داۋلى لوت: مۋزارت-تىڭ كەشىنە «30 ەمەس، شامامەن 15 ملن جۇمسالدى»

مادەنيەت باسقارماسىنا قاراستى «شىمكەنت قالالىق مادەنيەت ءۇيى» كونتسەرتتىك ۇيىمىنىڭ باسشىسى ساكەن مايعازيەۆ مۋزارت توبىنىڭ بيۋدجەتى 30 ملن تەڭگە بولاتىن كونتسەرتىن وتكىزۋگە قول قويعان.

ناۋرىز مەيرامىندا شىمكەنت قالاسىنىڭ تۇركىستان سارايىندا «مۋزارت-قا 20 جىل: مۋزارت اسەم اندەرىن ءانشى دوستارىمەن بىرگە شىرقايدى» دەگەن اتاۋمەن كونتسەرت ءوتتى. شارانى ناۋرىز مەيرامى اياسىندا سول توپتىڭ بەلدى مۇشەسى ساكەن مايعازيەۆ ۇيىمداستىرعان. ول باسقاراتىن قالالىق مادەنيەت ءۇيى جەكە كومپانياعا ءبىر كوزدەن ساتىپ الۋ تاسىلىمەن ءان كەشىن وتكىزۋگە تاپسىرىس بەرگەن.

تاراپتار كەلىسىمشارتىنىڭ سيپاتتاماسى. فوتو-سكرين: www.goszakup.gov.kz

مەگاپوليستەگى مادەنيەت ءۇيىنىڭ جەتەكشىسى ساكەن مايعازيەۆ پەن «ساپفير مەديا» كومپانياسى ديرەكتورى انەل بادەنوۆا 20 ناۋرىز كەلىسىم-شارت جاساسقان. پاندەميا كەزىنە قاراماستان ۇيىمداستىرىلعان شاراعا مەملەكەت قارجىسىنان 30 ملن تەڭگە جۇمسالعان. كەشكە تانىمال انشىلەر شاقىرىلعان.

ەقوج (ەكونوميكالىق قىزمەتتىڭ بارلىق تۇرلەرىنىڭ ورتاق جىكتەلىمى – QT) تىزبەسىندە جەكەلەگەن قىزمەتتەر جانە مادەنيەت سالاسىندا ءبىلىم بەرۋمەن اينالىساتىن «ساپفير مەديا» جشس اشىق كونكۋرسسىز، ياعني ءبىر كوزدەن ساتىپ الۋ ارقىلى «ءونىم بەرۋشى» تاراپ رەتىندە تانىلعان. بۇل كومپانيانىڭ يەسى – 23 جاستاعى بادەنوۆا انەل سىرىمقىزى. Uchet.kz كونتراگەنتتەر سەرۆيسىندەگى دەرەكتەرگە قاراعاندا،كومپانيا قۇرىلعان 6,5 جىلدا سالىق الىمدارىنا 640 مىڭنان ءسال اسا قارجى تولەگەن.

«ساپفير مەديا» جشس-ءنىڭ 2014-2021 جىلدار ارالىعىندا سالىق الىمى. فوتو: pk.uchet.kz

ءبىر قىزىعى، ماماندار ميلليونداعان قاراجاتقا نەگىزدەلگەن لوت مەملەكەتتىك ساتىپ الۋ پورتالىنان جوعالىپ، كەيىن قايتا كورىنە باستاعان. سونداي-اق، كونتسەرتتىڭ تەحنيكالىق سيپاتتاماسى تولىق جازىلماعان. ماسەلەن، كەشكە كىمدەر جانە نەشە كىسى قوناققا شاقىرىلادى، ولارعا بەرىلەتىن گونورار، كورەرمەندەردىڭ سانى، ءتورت رەت كونتسەرت قويىلاتىنى تۋرالى ءبىر دە ءبىر مالىمەت قامتىلماعان.

كونتسەرتتى وتكىزۋگە ارنالعان لوتتىڭ تەحنيكالىق سيپاتتاماسى. فوتو-سكرين: www.goszakup.gov.kz

كەش سەبەپكەرى مۋزارت توبىنىڭ قۇرامىنداعى ءانشى ساكەن مايعازيەۆ شارادان كەيىن Instagram جەلىسىندەگى پاراقشاسىندا قۇزىرلى ورگان باسشىلارىنا العىسىن ءبىلدىرىپ، اعىنان جارىلدى.

