بۇگىن 4 اقپاندا اتىراۋداعى ۋگ-157/9 مەكەمەسىنەن بەلسەندى ماكس بوقاەۆ بوساپ شىقتى. 2016 جىلعى قازاقستان حالقىن اياعىنان تىك تۇرعىزىپ، سول كەزدەگى پرەزيدەنت نازارباەۆتى زاڭعا موراتوري ەنگىزۋگە ءماجبۇر ەتكەن جەر داۋىنان كەيىن 5 جىل تۇرمەدە وتىرعان «ساياسي تۇتقىن» ماكس بوقاەۆتى اباقتى قاقپاسىنان جاقتاستارى مەن جۋرناليستەر كۇتىپ الدى. بەلسەندى ەلگە الداعى جوسپارىن جەتكىزدى.
بۇعان دەيىن قاماۋدان شىققاننان بويدا بىردەن الاڭعا باراتىنىن ايتقان ماكس بوقاەۆ بوساتىلاردان ءبىر كۇن بۇرىن ازاتتىققا «سوتتىڭ قاۋلى شىعارىپ، وزىنە ميتينگىگە بارۋعا، الەۋمەتتىك جەلى قولدانۋعا تىيىم سالعانىن» حابارلاعان. بۇگىن بۇل ءسوزىن قايتا قۋاتتادى:
«2016 جىلى 2 اقپاندا تالعات ەكەۋىمىزگە ۇكىم شىعارعان سۋديا قوسىمشا قاۋلىسىندا قوعامدىق جۇمىستارعا ارالاسۋعا تىيىم سالعان ەدى. دەبات، تەلەكوپىر، بەيبىت جينالىس، تەلەباعدارلامالارعا قاتىسۋىمدى شەكتەگەن»، – دەدى.
ونى قارسى الۋعا دەمپارتيانىڭ باستاماشىل توبىنىڭ وكىلدەرى مەن جەتەكشىسى جانبولات ماماي، ەلدىڭ ءار ايماعىنان ازاماتتىق بەلسەندىلەر كەلدى. حالىقارالىق جانە ەلدەگى قۇقىق قورعاۋشىلار «ساياسي تۇتقىن» رەتىندە تانىعان بەلسەندى جينالعانداردىڭ الدىندا الداعى جوسپارى مەن ساياسي تالابى تۋرالى ارنايى ءسوز سويلەدى. قازاقستان حالقىن نارازىلىققا بەلسەندى تۇردە قاتىسۋعا شاقىردى.
;t=11s«ماعان تىيىم سالسا دا قوعامدىق جۇمىسىمدى جالعاستىرا بەرەمىن. مەن 28 اقپان، 7, 14, 21, 28 ناۋرىز كۇندەرى ميتينگكە شىعامىز. ەگەر ۇكىمەت تالابىمىزعا قۇلاق اسپاسا، 3 ساۋىردەن باستاپ الاڭدارعا شاتىر تىگىپ، نارازىلىقتى جالعاستىرۋ كەرەك. «نازارباەۆ – زەينەتكە، داريعا – لوندونعا، قاجىگەلدين مەن ءابليازوۆ – استاناعا، بەرگەي – اتىراۋعا، دەمپارتيا – ماجىلىسكە» دەگەن فورمۋلا ۇسىنامىن. ءماجىلىس سايلاۋىن بيىل قايتا وتكىزۋ كەرەك. پرەزيدەنت توقاەۆ «حالىقتىڭ ۇنىنە قۇلاق اسسا»، اتىراۋعا كەلسىن. ۇلتتىق ىمىرا جاساسايىق»، – دەپ مالىمدەدى بوقاەۆ.
سونىمەن قوسا، ول وسى ۋاقىتقا دەيىن وزىنە قولداۋ بىلدەرگەن جاقتاستارى مەن كوپشىلىككە العىسىن ءبىلدىردى.
«انامدى، مەنى، باۋىرلارىمدى، تالعاتتى قولداعانى ءۇشىن بارلىق ەلگە، شەتەلدەگى جاناشىرلار مەن حالىقارالىق ۇيىمدارعا راقمەت. حالىقتىڭ قولداۋى بولماعاندا مەنى جوق قىلىپ جىبەرۋشى ەدى»، – دەدى.
"ساياسي تۇتقىن" اتانعان ماكس بوقاەۆ جاقتاستارىنىڭ ورتاسىندا. فوتو: Facebook / جانبولات مامايدىڭ پاراقشاسىنان
جينالعاندار يساتاي-ماحامبەت الاڭىنا بەرىپ سەيىل قۇرىپ قايتۋعا بەت الدى. بوقاەۆتىڭ ايتۋىنشا، بۇگىنگى جوسپارىندا اناسىنا بارىپ سالەم بەرىپ، رەسپۋبليكانىڭ ءار ايماعىنان كەلگەن بەلسەندىلەرمەن داستارحان باسىندا باس قوسپاق.
ول 2016 جىلعى كۇزدەن بەرى تۇرمەدە وتىرعان. اتىراۋدا مىڭداعان ادام الاڭعا جينالۋىمەن باستالعان نارازىلىق جالپىحالىقتىق سيپات الىپ، وزگە ايماقتاردا جالعاسقان. حالىق جەردى شەتەلدىكتەرگە جالعا بەرۋگە جاپپاي قارسىلىق بىلدىرگەننەن كەيىن جەر كوميسسياسى قۇرىلعان، ناتيجەسىندە بيلىك شەتەلدىكتەرگە جالعا بەرۋگە ۋاقىتشا موراتوري جاريالاعان. ەلدىڭ ساناسىن سەرپىلتكەن ميتينگتە كوزگە تۇسكەن اتىراۋلىق بەلسەندىلەر – ماكس بوقاەۆ پەن تالعات ايان سوتتالدى، ارقايسى بەس جىلدان ارقالادى. ولارعا «الەۋمەتتىك ارازدىق تۋدىردى»، «جالعان اقپارات تاراتتى» جانە «ميتينگ وتكىزۋ زاڭدارىن بۇزدى» دەگەن ايىپتار تاعىلدى. سوت 2018 جىلى ساۋىردە اياننىڭ ءوتىنىشى بويىنشا ونى قاماۋدان، كەيىننەن جازادان تولىقتاي بوساتقان. ماكس بوقاەۆ «قاماۋدان ۋاقىتىنان بۇرىن شىعۋعا سۇرانبايتىنىن، ءوزىن تولىق اقتاۋدى تالاپ ەتەتىنىن» مالىمدەگەن.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