۋ دەڭگەيى جوعارى مەملەكەتتەن ورالعاندار 10 كۇن وقشاۋلانۋى ءتيىس.

بەلگيادا سەنبىدەن باستاپ تۇرمىستىق زاتتار دۇكەندەرىنە تەك الدىن الا جازىلۋ ارقىلى كىرۋگە بولادى. سۇلۋلىق سالوندارى مەن شاشتارازدار تولىعىمەن جابىلعان. ال دۇيسەنبىدەن باستاپ بالاباقشالاردان باسقا بارلىق وقۋ ورىندارى قاشىقتان جۇمىس ىستەۋ رەجيمگە كوشەدى. وتكەن اپتادا بەلگيادا ىندەتتىڭ جۇعۋ قارقىنى 40%-عا وسكەن.

ۇلىبريتانيا ۇكىمەتى شەكارانى تامىزعا دەيىن جابۋدى قاراستىرىپ جاتىر. ەندى بۇگىننەن باستاپ شەكتەۋ شارالارى شەت ەل ازاماتتارىنا عانا ەمەس، بريتاندىقتاردىڭ وزدەرىنە دە قاتىستى بولماق. ياعني بريتان ازاماتى ساياحات ءۇشىن ازىرگە وزگە ەلگە شىعا المايدى. بۇل تالاپتارعا  باعىنباعاندار ءۇشىن جازا قاتاڭ. اۋەجايدا بەلگىلى ءبىر سەبەپسىز كەلگەندەرگە 5 مىڭ فۋنت نەمەسە شامامەن 3 ملن تەنگە ايىپپۇل سالىنباق.

پولشادا ەكى اپتاعا قوسىمشا شەكتەۋ شارالارى ەنگىزىلدى. ەلدە ۇلكەن كولەمدەگى تۇرمىستىق دۇكەندەر جابىلۋدا، قالعان ساۋدا ورتالىقتارىندا ساتىپ الۋشىلار سانىنا قاتاڭ شەكتەۋلەر ەنگىزىلۋدە. شاشتارازدار مەن سۇلۋلىق سالوندارى جابىلادى، ال بالاباقشالاردى تەك دارىگەرلەردىڭ، اسكەري قىزمەتشىلەردىڭ، پوليتسيا مەن ءورت سوندىرۋشىلەردىڭ وتباسىلارى عانا پايدالانا الادى.

پورتۋگاليادا وقىتۋشىلار، مۇعالىمدەر مەن بالاباقشا تاربيەشىلەرىن AstraZeneca ۆاكتسيناسىمەن ەگۋ باستالدى. اتالعان پرەپاراتتى قولدانۋ وتكەن دۇيسەنبىدەن باستاپ قايتا باستالدى. ەل بيلىگى جاڭا ەگۋ ورتالىقتارىنىڭ اشىلۋىمەن ۆاكتسيناتسيانى جەدەلدەتۋ ارقىلى شەكتەۋ شارالارىن بىرتىندەپ جەڭىلدەتۋگە ۇمىتتەنىپ وتىر، بىراق ازىرگە توتەنشە جاعداي رەجيمى تاعى ءبىر رەت ۇزارتىلدى.

ۋكراينادا پاندەميانىڭ ءۇشىنشى تولقىنى باستالىپ، ۆيرۋس جۇقتىرعانداردىڭ سانى تاۋلىگىنە 15 مىڭ ادامعا دەيىن جەتتى. قازىر ەلدىڭ 5 وبلىسى كوروناۆيرۋستىڭ تارالۋى بويىنشا قاۋىپتى «قىزىل» دەڭگەيدە تۇر. ال ەمحانالارداعى توسەك ورىندارىنىڭ 70%-دان استامى ناۋقاسقا تولى. وسىعان بايلانىستى كارانتين شارالارى قاتاڭداتىلا باستادى. اپتا باسىندا قابىلدانعان ۋكراينا ۇكىمەتىنىڭ قاۋلىسى بويىنشا شەت ەلدەردەن وتانىنا ورالعان ەل ازاماتتارى دا سوڭعى 48 ساعاتتا جاسالعان ارنايى تەستتى شەكارا قىزمەتكەرلەرىنە كورسەتۋى ءتيىس.

قازاقستاندا دا كوروناۆيرۋس دەرەگى ارتقان. دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 28 ناۋرىز كوروناۆيرۋس جۇققان 1492 ادام، ال 27-ءسى كۇنى كوروناۆيرۋس پنەۆمونياسىنا شالدىققان 22 ادام تىركەلدى. قازىر ەلدە 24 مىڭعا جۋىق  ادام (U07.1 نەمەسە كۆي+ بويىنشا 21 691, U07.2 نەمەسە كۆي- بويىنشا 2106) اۋىرىپ جاتىر. ۆيرۋس كەيستەرى ءجيى تىركەلگەن الماتىدا 21 ناۋرىزدان كۇشىندە تۇرعان كارانتين شەكتەۋلەرى 12 ساۋىرگە دەيىن ۇزارتىلدى. بۇعان قوسا الماتى بيلىگى ءبىر تاۋلىكتە اۋىرعاندار 500-دەن اسسا قاتاڭ كارانتين ەنگىزەتىنىن ەسكەرتكەن.

"The Qazaq Times"