مەديتسينالىق بەتپەردە. كورنەكى سۋرەت. فوتو: Pixabay / Matteo Orlandi

2 اقپان كوروناۆيرۋس جۇققان 1228 ادام، ال 1 اقپان كوروناۆيرۋس پنەۆمونياسىنا شالدىققان 107 ادام تىركەلدى. قازىر ەلدە 28 مىڭعا جۋىق ادام (U07.1 نەمەسە كۆي+ بويىنشا 16 695, U07.2 نەمەسە كۆي- بويىنشا 11 205) اۋىرىپ جاتىر. 

#U07.1 كوروناۆيرۋس پتر تەستى ارقىلى تابىلعان جاڭا كەيستەردىڭ ەڭ كوبى – پاۆلودار (235), اقمولا (170), استانا (130), الماتى قالاسى (113), اتىراۋ (89), بقو (85), قوستاناي (84) وبلىستارىندا. وتكەن تاۋلىكتە 1136 ادام اۋرۋىنان ايعىپ شىعىپ ۇيىنە جىبەرىلگەن، سونداي-اق 6 ادام ومىردەن وتكەن.

#U07.2  اپتا باسى دۇيسەنبى كۇنى، ياعني اقپاننىڭ 1-ءى كوروناۆيرۋس پنەۆمونياسىنا جاتاتىن 107 ناۋقاس جانە ءبىر ءولىم جاعدايى تىركەلگەن. پنەۆمونيا انىقتالعان ناۋقستاردىڭ ەڭ كوبى – جامبىل (19), شقو مەن اقمولا (ارقايسىندا 13), شىمكەنت (11), قوستاناي (9) وڭىرلەرىنە تيەسىلى. اقپاراتى ءبىر تاۋلىككە كەشىگىپ بەرىلەتىن پنەۆمونيادان ايىققاندار سانى 201-گە ارتتى.

#جالپى  ەكىنشى تولقىنداعى كۇندەلىكتى كورسەتكىش قۇبىلمالى. قاڭتار ايىنىڭ ورتاسىنان بەرى تاۋلىگىنە ۇدايى مىڭنان كەم ەمەس جاعداي انىقتالۋدا. ماسەلەن، دۇيسەنبىدە كوروناۆيرۋس پەن وسىعان ۇقساس پنەۆمونيانى قوسا ەسەپتەگەندە 1268 ناۋقاس انىقتالعان.

دەنمين-ءنىڭ رەسمي مالىمەتىنشە, ەمدەلىپ جاتقان 27 900 ناۋقاستىڭ 5788-ءى اۋرۋحانادا، 22 112-ءسى امبۋلاتورلىق باقىلاۋدا. احۋالى ناشار 310 ناۋقاستىڭ جاعدايى اۋىر، تاعى 57 ادامنىڭ ءحالى وتە اۋىر. 52 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

اقپارات مينيسترلىگىنىڭ coronavirus2020.kz سايتى مەن دەنساۋلىق ساقتاۋ مينيسترلىگىنىڭ مەديا رەسۋرستارىندا جاريالانعان دەرەكتەر بىرنەشە ايدان بەرى قاتە بەرىلىپ كەلگەنى جايلى ماتەريالدار جاريالاپ، اقپارات قۇرالدارىنا ەسكەرتكەنبىز. 26 جەلتوقساننان باستاپ مينيسترلىك كەمشىلىگىن مويىنداپ، رەسمي حابارلامانىڭ فورماسىن وگەرتتى. ستاتيستيكانىڭ پنەۆمونياعا قاتىستى مەرزىمىن كورسەتىپ جاريالاۋعا كوشتى.

(!) پاندەميا مودەراتورى – مينيسترلىك تەك سەنبى-جەكسەنبىدە عانا ەمەس، مەرەكە كۇندەرى دە ستاتيستيكانى تولىقتاي جۇرگىزۋگە قاۋقارسىز. ماسەلەن، جەلتوقسان ايىنىڭ 1, 16, 17, 18-ءى جانە 19-ىنا، 1-4, 7 قاڭتارعا تيەسىلى دەرەكتەر ەسەلەپ كەمىگەن. كۇزدىڭ ورتاسىندا سول كەزدەگى دەنمين-ءنىڭ رەسمي-ەرىكتى وكىلى باعدات قوجاحمەتوۆ ەكىنشى تولقىندا دەمالىس كۇنىنە قاراماستان ستاتيستيكانى تولىق كولەمدە جۇرگىزۋگە ۋادە بەرگەن ەدى. بىراق ءىس جۇزىندە ولاي بولماي شىقتى. 

The Qazaq Times رەداكتسياسى تومەندەگى كەستەنى رەسمي مالىمەتتىڭ رەتتەلگەن نۇسقاسى دەپ سانايدى.

وسى قىستىڭ باسىندا باس مەملەكەتتىك سانيتار-دارىگەر ەرلان قياسوۆ قازاقستاندا كەزەكتى تولقىنىنىڭ شارىقتاۋ كەزەڭى قاڭتار-اقپان ايلارىنا، ال مينيستر الەكسەي تسوي ناۋرىز ايىنىڭ سوڭىنا قاراي تۇسپا-تۇس كەلەتىنىن مالىمدەگەن.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 190 مىڭنان اسسا، 1 تامىزدان بەرگى كوروناۆيرۋس پنەۆمونياسى 48 مىڭعا جۋىقتاعان. ددسۇ مالىمەتىنشە، قازاقستاندا اۋىرعانداردىڭ سانى 236 مىڭعا، ال ۇلتتىق ستاتيستيكادا 238 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. وسى ۋاقىتقا دەيىن كۆي+ دياگنوزى بويىنشا جاڭا انىقتالعان ناۋقاستار ايماقتارداعى كورسەتكىشى كۇندەلىكتى، ال كۆي- دەرەگى تەك جيىنتىق ماندە بەرىلىپ كەلگەن. QT بىرنەشە اي بويى مينيسترلىككە وسى ماسەلەنى كوتەرىپ، ونداعان سۇراۋ جولداعان. بۇگىننەن باستاپ قانا كوروناۆيرۋس پنەۆمونياسىنىڭ كۇن سايىنعى ايماقتارداعى ەسەبى تاراتىلىپ جاريالانۋعا كوشتى.

كۆي- نەمەسە كوروناۆيرۋس پنەۆمونياسىنىڭ ايماقتارداعى تاۋلىكتىك كورسەتكىشى العاش جاريالانا باستادى. فوتو: قر دسم

ازىرگە ۆيرۋس تارالۋ قاتەرى جاعىنان اقمولا، سقو، پاۆلودار وبلىستارى – قىزىل; اتىراۋ، شقو، بقو، قاراعاندى، قوستاناي وبلىستارى مەن استانا – سارى ايماقتا تۇر.

پاندەميا باستالعالى جالپى ۆيرۋس جۇققانداردىڭ 4054-ءى (كۆي+ / U07.1 – 2565, كۆي- / U07.2 – 571, ىلەسپە اۋرۋلاردان – 938) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 938  ادامدى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قوعامدا بىلتىرعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى «ماۋسىم-شىلدە قىرعىنان» كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

قازاقستان ۆيرۋس تارالۋى بويىنشا الەمدە Worldometers دەرەكقورى جانە ددسۇ تىزىمىندەگى 221 ەل مەن ايماقتىڭ اراسىندا 49-شى ورىندا تۇر.

"The Qazaq Times"