Azamattıq belsendi Sanavar Zakirova jäne Qazaqstan men Euroodaq bayraqtarı. Körneki suret. Fotokollaj: aşıq derekközderden

Seysenbi küni azamattıq qoğam belsendileri Euroodaqtıñ Qazaqstandağı ökildigine barıp, memlekettik şeneunikterdiñ birqatarına jekeley sankciya salu jaylı arız tapsırdı.

Äleumettik jelidegi paraqşasında tikeley efir jürgizgen belsendilerdiñ biri Sanavar Zakirova köpşiliktiñ atınan Europarlamenttiñ Qazaqstandağı delegaciyası ğimaratına qabıldauğa kirdi. 13 adamnıñ atınan tüsirilgen arızda şeneunikter «azamattardıñ konstituciyalıq qwqığın, azamattıq jäne müliktik qwqıqtarın döreki, negizsiz türde bwzılğanı» aytılğan.

Narazılar qwqıqtıq-sot jüyesindegi «ädiletsizdikter» jaylı aytıp jürgenine az uaqıt bolmağan. Tipti keybiri «ädildik jolındağı küresi üşin jwmıstan zañsız bosatılğanına, qudalanğanına» qapalı. Olar osı uaqıtqa deyin Qazaqstannıñ bas prokuraturasına, joğarğı sotqa, prezident äkimşiligine talay märte «ädildik swrap barsa da eşqanday nätije bolmağan». Endigi jalğız ümit Europarlament deputattarı men olardıñ ötken ayda qabıldağan «Qazaqstandağı adam qwqığı ahualı jaylı qararı» dep sanaydı.

Talapker taraptıñ arasında Almatı qalalıq apellyaciyalıq sot alqasınıñ bwrınğı sud'yası Külpaş Ötemisova da bar. Ol özin Azattıq radiosınıñ tilşisine «Qazaqstandağı öziniñ ädil şeşiminiñ qwrbanı bolğan alğaşqı jäne jalğız sud'yamın» dep tanıstırdı. Ötemisova arızda Almatı qalalıq sotınıñ bwrınğı törağası, qazirgi joğarğı sottıñ azamattıq ister jönindegi alqasınıñ törağası, joğarı sottıñ bwrınğı törağası, qazirgi konstituciyalıq keñestiñ törağası, bwrınğı bas prokurordıñ atı qamtılğanın  jetkizdi.

«Men apellyaciyalıq şeşim şığararda iri öndiris oşağın tartıp alğısı kelgen biliktiñ joğarı isteblişmentiniñ müddesin közdegen öz basşılarımnıñ zañsız nwsqauına bağınbadım. Sol üşin 2013 jılı joğarğı sottıñ rezervinde twrğanımda jazıqsız küyip kettim. Sondıqtan ädildik izdep sot jüyesinde istegen jäne istep jatqan 18 adamnıñ atı-jönin jazdım», – dedi eks-sud'ya aqparat qwralına bergen pikirinde.

Azamattıq belsendi Sanavar Zakirova «sayasi sebepten» bas bostandığınan ayırılıp, täuelsiz partiya qwrmaq bolğanı üşin negizsiz qudalanğanın aytadı. Biliktiñ sayasi aşıq bäsekeden tartınatınına aşınğan belsendi «Nwr Otan» partiyasınıñ jetekşisi men lauazımdı müşelerine sankciya swrap arızdanğanın habarladı.

«Nwr Otan» partiyasınıñ törağası Nwrswltan Nazarbaev pen onıñ orınbasarı Bauırjan Baybekti atadım. Onıñ üstine joğarğı sot törağası Jaqıp Asanov, işki ister ministri Erjan Twrğımbaev ta – «Nwr Otan» partiyası müşesi. Olar partiya müddesin közdep, mağan qatıstı zañsız şeşim qabıldadı. Osı adamdar Qazaqstandağı azamattar qwqığın bwzadı, sondıqtan men «Nwr Otan» partiyasınıñ basşılığı men onıñ birqatar müşelerine sankciya saludı swradım», – deydi Zakirova Azattıqqa aytqan sözinde.

Osığan deyin qwqıq qorğauşılar «sayasi twtqın» dep tanığan Sanavar Zakirova bıltır türmege qamalıp, jartı jılğa juıq uaqıttan keyin biıl 22 qañtarda bosap şıqqan. Almatı qalası Medeu audandıq sotı onı «densaulıqqa qasaqana ziyan keltiru» babı boyınşa bostandığınan ayırğan.

11 aqpanda Europarlament «Qazaqstandağı adam qwqıqtarı jağdayı naşarlağanı turalı» qarar qabıldap, tipti sankciya qaupi jaylı bastama kötergen. 20 talaptan twratın 12 bettik qwjatqa qatıstı Sırtqı ister ministrliginiñ resmi ökili Aybek Smadiyarov QazAqparat agenttigine bergen swhbatında qararda «eldegi ahual bwrmalanğan» jäne «onı teris wstanımdağı sayasatkerler wsınğan» dep mälimdegen edi. Sol twsta sırtqı ister ministrligin aşıq debatqa şaqırğan «Ar.Ruh.Haq» qoğamdıq qorınıñ prezidenti, qwqıq qorğauşı Baqıtjan Töreğojina sankciya engizilui mümkin  Erjan Twrğımbaev bastağan tört adamnıñ keysi äzirlenip jatqanın jetkizgen.

"The Qazaq Times"