قىتايداعى باۋىرىنا اراشا سۇراپ قامالعان كۇنبولاتۇلىنىڭ اناسى ەلشىلىك الدىنا كەلدى

كۇنى كەشە قىتايدىڭ الماتىداعى كونسۋلدىعىنىڭ الدىندا نارازىلىق اكتسياسىن وتكىزگەن بايبولات كۇنبولاتۇلى 10 كۇنگە قامالدى.

قالالىق  مامانداندىرىلعان اۋدانارالىق سوتى بەلسەندىگە 9 اقپان كۇنى قىتاي كونسۋلدىعى الدىندا رۇقسات ەتىلمەگەن «زاڭسىز» پيكەتكە شىققانى ءۇشىن اكىمشىلىك كودەكستىڭ 488-باپ 6-تارماعى («بەيبىت جيىن وتكىزۋ  تارتىبى») بويىنشا قاماۋ تۋرالى شەشىم شىعارعان.

وسىعان دەيىن كۇنبولاتۇلى 2018 جىلى قىتايدا بەلگىسىز سەبەپپەن 10 جىلعا سوتتالعان باۋىرى جايلى ايتىپ، كونسۋلدىق الدىندا 1 اقپاندا جالعىز ادامدىق پيكەت وتكىزگەن ەدى. سول كەزدە سوت تاراپىنان وعان ەسكەرتۋ بەرىلگەن.

اقپاننىڭ 10-ى، بۇگىن ءىنىسىن بوساتۋدى تالاپ ەتكەن بايبولات كۇنبولاتۇلىنىڭ  60 جاستاعى اناسى زاۋاتحان تۇرسىن قاتارلى ءبىر توپ ادام قارسىلىق اكتسياسىن وتكىزدى. بۇگىنگى نارازىلىققا كۇنبولاتۇلىنىڭ اناسىنان وزگە شىڭجاڭدا قامالعان نەمەسە قازاقستانعا قايتا وتە الماي وتىرعان قازاقتاردىڭ تۋىستارى دا قاتىستى. ءبارىنىڭ تالابى ورتاق – قىتايدا جازىقسىز قامالعان جاقىندارىنىڭ بوساتۋ.

"اشىنعان انا" زاۋاتحان تۇرسىن قىتاي تۇرمەسىندە وتىرعان ۇلى بايمۇرات ناۋرىزبەكۇلى مەن پيكەت وتكىزگەنى ءۇشىن قازاقستاندا قامالعان ۇلى بايبولات كۇنبولاتۇلىن بوساتۋدى تالاپ ەتىپ كەلگەن. الماتى، 10 اقپان 2021 جىل. فوتو: ازاتتىق راديوسى / ايان قالمۇرات

ءدال وسىعان ۇقساس تۋىسىنان حابار-وشارسىز قالىپ، جاعدايىنا الاڭداعان ازاماتتار كەيىنگى بىرنەشە كۇن بويى قىتاي ەلشىلىگىنە بازىناسىن جەتكىزۋگە جينالدى. سەيسەنبى كۇنى نارازىلىققا شىققان 8 ادامنىڭ ءبىرى كۇنبولاتۇلىن كەشكىسىن پوليتسيا ۇيىنەن الىپ كەتكەن.

«قىتاي گەنوتسيدىن توقتاتۋدى» تالاپ ەتكەن ازاماتتار شەكارانىڭ ارعى بەتىندە نەگىسىز ۇزاق جىلدارعا سوتتالعان تۋىستارىن تەز ارادا بوساتۋ جانە ەلگە جىبەرۋدى سۇرايدى. ناقاق قامالىپ وتىر دەلىنگەن جانداردىڭ اراسىندا قازاقستان ازاماتتارى دا بار. قۇزىرلى ورگاندار ولار مەملەكەت قورعاۋىندا ەكەنىن ايتقانىمەن، بيلىك ازاماتتارى مەن قانداستارىمىزعا اراشا بولۋدىڭ ورنىنا، وسىنداعى نارازىلاردى جاۋاپقا تارتىپ الەك.

قىتاي ايماعى شىڭجاڭداعى ساياسي لاگەرلەر جونىندەگى اقپار العاش 2017 جىلى تاراي باستاعان. الەمدىك باق بەتتەرىندە بەيجىڭ «قايتا تاربيەلەۋ ورتالىعى» اتايتىن لاگەرلەردە ۇيعىر، قازاق ءتارىزدى ازشىلىق ۇلت وكىلدەرى جاپپاي قىسىم كورىپ، قامالىپ جاتقانى تۋرالى جازىلىپ كەلەدى. بۇۇ 2018 جىلى جاريالاعان ەسەبىندە شىڭجاڭداعى لاگەرلەردە ءبىر ميلليونعا جۋىق مۇسىلمان وتىرعانى ايتىلعان. اقش-تىڭ الدىڭعى مەملەكەتتىك حاتشىسى مايك پومپەو «گەنوتسيد» رەتىندە باعالاعان. الايدا قحر وزىنە قاتىستى ايتىلعان سىن-ايىپتاردىڭ بارلىعىن جوققا شىعارادى.

"The Qazaq Times"