Narazılıq belgisi retinde bir aptadan beri astana äkimdiginde tünep jatqan analardıñ Qazaqstan prezidentterine jazğan aşıq hatı men bıltır 16 jeltoqsanda Almatı qalasında ötken mitingte policeymen tildesip twrğan jürginşi. Fotokollaj: QT

Äleumettik jağdaydı jaqsartudı talap etken bir top astana äkimdiginde bir apta boyı tünep keledi. Köp balalı, mügedek balası bar, jalğızbastı analar jeti künnen beri elorda äkimi Kölginov pen jañadan saylanğan Mäjilistiñ VII şaqırılım deputattarı aldına şıqpağan soñ Qazaqstannıñ aldıñğı jäne qazirgi prezidentteri Nazarbaev jäne Toqaevqa ündeu jasadı. Äkimdikti uaqıtşa twraq etkender negizgi üş talabı barın aytadı. Olar:  «Ana men bala kapitalı» retinde otbasına tabısına qaramay är balağa 42,5 mıñ teñge tağayındau, Konstituciya boyınşa (25-bap) äleumettik osal top otbasıların baspana-twrğın üymen qamtu jäne «halıq ızasın tudırğan dästürli-wlttıq mädenietke qayşı» bala qwqığı turalı zañ jobasın («Otbasılıq-twrmıstıq zorlıq-zombılıqqa qarsı is-qimıl turalı» zañ jobası – QT) qaralımnan alıp tastau. Bügingi tañğa deyin Ükimet ne Parlamentten lauazımdı şeneunikterdiñ birde-biri analardıñ aldına şıqpağan. Düysenbi-jwma künderi aralığında äkim keñesşileri men atqaruşı mamandar mämilege keluge tırısqan. Alayda  «qwrğaq uäde qajıtqanın» aytıp, jazbaşa ötiniş jazudan «eş qayır joğın» alğa tartqan analar mäselege Aqorda-Kitaphananıñ, zañ şığaruşı organ men ükimet qwramınıñ nazarın audartudı közdeydi.

Narazı äyelderdiñ aytuınşa, äkimdik qızmetkerleri olarğa ğimaratta dezinfekciya jüretinin aytıp, üyine qaytu keregin eskertken. Sonday-aq, akciya qatısuşıları wyalı telefondarın tıñdauğa jäne tuıstarına eskertu mänindegi qoñırauıñ jiilegenine qarsı.

Astana äkimdigindegi narazı analardıñ Nazarbaev pen Toqaevqa jazğan aşıq hatı. Foto: Facebook

Osı jwmada oppoziciyalıq wyımdardıñ 28 aqpanğa josparlanğan mitingileri qarsañında bas prokurordıñ orınbasarı Bolat Dembaev ädetinşe şaranı zañsız dep atap, jwrttı narazılıqqa şıqpauğa şaqırdı. Ol  mälimdemesinde «äleumettik jelide jekelegen adamdar eldiñ är aymağında zañsız mitingige şaqırıp jatır» dedi.

Dembaev 2020 jılı 25 mamırda Qazaqstanda «Beybit miting turalı» jaña zañ qabıldanğanın, bwl zañğa say wyımdastıruşılar jergilikti äkimdikke aldın ala eskertui tiis ekenin aytadı. Degenmen bilik Qazaqstannıñ är aymağındağı belsendilerdiñ jeksenbide miting ötkizu maqsatımen äkimdikterge bergen ötinişine Oral qalasınan özge öñirler «rwqsat etpegen».

Bas prokurordıñ orınbasarı Dembaev 28 aqpanda ötui ıqtimal mitingige qatısatındar zañğa say jauapqa tartılatının aytıp, eskertu jasadı. Sonımen qatar, Almatı qalası äkimdigi miting ornı retinde jariyalanğan  jerlerdegi ayaldamalarda 28 aqpanda jöndeu jwmıstarı bolatının, sol mañdarda qoğamdıq kölikter jürmeytinin habarladı.

Bwğan deyin qwqıq qorğauşılar «sayasi twtqın» dep tanığan, 2016 jılğı Jer mitingisinen keyin bes jılğa sottalıp, biıl aqpanda qamaudan şıqqan belsendi Maks Boqaev 28 aqpanda mitingige şığatının mälimdegen. Osıdan soñ quğındağı eks-bankir, oppoziciyalıq sayasatker, sot qızmetine tıyım salınğan «Qazaqstannıñ demokratiyalıq tañdauı» qozğalısınıñ jetekşisi Mwhtar Äblyazov (sağ. 13.00-ge) pen «Dempartiya» bastamaşıl tobınıñ jetekşisi Janbolat Mamay (sağ. 12.00-ge) jwrttı mitingige şaqırğan. Eki top ta bilikten sayasi twtqındardı bosatudı, baspana mäselesin şeşudi, Europarlamenttiñ Qazaqstandağı adam qwqığına qatıstı qabıldağan qararındağı talaptardı orındaudı talap etuge ündeydi.

“The Qazaq Times”