نارازىلار ەۋرووداققا نازارباەۆ، بايبەك، تۇرعىمباەۆ باستاعان شەنەۋنىكتەرگە سانكتسيا سالۋ تۋرالى ارىز تاپسىردى

سەيسەنبى كۇنى ازاماتتىق قوعام بەلسەندىلەرى ەۋرووداقتىڭ قازاقستانداعى وكىلدىگىنە بارىپ، مەملەكەتتىك شەنەۋنىكتەردىڭ بىرقاتارىنا جەكەلەي سانكتسيا سالۋ جايلى ارىز تاپسىردى.

الەۋمەتتىك جەلىدەگى پاراقششاسىندا تىكەلەي ەفير جۇرگىزگەن بەلسەندىلەردىڭ ءبىرى ساناۆار زاكيروۆا كوپشىلىكتىڭ اتىنان ەۋروپارلامەنتتىڭ قازاقستانداعى دەلەگاتسياسى عيماراتىنا قابىلداۋعا كىردى. 13 ادامنىڭ اتىنان تۇسىرىلگەن ارىزدا شەنەۋنىكتەر «ازاماتتاردىڭ كونستيتۋتسيالىق قۇقىعىن، ازاماتتىق جانە مۇلىكتىك قۇقىقتارىن دورەكى، نەگىزسىز تۇردە بۇزىلعانى» ايتىلعان.

نارازىلار قۇقىقتىق-سوت جۇيەسىندەگى «ادىلەتسىزدىكتەر» جايلى ايتىپ جۇرگەنىنە از ۋاقىت بولماعان. ءتىپتى كەيبىرى «ادىلدىك جولىنداعى كۇرەسى ءۇشىن جۇمىستان زاڭسىز بوساتىلعانىنا، قۋدالانعانىنا» قاپالى. ولار وسى ۋاقىتقا دەيىن قازاقستاننىڭ باس پروكۋراتۋراسىنا، جوعارعى سوتقا، پرەزيدەنت اكىمشىلىگىنە تالاي مارتە «ادىلدىك سۇراپ بارسا دا ەشقانداي ناتيجە بولماعان». ەندىگى جالعىز ءۇمىت ەۋروپارلامەنت دەپۋتاتتارى مەن ولاردىڭ وتكەن ايدا قابىلداعان «قازاقستانداعى ادام قۇقىعى احۋالى جايلى قارارى» دەپ سانايدى.

تالاپكەر تاراپتىڭ اراسىندا الماتى قالالىق اپەللياتسيالىق سوت القاسىنىڭ بۇرىنعى سۋدياسى كۇلپاش وتەمىسوۆا دا بار. ول ءوزىن ازاتتىق راديوسىنىڭ تىلشىسىنە «قازاقستانداعى ءوزىنىڭ ءادىل شەشىمىنىڭ قۇربانى بولعان العاشقى جانە جالعىز سۋديامىن» دەپ تانىستىردى. وتەمىسوۆا ارىزدا الماتى قالالىق سوتىنىڭ بۇرىنعى توراعاسى، قازىرگى جوعارعى سوتتىڭ ازاماتتىق ىستەر جونىندەگى القاسىنىڭ توراعاسى، جوعارى سوتتىڭ بۇرىنعى توراعاسى، قازىرگى كونستيتۋتسيالىق كەڭەستىڭ توراعاسى، بۇرىنعى باس پروكۋروردىڭ اتى قامتىلعانىن  جەتكىزدى.

«مەن اپەللياتسيالىق شەشىم شىعاراردا ءىرى ءوندىرىس وشاعىن تارتىپ العىسى كەلگەن بيلىكتىڭ جوعارى يستەبليشمەنتىنىڭ مۇددەسىن كوزدەگەن ءوز باسشىلارىمنىڭ زاڭسىز نۇسقاۋىنا باعىنبادىم. سول ءۇشىن 2013 جىلى جوعارعى سوتتىڭ رەزەرۆىندە تۇرعانىمدا جازىقسىز كۇيىپ كەتتىم. سوندىقتان ادىلدىك ىزدەپ سوت جۇيەسىندە ىستەگەن جانە ىستەپ جاتقان 18 ادامنىڭ اتى-ءجونىن جازدىم»، – دەدى ەكس-سۋديا اقپارات قۇرالىنا بەرگەن پىكىرىندە.

