Foto: aşıq derekköz

Kökjaylau jobasın jüzege asıruğa tıyım salu jöninde şeşim BWW tarapınan da qoldau taptı. Bwl turalı QR prezidentiniñ baspasöz hatşısı Berik Uäli ayttı.

Berik Uäli öziniñ paraqşasında: «Jaqında ğana Prezident Qasım-Jomart Kemelwlı Kökjaylau jobasın jüzege asıruğa tıyım salu jöninde şeşim şığarğanı mälim. Büginde osı mañızdı wyğarım öz elimizben qatar älem qauımdastığınıñ ayrıqşa nazarın audartıp otır. Bwl şeşim BWW tarapınan da qoldau taptı. Memleket basşısınıñ atına BWW Bas hatşısınıñ orınbasarı, BWW-nıñ Europalıq ekonomikalıq komissiyasınıñ atqaruşı hatşısı Ol'ga Algaerovanıñ hatı kelip tüsti», – dep jazdı.

Almatığa jaqın «Medeu» mwz aydınınan tört kilometr qaşıqtıqta ornalasqan şatqalğa kurort salu jobası 2002 jılı köterilgen. Almatı biligi onıñ tau ekojüyesine ziyan keltirmeytinin aytadı. Qalalıq äkimdiktiñ pikirinşe, joba turizmdi damıtu üşin öte mañızdı.

Kökjaylauğa kurort saluğa qarsı qoğamdıq ekologtardıñ şağımı boyınşa sotta bes is qaraldı. Prokuraturağa jiırmadan astam arız tüsti.

Biıl qazannıñ soñında Almatığa jwmıs saparımen kelgen prezident Qasım-Jomart Toqaev Kökjaylauğa salınatın tau şañğısı kurortınıñ jobasın toqtatu qajettigin aytqan. Onıñ «Bwl mäselege qayta-qayta orala bermes üşin bügin birjola tıyım saldım. Kökjaylau tau-şañğısı kurortına qajettilik joq» degen sözi baspasözde jariyalandı.

Sonımen qatar, Qazaqstan prezidenti Qasım-Jomart Toqaev 29 qazanda Almatı qalasınıñ äleumettik-ekonomikalıq damuına arnalğan otırısta bwrın zañsız berilgen jerlerdi İle Alatauı wlttıq parkine qaytaru qajettigin de mälimdegen edi.

"The Qazaq Times"