Ostin men Blinken Japoniyada. Foto: VOA

AQŞ memlekettik hatşısı Antoni Blinken men qorğanıs ministri Loyd Ostin alğaş ret şeteldik saparın Japoniyadan bastadı. Keşe, 15 naurız küni Tokio qalasına barıp tüsken olar bügin Japoniyanıñ SİM jäne Wlttıq qorğanıs ministrligimen «2+2» ıntımaqtastıqtı tereñdetu boyınşa kelissözderdi bastap ketti. Sapar josparı boyınşa erteñ Seulge attanuı tiis.

Keybir baqılauşılar Bayden komandasınıñ alğaşqı resmi saparın Japoniya men Oñtüstik Koreyadan bastauına nazar audarıp otır. Bwnımen Bayden ükimeti Soltüstik-Şığıstağı Aziyanıñ qauipsizdigine qatıstı alañdauşılığın körsetip otır dep sanaydı. Bılayşa aytqanda, AQŞ-tıñ jaña biligindegi şeneunikterdiñ alğaşqı saparı bolğan elder Qwrama Ştattardıñ qazir basa män berip otırğan elderi sanaladı.

Uaşingtonnıñ Japoniya men Oñtüstik Koreyağa basa män beruinde eki negizgi sebepti körip otırmız. Birinşisi bolsa, odaqtas osı elder qazir Qwrama Ştattar tap bolıp otırğan Qıtaydıñ ıqpalına qarsı wzaq jıldan beri bir-birine säykesip jwmıs istep kelgen elder. Al, ekinşisi bolsa, Qwrama Ştattar men onıñ odaqtas, serikteriniñ qauipsizdigi üşin Korey tübeginiñ yadrolıq qarudan tazaruında da Japoniya men Oñtüstik Koreyanıñ mañızı zor. Köp jıldardan beri Qwrama Ştattıñ jaña biligi öziniñ sauda-ekonomikalıq qatınastarın bekemdep, kelisimderdi pısıqtau üşin är jaña ükimeti aldımen Londonğa, sosın Europanıñ birqatar elderine saparlaytın. Soñğı jıldardağı qalpıtasqan jahandıq geosayasi jağdaylarğa baylanıstı bwl dästürli özgertuge tura kelude.

Qazir, älemniñ eki iri ekonomikası arasındağı qayşılıq asqınğan küyde qalıp otır. Bwğan Tramp kezindegi sauda şekteuleri men Qıtaydıñ asqına tüsken agressiyalıq äreketteri sebep bolıp otır. Bayden jwmısına kiriskennen beri eki ay şamasındağı uaqıt ötse de, ol keybir Tramp kezinde qabıl alınğan Qıtayğa qarsı qısımdardı alıp tastauğa asıqpaytın körinedi. Ol Aq üyge kirmey twrıpta AQŞ-Qıtay qayşılığı öz küyinde qalatının saytımızda birneşe saraptamalar arqılı boljağan edik. Qıtayğa qarsı joğarı tarifterdi saqtap qalğan Bayden ükimeti, oğan üsteme retinde Tayuannıñ demokratiyalıq rejiimin qoldauda belsendilik te tanıttı, oğan qosa Şıñjañdağı adam qwqığı, az sandı wlttarğa qaratılğan qısım jäne mäjbürli eñbek mäseleleri de Uaşingtonnıñ qabağın salqındata tüsti. Bwl ärine, Beyjiñniñ şamına tidi.

Osınıñ bäri qosıla kelip, Qıtaydıñ artıp kele jatqan sın-qaterleri Bayden biligi üşin de eñ bastı auırtpaşılıq bolıp qabıldandı. Jäne sonıñ nätijesinde Ündi jäne Tınıq mwhitı aymağınıñ qauipsizdigi men twraqtılığı, Şığıs Aziya men Oñtüstik Şığıs Aziyadağı Qıtay äreketine tosqauıl qoyu qatarlı strategiyalıq qadamdardı alğa jıldıtuına tura keldi. Sonımen Mem. departament pen Pentagonnıñ jaña basşıları salıp wrıp Tokio men Seulge keldi.

“The Qazaq Times”