Medicinalıq betperde. Körneki suret. Foto: Pixabay / Matteo Orlandi

2 aqpan koronavirus jwqqan 1228 adam, al 1 aqpan koronavirus pnevmoniyasına şaldıqqan 107 adam tirkeldi. Qazir elde 28 mıñğa juıq adam (U07.1 nemese KVI+ boyınşa 16 695, U07.2 nemese KVI- boyınşa 11 205) auırıp jatır. 

#U07.1 Koronavirus PTR testi arqılı tabılğan jaña keysterdiñ eñ köbi – Pavlodar (235), Aqmola (170), astana (130), Almatı qalası (113), Atırau (89), BQO (85), Qostanay (84) oblıstarında. Ötken täulikte 1136 adam auruınan ayğıp şığıp üyine jiberilgen, sonday-aq 6 adam ömirden ötken.

#U07.2  Apta bası düysenbi küni, yağni aqpannıñ 1-i koronavirus pnevmoniyasına jatatın 107 nauqas jäne bir ölim jağdayı tirkelgen. Pnevmoniya anıqtalğan nauqstardıñ eñ köbi – Jambıl (19), ŞQO men Aqmola (ärqaysında 13), Şımkent (11), Qostanay (9) öñirlerine tiesili. Aqparatı bir täulikke keşigip beriletin pnevmoniyadan ayıqqandar sanı 201-ge arttı.

#Jalpı  Ekinşi tolqındağı kündelikti körsetkiş qwbılmalı. Qañtar ayınıñ ortasınan beri täuligine wdayı mıñnan kem emes jağday anıqtaluda. Mäselen, düysenbide koronavirus pen osığan wqsas pnevmoniyanı qosa eseptegende 1268 nauqas anıqtalğan.

DenMin-niñ resmi mälimetinşe, emdelip jatqan 27 900 nauqastıñ 5788-i auruhanada, 22 112-si ambulatorlıq baqılauda. Ahualı naşar 310 nauqastıñ jağdayı auır, tağı 57 adamnıñ häli öte auır. 52 sırqat ökpeni jasandı jeldetu apparatımen tınıstap jatır.

Aqparat ministrliginiñ coronavirus2020.kz saytı men Densaulıq saqtau ministrliginiñ media resurstarında jariyalanğan derekter birneşe aydan beri qate berilip kelgeni jaylı materialdar jariyalap, aqparat qwraldarına eskertkenbiz. 26 jeltoqsannan bastap ministrlik kemşiligin moyındap, resmi habarlamanıñ formasın ögertti. Statistikanıñ pnevmoniyağa qatıstı merzimin körsetip jariyalauğa köşti.

(!) Pandemiya moderatorı – ministrlik tek senbi-jeksenbide ğana emes, mereke künderi de statistikanı tolıqtay jürgizuge qauqarsız. Mäselen, jeltoqsan ayınıñ 1, 16, 17, 18-i jäne 19-ına, 1-4, 7 qañtarğa tiesili derekter eselep kemigen. Küzdiñ ortasında sol kezdegi DenMin-niñ resmi-erikti ökili Bağdat Qojahmetov ekinşi tolqında demalıs künine qaramastan statistikanı tolıq kölemde jürgizuge uäde bergen edi. Biraq is jüzinde olay bolmay şıqtı. 

The Qazaq Times redakciyası tömendegi kesteni resmi mälimettiñ rettelgen nwsqası dep sanaydı.

Osı qıstıñ basında bas memlekettik sanitar-däriger Erlan Qiyasov Qazaqstanda kezekti tolqınınıñ şarıqtau kezeñi qañtar-aqpan aylarına, al ministr Aleksey Coy naurız ayınıñ soñına qaray twspa-tws keletinin mälimdegen.

13 naurızdan beri COVID-19 infekciyasın jwqtırğandar qatarı 190 mıñnan assa, 1 tamızdan bergi koronavirus pnevmoniyası 48 mıñğa juıqtağan. DDSW mälimetinşe, Qazaqstanda auırğandardıñ sanı 236 mıñğa, al Wlttıq statistikada 238 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi. Osı uaqıtqa deyin KVI+ diagnozı boyınşa jaña anıqtalğan nauqastar aymaqtardağı körsetkişi kündelikti, al KVI- deregi tek jiıntıq mände berilip kelgen. QT birneşe ay boyı ministrlikke osı mäseleni köterip, ondağan swrau joldağan. Büginnen bastap qana koronavirus pnevmoniyasınıñ kün sayınğı aymaqtardağı esebi taratılıp jariyalanuğa köşti.

KVI- nemese koronavirus pnevmoniyasınıñ aymaqtardağı täuliktik körsetkişi alğaş jariyalana bastadı. Foto: QR DSM

Äzirge virus taralu qateri jağınan Aqmola, SQO, Pavlodar oblıstarı – qızıl; Atırau, ŞQO, BQO, Qarağandı, Qostanay oblıstarı men astana – sarı aymaqta twr.

Pandemiya bastalğalı jalpı virus jwqqandardıñ 4054-i (KVI+ / U07.1 – 2565, KVI- / U07.2 – 571, ilespe aurulardan – 938) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 938  adamdı jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qoğamda bıltırğı 256 mıñ pnevmoniya jağdayın esepke qospay, jalpı statistikanı «mausım-şilde qırğınan» keyin jürgize bastağan Ükimettiñ esebine kümänmen qaraytındar köbeygen.

Qazaqstan virus taraluı boyınşa älemde Worldometers derekqorı jäne DDSW tizimindegi 221 el men aymaqtıñ arasında 49-şı orında twr.

"The Qazaq Times"