 «سىزدەر مەن بىزدەردىڭ قاۋىشۋىمىزعا سەبەپكەر بولعان، بارلىق سانيتارلىق تالاپتاردى ساقتاپ مۇمكىندىك بەرگەن شىمكەنت قالاسى اكىمدىگىنە، شىمكەنت قالالىق باس سانيتارلىق دارىگەر ءابدىماناپ قوشقارۇلىنا، دەنساۋلىق ساقتاۋ دەپارتامەنتىنە، پوليتسيا قىزمەتكەرلەرىنە، تارتىپكە باعىنعان قالىڭ كورەرمەنگە العىسىمىز شەكسىز. بەيبىت ەلدىڭ اشىق اسپانىندا اۋەزدى ءان اۋەلەي بەرسىن»، – دەپ جازدى ءانشى-شەنەۋنىك.

مۋزارت توبىنىڭ كونتسەرتىندە توپ مۇشەسى مايعازيەۆ سويلەپ تۇر. فوتو: ساكەن مايعازيەۆتىڭ Instagram جەلىسىندەگى پاراقشاسىنان

رەداكتسيا تىلدەسكەن «ساپفير مەديا» كومپانياسىنىڭ زاڭدى وكىلى ساعدي ايسىنوۆ ناۋرىزدىڭ 21 جانە 22-ءسى كۇندەرى مۋزART توبى ءتورت بىردەي كەش وتكىزگەنىن ايتادى.

«پورتالدا تەحنيكالىق قاتە كەتكەن بولۋى مۇمكىن. 30 ملن تەڭگەنىڭ ءبارى مۋزART-قا بولىنبەگەن، ءان كەشىنە شامامەن 15 ملن قارجى جۇمسالدى. باسقاسى ءتۇرلى شاراعا، ماسەلەن «قازاق راديوسىنىڭ 100 جىلدىعىن» اتاپ وتۋگە 5 ملن، بەلگىلى سازگەردىڭ كەشىنە 2 ملن قاراستىرىلدى»، – دەگەن ول قازىر ءىسساپاردا جۇرگەنىن ايتىپ، كەلەسى اپتا قارجىنىڭ ەسەبىن جولداۋعا ۋادە ەتتى.

ونىڭ سوزىنشە، كومپانيانىڭ ەسەپ شوتىنا ءالى ەشقانداي قاراجات اۋدارىلماعان.

«26 ناۋرىزعا دەيىن وپەرا تەاترىنىڭ قولدانىلىسىندا بولعاندىقتان لەد ەكران، قوسىمشا قۇرىلعىلار مەن دەكوراتيۆتى كورنەكى ماتەريالداردى جالعا الدى. مەيرام قارساڭىندا ادەتتەگىدەي اۋە، تەمىرجول بيلەتتەرى قىمباتتاپ كەتتى. ون شاقتى كەش قوناقتارىنىڭ جول-پۇلى، گونورارى، جاتىن ورنى، ءجۇرىپ-تۇرىسىنىڭ شىعىنىن كوتەردىك»

مەملەكەتتىك ساتىپ الۋدى زەرتتەپ جۇرگەن ءتىلشى ميات كاشىباي كەز كەلگەن مۇددەلەر قاقتىعىسى ورىن الۋى ىقتيمال جاعداي بويىنشا مۇنداي فاكتىلەردىڭ ءجىتى تەكسەرىلۋىن جانە قۇجات پەن ءىس قابىسۋ قاجەتتىگىن العا تارتادى.

«ەلىمىزدە سىبايلاس جەمقورلىققا قارسى ءىس-قيمىل تۋرالى زاڭ بار. سونىڭ 15-بابىندا مۇددەلەر قاقتىعىسى جايلى ايتىلعان. ال مەن بۇل جوعارىداعى كەلىسىم شارتتان مۇددەلەر قاقتىعىسىن بايقاپ وتىرمىن. ساكەن مايعازيەۆ ءوزى ءان ايتاتىن توپتىڭ كونتسەرتىن وتكىزۋ ءۇشىن ءوز باسقاراتىن مەكەمەدەن اقشا ءبولىپ وتىر. ءوزى سول كونتسەرتتە ونەر كورسەتكەنى تاعى بار»، – دەپ جازادى جۋرناليست Facebook جەلىسىندەگى پاراقشاسىندا.

«مەملەكەتتiك ساتىپ الۋ تۋرالى» زاڭنىڭ 6-بابى («مەملەكەتتىك ساتىپ الۋعا قاتىسۋعا بايلانىستى شەكتەۋلەر» – QT) بويىنشا، مۇددەلەر قاقتىعىسىنا جول بەرۋى مۇمكىن جاعدايدا تاراپتار سول جوباعا قاتىستى جۇمىسىن توقتاتۋى ءتيىس.  Zertteu-Research قوعامدىق قورىنىڭ ساراپشىسى عالىمجان ورازىمبەت نازار اۋدارۋ ءۇشىن زاڭنان ءۇزىندى كەلتىرەدى.

