Baybolat Künbolatwlı bauırına bostandıq swrap jürgenine az bolğan joq. Foto: belsendiniñ Facebook jelisindegi paraqşasınan

Küni keşe Qıtaydıñ Almatıdağı konsuldığınıñ aldında narazılıq akciyasın ötkizgen Baybolat Künbolatwlı 10 künge qamaldı.

Qalalıq  mamandandırılğan audanaralıq sotı belsendige 9 aqpan küni Qıtay konsuldığı aldında rwqsat etilmegen «zañsız» piketke şıqqanı üşin Äkimşilik kodekstiñ 488-bap 6-tarmağı («Beybit jiın ötkizu  tärtibi») boyınşa qamau turalı şeşim şığarğan.

Osığan deyin Künbolatwlı 2018 jılı Qıtayda belgisiz sebeppen 10 jılğa sottalğan bauırı jaylı aytıp, konsuldıq aldında 1 aqpanda jalğız adamdıq piket ötkizgen edi. Sol kezde sot tarapınan oğan eskertu berilgen.

Aqpannıñ 10-ı, bügin inisin bosatudı talap etken Baybolat Künbolatwlınıñ  60 jastağı anası Zauathan Twrsın qatarlı bir top adam qarsılıq akciyasın ötkizdi. Bügingi narazılıqqa Künbolatwlınıñ anasınan özge Şıñjañda qamalğan nemese Qazaqstanğa qayta öte almay otırğan qazaqtardıñ tuıstarı da qatıstı. Bäriniñ talabı ortaq – Qıtayda jazıqsız qamalğan jaqındarınıñ bosatu.

"Aşınğan ana" Zauathan Twrsın Qıtay türmesinde otırğan wlı Baymwrat Naurızbekwlı men piket ötkizgeni üşin Qazaqstanda qamalğan wlı Baybolat Künbolatwlın bosatudı talap etip kelgen. Almatı, 10 aqpan 2021 jıl. Foto: Azattıq Radiosı / Ayan Qalmwrat

Däl osığan wqsas tuısınan habar-oşarsız qalıp, jağdayına alañdağan azamattar keyingi birneşe kün boyı Qıtay elşiligine bazınasın jetkizuge jinaldı. Seysenbi küni narazılıqqa şıqqan 8 adamnıñ biri Künbolatwlın keşkisin policiya üyinen alıp ketken.

«Qıtay genocidin toqtatudı» talap etken azamattar şekaranıñ arğı betinde negisiz wzaq jıldarğa sottalğan tuıstarın tez arada bosatu jäne elge jiberudi swraydı. Naqaq qamalıp otır delingen jandardıñ arasında Qazaqstan azamattarı da bar. Qwzırlı organdar olar memleket qorğauında ekenin aytqanımen, bilik azamattarı men qandastarımızğa araşa boludıñ ornına, osındağı narazılardı jauapqa tartıp älek.

Qıtay aymağı Şıñjañdağı sayasi lager'ler jönindegi aqpar alğaş 2017 jılı taray bastağan. Älemdik BAQ betterinde Beyjiñ «qayta tärbieleu ortalığı» ataytın lager'lerde wyğır, qazaq tärizdi azşılıq wlt ökilderi jappay qısım körip, qamalıp jatqanı turalı jazılıp keledi. BWW 2018 jılı jariyalağan esebinde Şıñjañdağı lager'lerde bir millionğa juıq mwsılman otırğanı aytılğan. AQŞ-tıñ aldıñğı memlekettik hatşısı Mayk Pompeo «genocid» retinde bağalağan. Alayda QHR özine qatıstı aytılğan sın-ayıptardıñ barlığın joqqa şığaradı.

"The Qazaq Times"