Resey prezidenti Vladimir Putin. Foto: https://www.interfax.ru

Respublikalıq jäne demokratiyalıq partiyanıñ senatorları oppozicioner Aleksey Naval'nıydıñ qamaluına baylanıstı Reseyge qarsı sankciyalar turalı zañ jobasın AQŞ Kongresine tapsırdı. Senator Marko Rubionıñ aytuınşa, atalğan qwjat Reseydiñ birqatar iri jobalarına soqqı boladı.

«Qwqıqbwzu äreketteri üşin Resey Federaciyasın jauapqa tartu turalı 2021 jılğı zañ jobası» dep atalatın qwjattı senatorlar Marko Rubio, Kris Kuns (Delaver demokratı), Ben Kardin (Merilend ştatınıñ demokratı), Mitt Romni, Kris Van Hollen (Merilend ştatınıñ demokratı) jäne Riçard Durbin bekitken. «Zañ jobasında oppoziciya jetekşisi jäne Kreml' sınşısı Aleksey Naval'nıydıñ ulanuı men türmege qamaluı – halıqaralıq qwqıqtıñ öreskel bwzıluı. Sol sebepti osı iske tikeley qatısı bar reseylik şeneunikterge sankciyalar engizu qarastırılğan», – delingen habarlamada.

Atalğan qwjat bekitilse, AQŞ äkimşiligine Reseydiñ «himiyalıq jäne biologiyalıq qarudı qoldanuğa tıyım salaınğan zañdardı» öreskel bwzğanı üşin de şekteuler qarastırıladı. Sonımen qatar, Vaşington äkimşiligi «reseylik oppoziciyalıq sayasatker Boris Nemcovtıñ ölimi turalı esepti» de talap etip otır.

Zañ jobasındağı tarmaqtardıñ biri «Soltüstik ağın – 2» gaz qwbırın aynalıp ötpeydi. «AQŞ Kongresi Germaniya ükimetin «Soltüstik ağın – 2» gaz qwbırın qoldaudan bas tartuğa şaqıradı» – deydi senatorlar.

Bıltır qırküyekte zañ şığaruşılar Kongreske «Resey biliginiñ qwqıqbwzu äreketteri üşin jauapqa tartu turalı Zañ jobası» qabıldağan bolatın. Kongrestiñ derekter bazasına säykes, 24 qırküyekte bastama Senat komitetine joldanğan.

2 aqpanda Mäskeudiñ Simonovskiy audandıq sotı Aleksey Naval'nıydıñ «Iv Roşe» isi boyınşa alğan şarttı jazasın türme jazasına almastırdı. Tergeu izolyatorı men üyqamaqtağı merzimin eseptegende oppozicioner koloniyada 2 jıl 8 ay otıradı. Sotqa Europanıñ 20 şaqtı memleketiniñ diplomattarı qatıstı. Ükim şıqqannan keyin batıs elderi Resey biliginiñ bwl äreketin «erkindik qwqığı men zañ üstemdigine jasalğan auır soqqı» dep sınğa alıp, Naval'nıydı bostaudı talap etti.

"The Qazaq Times"