Ministr Aleksey Coy 19 qañtar küngi ükimet otırısında orınbasarı äri bas sanitar Erlan Qiyasovtıñ 40 kün bwrınğı boljamın jañarttı. Foto: QR Ükimet keñsesi

Qazaqstannıñ densaulıq saqtau ministri koronavirus pandemiyasınıñ eldegi bağdar-barısı turalı boljamnıñ jaña nwsqasın mälimdedi. 

Seysenbi, 19 qañtardağı ükimet otırısında bayandama jasağan densaulıq saqtau ministri Aleksey Coy indettiñ kezekti şarıqtau kezeñi köktemde boluı mümkin deydi.

«Ministrliktiñ boljau jönindegi jwmıs tobı mindetti medicinalıq betperde rejimin, äleumettik qaşıqtıqtı saqtau, aldağı vakcinaciya, qoldanıstağı şekteu şaraları özgerissiz qalğan  jağdayda jıl soñına deyingi epidjağdayğa boljam jasadı. Aurudıñ taraluı boyınşa ıqtimal şarıqtau kezi naurız ayınıñ soñına qaray twspa-tws kelui  mümkin», – dedi ministr Coy.

Eger dert bağdarı optimistik bağıtta jalğassa täuligine – 3 mıñ, al realistik twrğıda – 6 mıñ, tipti uşığıp pessimistik qarqın alsa künine – 9 mıñğa deyin nauqas tirkelui mümkin.

Optimistik nwsqa boyınşa, täuligine 3 mıñğa deyin nauqas anıqtalıp, densaulıq saqtau jüyesinde 24 mıñ tösek-orınğa nauqastar jatqızıluı ıqtimal – mwnday jağdayda karantin şekteuin qatañdatudıñ qajeti joq. Al künine 6-9 mıñ aralığında nauqas tirkelse, realistik jäne pessimistik scenraiyler ayasında auruhanalardağı bos emes orındar sanı 45 jäne 52 mıñğa deyin ösedi. Medicina salasındağı jüktemeni bwdan arı qiındatıp almas üşin karantin şarası küşeyedi.

Sonımen qosa, ministr aqpan ayınan virusqa qarsı jappay vakcinalau bastalatının habarladı.

«Birinşi kezeñde 2 mln adamğa ekpe salınadı. Bwl epidjağdayğa oñ äser etedi. Bizdiñ esebimizşe, osı kölemdegi vakcinalaudıñ özi tirkeletin keyster sanın 40 mıñğa azaytadı. Jappay vakcina egu qanşalıqtı auqımdı äri jıldam jürse, auruşañdıq pen ölim-jitim körsetkişi soğwrlım azayadı. Säykesinşe lokdauınsız qalıptı ömirge oraluğa mümkindik artadı», – dedi ol.

Bwğan deyin 9 jeltoqsan densaulıq saqtau vice-ministri, bas memlekettik sanitar-därigeri Erlan Qiyasov Qazaqstanda koronavirus infekciyasın jwqtırudıñ şarıqtau kezeñin biıl qañtar jäne aqpan aylarına säykes keledi dep boljağan.

13 naurızdan beri COVID-19 infekciyasın jwqtırğandar qatarı 170 mıñnan, 1 tamızdan bergi koronavirus pnevmoniyası 46,8 mıñnan asqan. DDSW mälimetinşe, Qazaqstanda auırğandardıñ sanı 215 mıñğa jetse, al Wlttıq statistikada 217 mıñğa juıqtağan. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 3903-i (KVI+ / U07.1 – 2423, KVI- / U07.2 – 542, ilespe aurulardan – 938) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 938  adamdı jalpı statistikağa engizbeydi.

"The Qazaq Times"