سوت بوقاەۆتىڭ ءجۇرىپ-تۇرۋىن شەكتەدى: «پوليتسيا رۇقساتىنسىز قالادان شىقپايدى»

18 اقپاندا اتىراۋ قالاسىنىڭ №2 سوتى بەلسەندى ماكس بوقاەۆقا ءۇش جىلعا اكىمشىلىك قاداعالاۋ ورناتۋ بويىنشا ءتورت شەكتەۋ قويدى. 2016 جىلعى جەر ميتينگىلەرىنەن كەيىن 5 جىلعا سوتتالىپ، 4 اقپاندا قاماۋدان شىققان بوقاەۆتى قاداعالاۋدى اتىراۋ قالاسى پوليتسيا دەپارتامەنتى ۇسىنعان. بۇل تۋرالى ازاتتىق راديوسى حابارلادى.

بۇل – بوقاەۆقا قويىلعان ەكىنشى اكىمشىلىك شەكتەۋ. بۇعان دەيىن اتىراۋداعى سوت اتىراۋ وبلىستىق قىلمىستىق اتقارۋ جۇيەسى دەپارتامەنتىنىڭ ءوتىنىشى بويىنشا بوقاەۆقا ءۇش جىل اكىمشىلىك قاداعالاۋ تاعايىنداعان. بەلسەندى بۇل شەكتەۋگە اپەللياتسيالىق شاعىم تۇسىرگەنىمەن، اتىراۋ وبلىستىق سوتى قاناعاتتاندىرمادى.

اتىراۋ قالاسى پوليتسيا دەپارتامەنتى سوتتان بوقاەۆقا جەتى شەكتەۋ قويۋدى سۇراعان ەدى. ولار “باس بوستاندىعىنان ايىرۋ ورىندارىنان بوساتىلعان ادامداردى اكiمشiلiك قاداعالاۋ تۋرالى” زاڭعا سۇيەنىپ، ارىزدانعان. سۋديا داۋرەنبەك داۋموۆ دەپارتامەنتتىڭ ءتورت ۇسىنىسىن قاناعاتتاندىردى.

سوت شەشىمىنە ساي. بوقاەۆقا ءۇش جىلعا مىنانداي شەكتەۋلەر قويىلدى:

• اكىمشىلىك باقىلاۋ جۇرگىزەتىن پوليتسيا باسشىلىعىنىڭ جازباشا رۇقساتىنسىز جەكە نە شارۋالارىمەن اتىراۋ قالاسىنان شىعۋعا تىيىم سالىندى;
• جۇمىس كۇندەرى تۇنگى وننان تاڭعى التىعا دەيىن جانە مەرەكە مەن دەمالىس كۇندەرى جۇمىسقا قاتىستى مىندەتتەمەسىنەن بولەك تۇرعىلىقتى جەرىنەن شىعۋىنا تىيىم سالىندى;
• كوشەلەردە، الاڭداردا، باقتار مەن سكۆەرلەردە، كوڭىل كوتەرەتىن نىسانداردا جانە باسقا دا قوعامدىق ورىنداردا قوعامدىق ماڭىزى بار ماسەلەلەردى تالقىلاۋ مەن پىكىر بىلدىرۋگە تىيىم سالىندى;

اكىمشىلىك باقىلاۋ مەرزىمى ىشىندە پوليتسيا ورگاندارى بەكىتكەن ۋاقىتتا تىركەلۋ ءۇشىن اتىراۋ قالالىق پوليتسيا باسقارماسىنا ايىنا ءبىر رەت بەلگىلەنۋى ءتيىس.

سوت “اتا-اناسى نە زاڭدى وكىلىنىڭ رۇقساتىنسىز جاسوسپىرىمدەرمەن ارالاسۋىنا، ولارمەن تەلەفون نە باسقا تاسىلمەن حابارلاسۋىنا بولمايدى” جانە “ىشىمدىك ىشۋگە، ەسىرتكى، پسيحوتروپ زاتتاردى قولدانۋعا تىيىم سالۋ” دەگەن ەكى شەكتەۋدى قولدامادى.

بۇعان قوسا، سوت پوليتسيانىڭ “بوقاەۆ ايىنا پوليتسياعا ءۇش رەت كەلىپ بەلگىلەنۋى ءتيىس” دەگەن ۇسىنىسىنا “ايىنا ءبىر رەت كەلىپ تىركەلسە جەتكىلىكتى” دەپ تاپتى. سوت شەشىمى كۇشىنە ەنگەن جوق، قوس تاراپتىڭ اپەللياتسيالىق شاعىم تۇسىرۋگە قۇقىعى بار. ال قىلمىستىق كودەكستىڭ 431-بابىندا اكىمشىلىك قاداعالاۋدى بۇزعاندارعا ءبىر جىل باس بوستاندىعىنان ايىرۋ يا شەكتەۋ جازاسى قاراستىرىلعان.

بوقاەۆ سوتتا جازانى وتەپ شىققانىن، بۇل شەكتەۋلەردىڭ نەگىزسىز ەكەنىن ايتتى. بەلسەندى ازاتتىققا ادۆوكاتى جانار سۇندەتقاليەۆامەن اقىلداسىپ، اپپەلياتسيالىق شاعىم تۇسىرەتىنىن، الداعى ۋاقىتتا بۇۇ ادام قۇقىعى كوميتەتىنە دە شاعىمداناتىنىن جەتكىزدى.

“The Qazaq Times”