Mädeniet basqarmasına qarastı «Şımkent qalalıq mädeniet üyi» koncerttik wyımınıñ basşısı Säken Mayğaziev MuzArt tobınıñ byudjeti 30 mln teñge bolatın koncertin ötkizuge qol qoyğan.

Naurız meyramında Şımkent qalasınıñ Türkistan sarayında «MuzART-qa 20 jıl: MuzART äsem änderin änşi dostarımen birge şırqaydı» degen ataumen koncert ötti. Şaranı Naurız meyramı ayasında sol toptıñ beldi müşesi Säken Mayğaziev wyımdastırğan. Ol basqaratın qalalıq mädeniet üyi jeke kompaniyağa bir közden satıp alu täsilimen än keşin ötkizuge tapsırıs bergen.

Taraptar kelisimşartınıñ sipattaması. Foto-skrin: www.goszakup.gov.kz

Megapolistegi mädeniet üyiniñ jetekşisi Säken Mayğaziev pen «Sapfir Media» kompaniyası direktorı Anel' Bädenova 20 naurız kelisim-şart jasasqan. Pandemiya kezine qaramastan wyımdastırılğan şarağa memleket qarjısınan 30 mln teñge jwmsalğan. Keşke tanımal änşiler şaqırılğan.

EQOJ (Ekonomikalıq qızmettiñ barlıq türleriniñ ortaq jiktelimi – QT) tizbesinde jekelegen qızmetter jäne mädeniet salasında bilim berumen aynalısatın «Sapfir Media» JŞS aşıq konkurssız, yağni bir közden satıp alu arqılı «önim beruşi» tarap retinde tanılğan. Bwl kompaniyanıñ iesi – 23 jastağı Bädenova Anel' Sırımqızı. Uchet.kz kontragentter servisindegi derekterge qarağanda,kompaniya qwrılğan 6,5 jılda salıq alımdarına 640 mıñnan säl asa qarjı tölegen.

«Sapfir Media» JŞS-niñ 2014-2021 jıldar aralığında salıq alımı. Foto: pk.uchet.kz

Bir qızığı, mamandar milliondağan qarajatqa negizdelgen lot memlekettik satıp alu portalınan joğalıp, keyin qayta körine bastağan. Sonday-aq, koncerttiñ tehnikalıq sipattaması tolıq jazılmağan. Mäselen, keşke kimder jäne neşe kisi qonaqqa şaqırıladı, olarğa beriletin gonorar, körermenderdiñ sanı, tört ret koncert qoyılatını turalı bir de bir mälimet qamtılmağan.

Koncertti ötkizuge arnalğan lottıñ tehnikalıq sipattaması. Foto-skrin: www.goszakup.gov.kz

Keş sebepkeri MuzART tobınıñ qwramındağı änşi Säken Mayğaziev şaradan keyin Instagram jelisindegi paraqşasında qwzırlı organ basşılarına alğısın bildirip, ağınan jarıldı.

 «Sizder men bizderdiñ qauışuımızğa sebepker bolğan, barlıq sanitarlıq talaptardı saqtap mümkindik bergen Şımkent qalası äkimdigine, Şımkent qalalıq bas sanitarlıq däriger Äbdimanap Qoşqarwlına, densaulıq saqtau departamentine, policiya qızmetkerlerine, tärtipke bağınğan qalıñ körermenge alğısımız şeksiz. Beybit eldiñ aşıq aspanında äuezdi än äueley bersin», – dep jazdı änşi-şeneunik.

MuzART tobınıñ koncertinde top müşesi Mayğaziev söylep twr. Foto: Säken Mayğazievtiñ Instagram jelisindegi paraqşasınan

Redakciya tildesken «Sapfir Media» kompaniyasınıñ zañdı ökili Sağdi Aysınov naurızdıñ 21 jäne 22-si künderi MuzART tobı tört birdey keş ötkizgenin aytadı.

«Portalda tehnikalıq qate ketken boluı mümkin. 30 mln teñgeniñ bäri MuzART-qa bölinbegen, än keşine şamamen 15 mln qarjı jwmsaldı. Basqası türli şarağa, mäselen «Qazaq radiosınıñ 100 jıldığın» atap ötuge 5 mln, belgili sazgerdiñ keşine 2 mln qarastırıldı», – degen ol qazir issaparda jürgenin aytıp, kelesi apta qarjınıñ esebin joldauğa uäde etti.

Onıñ sözinşe, kompaniyanıñ esep şotına äli eşqanday qarajat audarılmağan.

