Mädeniet jäne sport vice-ministri Erlan Qojağappanov eldegi sport federaciyaların oligrahtar basqarğannan eş ziyan joq dep esepteydi. Bwl turalı ol 13 tamız küni Tokio olimpiadasınıñ qorıtındısına baylanıstı ötken brifing kezinde ayttı. 

– Sport federaciyaların bizdiñ käsipkerler basqarğannan eşqanday ziyan joq. Birinşiden, olar öz qarjatın saladı. Köp män beredi, – dedi vice-ministr.

Onıñ aytuına qarağanda, sport federaciyalaranıñ prezidenti saylau araqılı tañdaladı.

– Federaciya törağaların qoğam tağayındaydı. Saylau boladı. Saylauğa bükil oblıs federaciyaları qatısadı. Kandidattar öz bağdarlamaların tüsindirip beredi. Saylau nätijesinde är federaciyanıñ basşısı tağayındaladı, – dedi Qojağappanov.

Bwğan qosa, ol sport komiteti federaciyalardıñ barlığımen tığız baylanısta jwmıs istep jatqanın jetkizdi.

– Sport kommitetiniñ fedaraciyalarmen qarım-qatınası öte tığız. Künde söylesip twradı. Ay sayın tıñdau jasaydı. Federaciyalar bizge keledi. Biz qanday proces bolıp jatqanın, äsirese, sport jarıstarınıñ küntizbesin qaraymız. Qarjat mäselelerin qaraymız. Bärin baqılauda wstaymız, – dedi Qojağappanov.

Al 12 tamızda bergen swhbatında boks federaciyasınıñ vice-prezidenti, bokstan Afina olimpiadasınıñ çempionı Baqtiyar Artaev sport komiteti men sport federaciyaları arasında tığız baylanıs joq ekenin aytqan.

Qazaqstandağı sport federaciyalarınıñ birazın özge saladağı şeneunikter men oligartar basqaradı. Mısalı, Wlttıq olimpiada kommitetiniñ törağası – Qazaqstannıñ eks-prezidenti Nwrswltan Nazarbaevtıñ küyeu balası, oligarh Timur Qwlıbaev, boks federaciyasınıñ prezidenti käsipker Keñes Raqışev, küres federaciyasınıñ basşısı "Qazaqstan temir jolı" AQ-nıñ eks-törağası Sauat Mıñbaev, dzyudo federaciyasınıñ prezidenti senat deputatı Qayrat Qojamjarov, jeñil atletika federaciyasınıñ prezidenti Şığıs Qazaqstan oblısınıñ äkimi Danial Ahmetov, voleybol federaciyasınıñ prezidenti WQK-niñ eks-törağası Nwrtay Äbiqaev.

Sport federaciyalaranıñ barlığına derlik joğarı biliktegi şeneunikter jäne oligarhtar basşılıq etetin Qazaqstan Tokio olimpiadasında 8 qola medal' alıp, jalpı esepte 83-orınnan körindi.

The Qazaq Times