"Sayasi twtqın" Maks Boqaev jer mitingisinde. Atırau. 24 säuir 2016 jıl. Foto: Azattıq radiosı / Säniya Toyken

Bügin 4 aqpanda Atıraudağı UG-157/9 mekemesinen belsendi Maks Boqaev bosap şıqtı. 2016 jılğı Qazaqstan halqın ayağınan tik twrğızıp, sol kezdegi prezident Nazarbaevtı zañğa moratoriy engizuge mäjbür etken jer dauınan keyin 5 jıl türmede otırğan «sayasi twtqın» Maks Boqaevtı abaqtı qaqpasınan jaqtastarı men jurnalister kütip aldı. Belsendi elge aldağı josparın jetkizdi.

Bwğan deyin qamaudan şıqqannan boyda birden alañğa baratının aytqan Maks Boqaev bosatılardan bir kün bwrın Azattıqqa «sottıñ qaulı şığarıp, özine mitingige baruğa, äleumettik jeli qoldanuğa tıyım salğanın» habarlağan. Bügin bwl sözin qayta quattadı:

«2016 jılı 2 aqpanda Talğat ekeuimizge ükim şığarğan sud'ya qosımşa qaulısında qoğamdıq jwmıstarğa aralasuğa tıyım salğan edi. Debat, teleköpir, beybit jinalıs, telebağdarlamalarğa qatısuımdı şektegen», – dedi.

Onı qarsı aluğa Dempartiyanıñ bastamaşıl tobınıñ ökilderi men jetekşisi Janbolat Mamay, eldiñ är aymağınan azamattıq belsendiler keldi. Halıqaralıq jäne eldegi qwqıq qorğauşılar «sayasi twtqın» retinde tanığan belsendi jinalğandardıñ aldında aldağı josparı men sayasi talabı turalı arnayı söz söyledi. Qazaqstan halqın narazılıqqa belsendi türde qatısuğa şaqırdı.

;t=11s

«Mağan tıyım salsa da qoğamdıq jwmısımdı jalğastıra beremin. Men 28 aqpan, 7, 14, 21, 28 naurız künderi mitingke şığamız. Eger Ükimet talabımızğa qwlaq aspasa, 3 säuirden bastap alañdarğa şatır tigip, narazılıqtı jalğastıru kerek. «Nazarbaev – zeynetke, Dariğa – Londonğa, Qajıgeldin men Äblyazov – astanağa, Bergey – Atırauğa, Dempartiya – mäjiliske» degen formula wsınamın. Mäjilis saylauın biıl qayta ötkizu kerek. Prezident Toqaev «halıqtıñ ünine qwlaq assa», Atırauğa kelsin. Wlttıq ımıra jasasayıq», – dep mälimdedi Boqaev.

Sonımen qosa, ol osı uaqıtqa deyin özine qoldau bildergen jaqtastarı men köpşilikke alğısın bildirdi.

«Anamdı, meni, bauırlarımdı, Talğattı qoldağanı üşin barlıq elge, şeteldegi janaşırlar men halıqaralıq wyımdarğa raqmet. Halıqtıñ qoldauı bolmağanda meni joq qılıp jiberuşi edi», – dedi.

"Sayasi twtqın" atanğan Maks Boqaev jaqtastarınıñ ortasında. Foto: Facebook / Janbolat Mamaydıñ paraqşasınan

Jinalğandar Isatay-Mahambet alañına berıp seyil qwrıp qaytuğa bet aldı. Boqaevtıñ aytuınşa, bügingi josparında anasına barıp sälem berip, respublikanıñ är aymağınan kelgen belsendilermen dastarhan basında bas qospaq.

Ol 2016 jılğı küzden beri türmede otırğan. Atırauda mıñdağan adam alañğa jinaluımen bastalğan narazılıq jalpıhalıqtıq sipat alıp, özge aymaqtarda jalğasqan. Halıq jerdi şeteldikterge jalğa beruge jappay qarsılıq bildirgennen keyin jer komissiyası qwrılğan, nätijesinde  bilik şeteldikterge jalğa beruge uaqıtşa moratoriy jariyalağan. Eldiñ sanasın serpiltken mitingte közge tüsken atıraulıq belsendiler – Maks Boqaev pen Talğat Ayan sottaldı, ärqaysı bes jıldan arqaladı. Olarğa «äleumettik arazdıq tudırdı», «jalğan aqparat tarattı» jäne «miting ötkizu zañdarın bwzdı» degen ayıptar tağıldı. Sot 2018 jılı säuirde Ayannıñ ötinişi boyınşa onı qamaudan, keyinnen jazadan tolıqtay bosatqan. Maks Boqaev «qamaudan uaqıtınan bwrın şığuğa swranbaytının, özin tolıq aqtaudı talap etetinin» mälimdegen.

“The Qazaq Times”