1-تارماق. الەۋەتتى ءونىم بەرۋشى، ەگەر:

1) وسى الەۋەتتى ءونىم بەرۋشىنىڭ ءبىرىنشى باسشىلارىنىڭ جانە (نەمەسە) وسى الەۋەتتى ءونىم بەرۋشىنىڭ ۋاكىلەتتى وكىلىنىڭ جاقىن تۋىستارى، جۇبايى (زايىبى) نەمەسە جەگجاتتارى ءونىم بەرۋشىنى تاڭداۋ تۋرالى شەشىم قابىلداۋ قۇقىعىنا يە بولسا نە وتكىزىلەتىن مەملەكەتتىك ساتىپ الۋدا تاپسىرىس بەرۋشىنىڭ نەمەسە مەملەكەتتىك ساتىپ الۋدى ۇيىمداستىرۋشىنىڭ وكىلى بولىپ تابىلسا;

2) الەۋەتتى ءونىم بەرۋشى جانە (نەمەسە) ونىڭ جۇمىسكەرى جانە (نەمەسە) ونىڭ ۇلەستەس تۇلعاسى تاپسىرىس بەرۋشىگە نە مەملەكەتتىك ساتىپ الۋدى ۇيىمداستىرۋشىعا وتكىزىلەتىن مەملەكەتتىك ساتىپ الۋدى دايىنداۋ بويىنشا ساراپتامالىق، كونسۋلتاتسيالىق جانە (نەمەسە) وزگە دە قىزمەتتەر كورسەتسە، تەحنيكالىق-ەكونوميكالىق نەگىزدەمەنى ازىرلەۋشىنىڭ جوبالاۋ (جوبالاۋ-سمەتالىق) قۇجاتتاماسىن ازىرلەۋ جونىندەگى مەملەكەتتىك ساتىپ الۋعا قاتىسۋىن قوسپاعاندا، وتكىزىلەتىن مەملەكەتتىك ساتىپ الۋدىڭ نىساناسى بولىپ تابىلاتىن وبەكتىنىڭ قۇرىلىسىنا ارنالعان تەحنيكالىق-ەكونوميكالىق نەگىزدەمەنى جانە (نەمەسە) جوبالاۋ (جوبالاۋ-سمەتالىق) قۇجاتتاماسىن ازىرلەۋگە باس جوبالاۋشى نە قوسالقى جوبالاۋشى رەتىندە قاتىسسا، وتكiزiلەتiن مەملەكەتتiك ساتىپ الۋعا قاتىسۋعا قۇقىلى ەمەس.

الەۋمەتتىك جەلىلەردە ونسىز دا باق بەتتەرىندە جاريالانىپ، تەلەارنالاردا مەرەيتويلىق كونتسەرتتەر مەن مەمۋارلىق دەرەكتى فيلم  بەرىلىپ جاتقاندا «كونتسەرت ۇستىنە كونتسەرتتىڭ نە قاجەتى بار» دەگەن ساۋال جيىلەدى. راسىندا دا 21 ناۋرىز Almaty TV ارناسى «مۋزارت» توبىنا 20 جىل» دەگەن تاقىرىپتا 46 مينۋتقا شاقتالعان دەرەكتى فيلم ۇسىندى. ناۋرىزدىڭ 24-ءى «حابار» ارناسى دا «مۋزارت» توبىنا 20 جىل» تەلەۆيزيالىق كونتسەرتىن بەردى. ءبىر اپتا بۇرىن جازىلعان 2,5 ساعاتتان اساتىن كەشتە 30-دان استام بەلگىلى ەسترادا انشىلەرى مەن توپتارى ونەر كورسەتكەن.

بۇعان دەيىن ناۋرىز مەيرامىنا وراي 60 ملن تەڭگەگە وتكىزۋ جوسپارلانعان ءشامشى قالداياقوۆ اندەرى ءىس-شاراسى كەيىننەن توقتاتىلعان. بىراق ءانشى-شەنەۋنىك قاتىساتىن كەش جالعاسىن تاپتى. شىمكەنت قالاسى اكىمدىگىنىڭ ناۋرىز مەيرامىن تويلاۋعا ارنالعان ءىس-شارالار جوسپارى مەن وعان جۇمسالعان قارجى كولەمى قوعامدا داۋ تۋعىزعان. دەگەنمەن ناۋرىزنامالىق مادەني شارالاردىڭ باسى-قاسىندا جۇرگەن اكىم ورىنباسارى شىڭعىس مۇقان مەن مادەنيەت باسقارماسىنىڭ باسشىسى حانزادا ەسەن جانە داۋلى شارالارعا قول قويعان ساكەن مايعازيەۆ مەملەكەتتىك ساتىپ الۋ سالاسىنىڭ تاۋەلسىز ساراپشىسى مەن جۋرناليستەردىڭ سۇراعىنا قۇجات دايەكتەرمەن تۇششىمدى جاۋاپ بەرمەدى.

“The Qazaq Times”