بلينكەن مەن وستين توكيودا: بايدەن ۇكىمەتى داستۇردەن نەگە جاڭىلدى؟

اقش مەملەكەتتىك حاتشىسى انتوني بلينكەن مەن قورعانىس ءمينيسترى لويد وستين العاش رەت شەتەلدىك ساپارىن جاپونيادان باستادى. كەشە، 15 ناۋرىز كۇنى توكيو قالاسىنا بارىپ تۇسكەن ولار بۇگىن جاپونيانىڭ ءسىم جانە ۇلتتىق قورعانىس مينيسترلىگىمەن «2+2» ىنتىماقتاستىقتى تەرەڭدەتۋ بويىنشا كەلىسسوزدەردى باستاپ كەتتى. ساپار جوسپارى بويىنشا ەرتەڭ سەۋلگە اتتانۋى ءتيىس.

كەيبىر باقىلاۋشىلار بايدەن كومانداسىنىڭ العاشقى رەسمي ساپارىن جاپونيا مەن وڭتۇستىك كورەيادان باستاۋىنا نازار اۋدارىپ وتىر. بۇنىمەن بايدەن ۇكىمەتى سولتۇستىك-شىعىستاعى ازيانىڭ قاۋىپسىزدىگىنە قاتىستى الاڭداۋشىلىعىن كورسەتىپ وتىر دەپ سانايدى. بىلايشا ايتقاندا، اقش-تىڭ جاڭا بيلىگىندەگى شەنەۋنىكتەردىڭ العاشقى ساپارى بولعان ەلدەر قۇراما شتاتتاردىڭ قازىر باسا ءمان بەرىپ وتىرعان ەلدەرى سانالادى.

ۋاشينگتوننىڭ جاپونيا مەن وڭتۇستىك كورەياعا باسا ءمان بەرۋىندە ەكى نەگىزگى سەبەپتى كورىپ وتىرمىز. ءبىرىنشىسى بولسا، وداقتاس وسى ەلدەر قازىر قۇراما شتاتتار تاپ بولىپ وتىرعان قىتايدىڭ ىقپالىنا قارسى ۇزاق جىلدان بەرى ءبىر-بىرىنە سايكەسىپ جۇمىس ىستەپ كەلگەن ەلدەر. ال، ەكىنشىسى بولسا، قۇراما شتاتتار مەن ونىڭ وداقتاس، سەرىكتەرىنىڭ قاۋىپسىزدىگى ءۇشىن كورەي تۇبەگىنىڭ يادرولىق قارۋدان تازارۋىندا دا جاپونيا مەن وڭتۇستىك كورەيانىڭ ماڭىزى زور. كوپ جىلداردان بەرى قۇراما شتاتتىڭ جاڭا بيلىگى ءوزىنىڭ ساۋدا-ەكونوميكالىق قاتىناستارىن بەكەمدەپ، كەلىسىمدەردى پىسىقتاۋ ءۇشىن ءار جاڭا ۇكىمەتى الدىمەن لوندونعا، سوسىن ەۋروپانىڭ بىرقاتار ەلدەرىنە ساپارلايتىن. سوڭعى جىلدارداعى قالپىتاسقان جاھاندىق گەوساياسي جاعدايلارعا بايلانىستى بۇل ءداستۇرلى وزگەرتۋگە تۋرا كەلۋدە.

قازىر، الەمنىڭ ەكى ءىرى ەكونوميكاسى اراسىنداعى قايشىلىق اسقىنعان كۇيدە قالىپ وتىر. بۇعان ترامپ كەزىندەگى ساۋدا شەكتەۋلەرى مەن قىتايدىڭ اسقىنا تۇسكەن اگرەسسيالىق ارەكەتتەرى سەبەپ بولىپ وتىر. بايدەن جۇمىسىنا كىرىسكەننەن بەرى ەكى اي شاماسىنداعى ۋاقىت وتسە دە، ول كەيبىر ترامپ كەزىندە قابىل الىنعان قىتايعا قارسى قىسىمداردى الىپ تاستاۋعا اسىقپايتىن كورىنەدى. ول اق ۇيگە كىرمەي تۇرىپتا اقش-قىتاي قايشىلىعى ءوز كۇيىندە قالاتىنىن سايتىمىزدا بىرنەشە ساراپتامالار ارقىلى بولجاعان ەدىك. قىتايعا قارسى جوعارى تاريفتەردى ساقتاپ قالعان بايدەن ۇكىمەتى، وعان ۇستەمە رەتىندە تايۋاننىڭ دەموكراتيالىق رەجيىمىن قولداۋدا بەلسەندىلىك تە تانىتتى، وعان قوسا شىڭجاڭداعى ادام قۇقىعى، از ساندى ۇلتتارعا قاراتىلعان قىسىم جانە ءماجبۇرلى ەڭبەك ماسەلەلەرى دە ۋاشينگتوننىڭ قاباعىن سالقىنداتا ءتۇستى. بۇل ارينە، بەيجىڭنىڭ شامىنا ءتيدى.

وسىنىڭ ءبارى قوسىلا كەلىپ، قىتايدىڭ ارتىپ كەلە جاتقان سىن-قاتەرلەرى بايدەن بيلىگى ءۇشىن دە ەڭ باستى اۋىرتپاشىلىق بولىپ قابىلداندى. جانە سونىڭ ناتيجەسىندە ءۇندى جانە تىنىق مۇحيتى ايماعىنىڭ قاۋىپسىزدىگى مەن تۇراقتىلىعى، شىعىس ازيا مەن وڭتۇستىك شىعىس ازياداعى قىتاي ارەكەتىنە توسقاۋىل قويۋ قاتارلى ستراتەگيالىق قادامداردى العا جىلدىتۋىنا تۋرا كەلدى. سونىمەن مەم. دەپارتامەنت پەن پەنتاگوننىڭ جاڭا باسشىلارى سالىپ ۇرىپ توكيو مەن سەۋلگە كەلدى.

“The Qazaq Times”