ازاماتتىق بەلسەندى ساناۆار زاكيروۆا «ساياسي سەبەپتەن» باس بوستاندىعىنان ايىرىلىپ، تاۋەلسىز پارتيا قۇرماق بولعانى ءۇشىن نەگىزسىز قۋدالانعانىن ايتادى. بيلىكتىڭ ساياسي اشىق باسەكەدەن تارتىناتىنىنا اشىنعان بەلسەندى «نۇر وتان» پارتياسىنىڭ جەتەكشىسى مەن لاۋازىمدى مۇشەلەرىنە سانكتسيا سۇراپ ارىزدانعانىن حابارلادى.

«نۇر وتان» پارتياسىنىڭ توراعاسى نۇرسۇلتان نازارباەۆ پەن ونىڭ ورىنباسارى باۋىرجان بايبەكتى اتادىم. ونىڭ ۇستىنە جوعارعى سوت توراعاسى جاقىپ اسانوۆ، ىشكى ىستەر ءمينيسترى ەرجان تۇرعىمباەۆ تا – «نۇر وتان» پارتياسى مۇشەسى. ولار پارتيا مۇددەسىن كوزدەپ، ماعان قاتىستى زاڭسىز شەشىم قابىلدادى. وسى ادامدار قازاقستانداعى ازاماتتار قۇقىعىن بۇزادى، سوندىقتان مەن «نۇر وتان» پارتياسىنىڭ باسشىلىعى مەن ونىڭ بىرقاتار مۇشەلەرىنە سانكتسيا سالۋدى سۇرادىم»، – دەيدى زاكيروۆا ازاتتىققا ايتقان سوزىندە.

وسىعان دەيىن قۇقىق قورعاۋشىلار «ساياسي تۇتقىن» دەپ تانىعان ساناۆار زاكيروۆا بىلتىر تۇرمەگە قامالىپ، جارتى جىلعا جۋىق ۋاقىتتان كەيىن بيىل 22 قاڭتاردا بوساپ شىققان. الماتى قالاسى مەدەۋ اۋداندىق سوتى ونى «دەنساۋلىققا قاساقانا زيان كەلتىرۋ» بابى بويىنشا بوستاندىعىنان ايىرعان.

11 اقپاندا ەۋروپارلامەنت «قازاقستانداعى ادام قۇقىقتارى جاعدايى ناشارلاعانى تۋرالى» قارار قابىلداپ، ءتىپتى سانكتسيا قاۋپى جايلى باستاما كوتەرگەن. 20 تالاپتان تۇراتىن 12 بەتتىك قۇجاتقا قاتىستى سىرتقى ىستەر مينيسترلىگىنىڭ رەسمي وكىلى ايبەك سمادياروۆ قازاقپارات اگەنتتىگىنە بەرگەن سۇحباتىندا قاراردا «ەلدەگى احۋال بۇرمالانعان» جانە «ونى تەرىس ۇستانىمداعى ساياساتكەرلەر ۇسىنعان» دەپ مالىمدەگەن ەدى. سول تۇستا سىرتقى ىستەر مينيسترلىگىن اشىق دەباتقا شاقىرعان «ار.رۋح.حاق» قوعامدىق قورىنىڭ پرەزيدەنتى، قۇقىق قورعاۋشى باقىتجان تورەعوجينا سانكتسيا ەنگىزىلۋى مۇمكىن  ەرجان تۇرعىمباەۆ باستاعان ءتورت ادامنىڭ كەيسى ازىرلەنىپ جاتقانىن جەتكىزگەن.

"The Qazaq Times"