«26 naurızğa deyin Opera teatrınıñ qoldanılısında bolğandıqtan led ekran, qosımşa qwrılğılar men dekorativti körneki materialdardı jalğa aldı. Meyram qarsañında ädettegidey äue, temirjol biletteri qımbattap ketti. On şaqtı keş qonaqtarınıñ jol-pwlı, gonorarı, jatın ornı, jürip-twrısınıñ şığının köterdik»

Memlekettik satıp aludı zerttep jürgen tilşi Miyat Käşibay kez kelgen müddeler qaqtığısı orın aluı ıqtimal jağday boyınşa mwnday faktilerdiñ jiti tekseriluin jäne qwjat pen is qabısu qajettigin alğa tartadı.

«Elimizde Sıbaylas jemqorlıqqa qarsı is-qimıl turalı zañ bar. Sonıñ 15-babında müddeler qaqtığısı jaylı aytılğan. Al men bwl joğarıdağı kelisim şarttan müddeler qaqtığısın bayqap otırmın. Säken Mayğaziev özi än aytatın toptıñ koncertin ötkizu üşin öz basqaratın mekemeden aqşa bölip otır. Özi sol koncertte öner körsetkeni tağı bar», – dep jazadı jurnalist Facebook jelisindegi paraqşasında.

«Memlekettik satıp alu turalı» zañnıñ 6-babı Memlekettik satıp aluğa qatısuğa baylanıstı şekteuler» – QT) boyınşa, müddeler qaqtığısına jol berui mümkin jağdayda taraptar sol jobağa qatıstı jwmısın toqtatuı tiis.  Zertteu-Research qoğamdıq qorınıñ sarapşısı Ğalımjan Orazımbet nazar audaru üşin zañnan üzindi keltiredi.

1-tarmaq. Äleuetti önim beruşi, eger:

1) osı äleuetti önim beruşiniñ birinşi basşılarınıñ jäne (nemese) osı äleuetti önim beruşiniñ uäkiletti ökiliniñ jaqın tuıstarı, jwbayı (zayıbı) nemese jegjattarı önim beruşini tañdau turalı şeşim qabıldau qwqığına ie bolsa ne ötkiziletin memlekettik satıp aluda tapsırıs beruşiniñ nemese memlekettik satıp aludı wyımdastıruşınıñ ökili bolıp tabılsa;

2) äleuetti önim beruşi jäne (nemese) onıñ jwmıskeri jäne (nemese) onıñ ülestes twlğası tapsırıs beruşige ne memlekettik satıp aludı wyımdastıruşığa ötkiziletin memlekettik satıp aludı dayındau boyınşa saraptamalıq, konsul'taciyalıq jäne (nemese) özge de qızmetter körsetse, tehnikalıq-ekonomikalıq negizdemeni äzirleuşiniñ jobalau (jobalau-smetalıq) qwjattamasın äzirleu jönindegi memlekettik satıp aluğa qatısuın qospağanda, ötkiziletin memlekettik satıp aludıñ nısanası bolıp tabılatın ob'ektiniñ qwrılısına arnalğan tehnikalıq-ekonomikalıq negizdemeni jäne (nemese) jobalau (jobalau-smetalıq) qwjattamasın äzirleuge bas jobalauşı ne qosalqı jobalauşı retinde qatıssa, ötkiziletin memlekettik satıp aluğa qatısuğa qwqılı emes.

Äleumettik jelilerde onsız da BAQ betterinde jariyalanıp, telearnalarda mereytoylıq koncertter men memuarlıq derekti fil'm  berilip jatqanda «koncert üstine koncerttiñ ne qajeti bar» degen saual jiiledi. Rasında da 21 naurız Almaty TV arnası «MuzART» tobına 20 jıl» degen taqırıpta 46 minutqa şaqtalğan derekti fil'm wsındı. Naurızdıñ 24-i «Habar» arnası da «MuzArt» tobına 20 jıl» televiziyalıq koncertin berdi. Bir apta bwrın jazılğan 2,5 sağattan asatın keşte 30-dan astam belgili estrada änşileri men toptarı öner körsetken.

Bwğan deyin Naurız meyramına oray 60 mln teñgege ötkizu josparlanğan Şämşi Qaldayaqov änderi is-şarası keyinnen toqtatılğan. Biraq änşi-şeneunik qatısatın keş jalğasın taptı. Şımkent qalası äkimdiginiñ Naurız meyramın toylauğa arnalğan is-şaralar josparı men oğan jwmsalğan qarjı kölemi qoğamda dau tuğızğan. Degenmen naurıznamalıq mädeni şaralardıñ bası-qasında jürgen äkim orınbasarı Şıñğıs Mwqan men mädeniet basqarmasınıñ basşısı Hanzada Esen jäne daulı şaralarğa qol qoyğan Säken Mayğaziev memlekettik satıp alu salasınıñ täuelsiz sarapşısı men jurnalisterdiñ swrağına qwjat däyektermen twşımdı jauap bermedi.

“The Qazaq Times”