İle Alatau wlttıq parkiniñ köp körinisiniñ biri. Foto: qazaqstan3d.kz

İle Alatau wlttıq parkiniñ jalpı kölemi 187,7 gektar bolatın 35 jer teliminiñ birneşe jılğa jekemenşikke jalğa berilmek.

Wlttıq parktiñ resmi saytında jariyalanğan qwjatqa säykes, turistik jäne rekreaciya nısandarın damıtu maqsatında atalğan aumaqtardı paydalanu üşin tender jariyalanıp, konkurs ötedi. 9 aumaqtı – 25 jılğa deyin, 26 aumaqtı 5 jılğa deyin jekemenşik kompaniyalarğa paydalanuğa beru josparlanıp otır.

Ondağı aqparatqa säykes, park aumağında tömendegidey nısandar saluğa basımdıq beriledi:

  • Ülken Almatı ormanı aumağınan tau-şañğı kurortın saluğa – 140 gektar jer bölinedi;
  • sauıqtıru keşeni türinde eko-qonaq üyge saluğa 1.5 gektar jer qarastırılğan;
  • turistik sauıqtıru keşenderi;
  • qoğamdıq tamaqtanu orındarı;
  • balalar lageri.

Jariyalanğan lottar boyınşa ötinim 26 säuirge deyin Almatı qalasındağı Tausamalı ı/a, Jandosov 1 meken-jayında qabıldanadı.

İle Alatau wlttıq parkiniñ aumağı alğaş ret tenderge qoyılıp jatqan joq. Bıltır jazğıtwrımda bilik jartı sağatqa jetpeytin talqıda wlttıq menşik sanalatın jerdiñ bir böligi (bwl aumaqqa Ülken Almatı köli, Alma-Arasan şatqalı, Ası üstirtiniñ uçaskeleri men basqa da jerler kiredi) iesine qoğam küdiktene qaraytın «Qwltau jäne K» kompaniyasına 49 jılğa jalğa berilgen.

2002 jılı eks-prezident Nazarbaevqa «Bonita group» kompaniyası «İle Alatauı kurort aymağı» jobasın tanıstırılıp, Kökjaylau şatqalına tau şañğısı kurortın saludı wsınğan. Biraq bwl bastamağa almatılıq eko-belsendiler qarsı şıqqan. Qwnı 1,5 mlrd dollar twratın joba töñiregindegi dau 17 jılğa sozılıp, 2019 jılı prezident Toqaev «Kökjaylau tau şañğı keşenin saluğa tıyım salğan».

Qazaqstanda tabiğatı erekşe aumaqtarğa bilik pen biznes ökilderi jii köz alartadı. Sol sebepti qoğamda ekodau köp qaytalanadı. Keyingi birer jıldıñ özinde Almatı oblısında ornalasqan asa körikti meken Kökjaylau, Mañğıstau oblısındağı Bozjıra şatqalı jäne Şımkent qalasındağı atşabar ornı tärizdi atışulı oqiğalar qoğamda rezonans tudırdı.

Qosımşa:

İle Alatauı wlttıq tabiğat sayabağı – Almatı qalası irgesindegi Almatı tau jotasında ornalasqan. Aşıq derekközderdegi mälimetterge qarağanda, sayabaq 1996 jılı tabiği keşenderdi, januarlar men ösimdikterdiñ sirek kezdesetin türlerin qorğau maqsatında qwrılğan. İle Alatauınıñ ortalıq böligin alıp jatqan sayabaq jeri batısında Şamalğan özeni men şığısında Türgen özeni aralıqtarın qamtidı. Sayabaq beldemine Almatı qorığı men oğan irgeles jatqan orman şaruaşılıqtarı kiredi.

Sayabaq aumağında ornalasqan tau kölderi – tabiğattıñ eñ körikti jerleriniñ biri. Olardıñ işindegi eñ irisi äri ädemisi - Ülken Almatı köli.

İle Alatauı wlttıq tabiğat sayabağında ösimdikterdiñ 1500 türi anıqtalğan. Bwl ösimdikterdiñ 40 türi Qazaqstannıñ «Qızıl kitabına» engizilgen. Al 30 türi (İle böriqaraqatı, İle kökjalbızı, İle sasırı, İle üşqatı, t.b.) Qazaqstannan basqa eş jerde kezdespeydi. Omırtqalı januarlardıñ 245 türi, olardıñ 8 türi balıqtar; 4-eui – qosmekendiler; 8-i – bauırımen jorğalauşılar; 178-i – qwstar; 47-si – sütqorektiler. 

Sonday-aq, mwnda Talqız jäne Türgen eski qalaşıqtarınıñ ornı saqtalğan. Türgen şatqalında ertedegi temir däuiriniñ zirattarı men Esik özeniniñ boyında saq qorğandarı bar. Butakov sarqıraması, relikti mük basqan Şıñtürgen şırşaları da tabiğat eskertkişteri bolıp sanaladı. Soñğısında mük astında, 30- 40 sm tereñdikte qalıñd. 2- 3 m bolatın mäñgi mwz qabatı bar. Äsem tabiğatı, aluan türli florası men faunası bar sayabaqtıñ qorşağan ortanı qorğauda alatın ornı erekşe.

"The Qazaq Times"