ناۆالنىي ءىسى: اقش رەسەيگە قارسى سانكتسيالار قۇجاتىن دايىندادى

رەسپۋبليكالىق جانە دەموكراتيالىق پارتيانىڭ سەناتورلارى وپپوزيتسيونەر الەكسەي ناۆالنىيدىڭ قامالۋىنا بايلانىستى رەسەيگە قارسى سانكتسيالار تۋرالى زاڭ جوباسىن اقش كونگرەسىنە تاپسىردى. سەناتور ماركو رۋبيونىڭ ايتۋىنشا، اتالعان قۇجات رەسەيدىڭ بىرقاتار ءىرى جوبالارىنا سوققى بولادى.

«قۇقىقبۇزۋ ارەكەتتەرى ءۇشىن رەسەي فەدەراتسياسىن جاۋاپقا تارتۋ تۋرالى 2021 جىلعى زاڭ جوباسى» دەپ اتالاتىن قۇجاتتى سەناتورلار ماركو رۋبيو، كريس كۋنس (دەلاۆەر دەموكراتى), بەن كاردين (مەريلەند شتاتىنىڭ دەموكراتى), ميتت رومني، كريس ۆان حوللەن (مەريلەند شتاتىنىڭ دەموكراتى) جانە ريچارد دۋربين بەكىتكەن. «زاڭ جوباسىندا وپپوزيتسيا جەتەكشىسى جانە كرەمل سىنشىسى الەكسەي ناۆالنىيدىڭ ۋلانۋى مەن تۇرمەگە قامالۋى – حالىقارالىق قۇقىقتىڭ ورەسكەل بۇزىلۋى. سول سەبەپتى وسى ىسكە تىكەلەي قاتىسى بار رەسەيلىك شەنەۋنىكتەرگە سانكتسيالار ەنگىزۋ قاراستىرىلعان»، – دەلىنگەن حابارلامادا.

اتالعان قۇجات بەكىتىلسە، اقش اكىمشىلىگىنە رەسەيدىڭ «حيميالىق جانە بيولوگيالىق قارۋدى قولدانۋعا تىيىم سالاىنعان زاڭداردى» ورەسكەل بۇزعانى ءۇشىن دە شەكتەۋلەر قاراستىرىلادى. سونىمەن قاتار، ۆاشينگتون اكىمشىلىگى «رەسەيلىك وپپوزيتسيالىق ساياساتكەر بوريس نەمتسوۆتىڭ ءولىمى تۋرالى ەسەپتى» دە تالاپ ەتىپ وتىر.

زاڭ جوباسىنداعى تارماقتاردىڭ ءبىرى «سولتۇستىك اعىن – 2» گاز قۇبىرىن اينالىپ وتپەيدى. «اقش كونگرەسى گەرمانيا ۇكىمەتىن «سولتۇستىك اعىن – 2» گاز قۇبىرىن قولداۋدان باس تارتۋعا شاقىرادى» – دەيدى سەناتورلار.

بىلتىر قىركۇيەكتە زاڭ شىعارۋشىلار كونگرەسكە «رەسەي بيلىگىنىڭ قۇقىقبۇزۋ ارەكەتتەرى ءۇشىن جاۋاپقا تارتۋ تۋرالى زاڭ جوباسى» قابىلداعان بولاتىن. كونگرەستىڭ دەرەكتەر بازاسىنا سايكەس، 24 قىركۇيەكتە باستاما سەنات كوميتەتىنە جولدانعان.

2 اقپاندا ماسكەۋدىڭ سيمونوۆسكي اۋداندىق سوتى الەكسەي ناۆالنىيدىڭ «يۆ روشە» ءىسى بويىنشا العان شارتتى جازاسىن تۇرمە جازاسىنا الماستىردى. تەرگەۋ يزولياتورى مەن ۇيقاماقتاعى مەرزىمىن ەسەپتەگەندە وپپوزيتسيونەر كولونيادا 2 جىل 8 اي وتىرادى. سوتقا ەۋروپانىڭ 20 شاقتى مەملەكەتىنىڭ ديپلوماتتارى قاتىستى. ۇكىم شىققاننان كەيىن باتىس ەلدەرى رەسەي بيلىگىنىڭ بۇل ارەكەتىن «ەركىندىك قۇقىعى مەن زاڭ ۇستەمدىگىنە جاسالعان اۋىر سوققى» دەپ سىنعا الىپ، ناۆالنىيدى بوستاۋدى تالاپ ەتتى.

"The Qazaq Times"