Qıtay biligi Şıñjañdağı türkitildes mwsılmandardıñ qwqığın bwzudı jalğastırıp jatır. Bwl jöninde Human Rights Watch (HRW) halıqaralıq adam qwqıqtarın qorğau wyımı mälimdedi.
– Bıltırdan beri qıtay şeneunikteri wyğırlar men basqa da türkitildes mwsılmandardı basıp-janşu sayasatın jalğastırıp keledi. BWW-ğa müşe elder adamzatqa qarsı qılmısqa köz jwmbauı tiis, – dedi wyımnıñ Aziya boyınşa direktorınıñ orınbasarı Mayya Vang.
Halıqaralıq wyımdardıñ dereginşe, Qıtay biligi 2017 jıldan beri Şıñjañda twratın wyğır, qazaq, qırğız jäne basqa da mwsılmandarğa qısım jasap keledi. Pekin Şıñjañ halqın jappay lager'ge qamap, küştep jwmısqa jegip, äyelderdi sterilizaciya jasap jatqanı aytılğan.
HRW «Qıtay basşısı Si Czin'pinniñ Şıñjañda antiterroristik sayasattı jalğastıru jaylı aytqan mälimdemesi aymaqta äli de adamzatqa qarsı sayasattı jalğastırıp jatqanın körsetedi» dep mälimdedi.
Si Czin'pin 26 tamızda Şıñjañğa saparı kezinde «terrorizm men separatizmge qarsı küresti äleumettik damu jwmıstarımen jäne zañnıñ üstemdigimen biriktiru kerek» dep mälimdegen. Ol Şıñjañ şeneunikterine «islamdı qıtaylandıru sayasatın äriqaray jalğastırudı» jäne «zañsız dini äreketterdi baqılauda wstaudı» tapsırğan.
2017 jılı Şıñjañda twratın qazaqtardıñ jağdayı kürt qiındap, olar Qıtay biliginiñ qısımı jaylı ayta bastadı. Şıñjañda tuısımız qamaldı degen qazaqtardıñ sözinen keyin bwl mäselege halıqaralıq wyımdardıñ nazarı audı.
AQŞ memlekettik departamenti Şıñjañda eki millionğa juıq wyğır, qazaq jäne basqa da mwsılmandar qamauğa alınğanın mälimdegen.
