قازاقستاننىڭ دەنساۋلىق ساقتاۋ ءمينيسترى كوروناۆيرۋس پاندەمياسىنىڭ ەلدەگى باعدار-بارىسى تۋرالى بولجامنىڭ جاڭا نۇسقاسىن مالىمدەدى. 

سەيسەنبى، 19 قاڭتارداعى ۇكىمەت وتىرىسىندا بايانداما جاساعان دەنساۋلىق ساقتاۋ ءمينيسترى الەكسەي تسوي ىندەتتىڭ كەزەكتى شارىقتاۋ كەزەڭى كوكتەمدە بولۋى مۇمكىن دەيدى.

«مينيسترلىكتىڭ بولجاۋ جونىندەگى جۇمىس توبى مىندەتتى مەديتسينالىق بەتپەردە رەجيمىن، الەۋمەتتىك قاشىقتىقتى ساقتاۋ، الداعى ۆاكتسيناتسيا، قولدانىستاعى شەكتەۋ شارالارى وزگەرىسسىز قالعان  جاعدايدا جىل سوڭىنا دەيىنگى ەپيدجاعدايعا بولجام جاسادى. اۋرۋدىڭ تارالۋى بويىنشا ىقتيمال شارىقتاۋ كەزى ناۋرىز ايىنىڭ سوڭىنا قاراي تۇسپا-تۇس كەلۋى  مۇمكىن»، – دەدى مينيستر تسوي.

ەگەر دەرت باعدارى وپتيميستىك باعىتتا جالعاسسا تاۋلىگىنە – 3 مىڭ، ال رەاليستىك تۇرعىدا – 6 مىڭ، ءتىپتى ۋشىعىپ پەسسيميستىك قارقىن السا كۇنىنە – 9 مىڭعا دەيىن ناۋقاس تىركەلۋى مۇمكىن.

وپتيميستىك نۇسقا بويىنشا، تاۋلىگىنە 3 مىڭعا دەيىن ناۋقاس انىقتالىپ، دەنساۋلىق ساقتاۋ جۇيەسىندە 24 مىڭ توسەك-ورىنعا ناۋقاستار جاتقىزىلۋى ىقتيمال – مۇنداي جاعدايدا كارانتين شەكتەۋىن قاتاڭداتۋدىڭ قاجەتى جوق. ال كۇنىنە 6-9 مىڭ ارالىعىندا ناۋقاس تىركەلسە، رەاليستىك جانە پەسسيميستىك ستسەنرايلەر اياسىندا اۋرۋحانالارداعى بوس ەمەس ورىندار سانى 45 جانە 52 مىڭعا دەيىن وسەدى. مەديتسينا سالاسىنداعى جۇكتەمەنى بۇدان ارى قيىنداتىپ الماس ءۇشىن كارانتين شاراسى كۇشەيەدى.

سونىمەن قوسا، مينيستر اقپان ايىنان ۆيرۋسقا قارسى جاپپاي ۆاكتسينالاۋ باستالاتىنىن حابارلادى.

«ءبىرىنشى كەزەڭدە 2 ملن ادامعا ەكپە سالىنادى. بۇل ەپيدجاعدايعا وڭ اسەر ەتەدى. ءبىزدىڭ ەسەبىمىزشە، وسى كولەمدەگى ۆاكتسينالاۋدىڭ ءوزى تىركەلەتىن كەيستەر سانىن 40 مىڭعا ازايتادى. جاپپاي ۆاكتسينا ەگۋ قانشالىقتى اۋقىمدى ءارى جىلدام جۇرسە، اۋرۋشاڭدىق پەن ءولىم-ءجىتىم كورسەتكىشى سوعۇرلىم ازايادى. سايكەسىنشە لوكداۋىنسىز قالىپتى ومىرگە ورالۋعا مۇمكىندىك ارتادى»، – دەدى ول.

بۇعان دەيىن 9 جەلتوقسان دەنساۋلىق ساقتاۋ ۆيتسە-ءمينيسترى، باس مەملەكەتتىك سانيتار-دارىگەرى ەرلان قياسوۆ قازاقستاندا كوروناۆيرۋس ينفەكتسياسىن جۇقتىرۋدىڭ شارىقتاۋ كەزەڭىن بيىل قاڭتار جانە اقپان ايلارىنا سايكەس كەلەدى دەپ بولجاعان.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 170 مىڭنان، 1 تامىزدان بەرگى كوروناۆيرۋس پنەۆمونياسى 46,8 مىڭنان اسقان. ددسۇ مالىمەتىنشە، قازاقستاندا اۋىرعانداردىڭ سانى 215 مىڭعا جەتسە، ال ۇلتتىق ستاتيستيكادا 217 مىڭعا جۋىقتاعان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 3903-ءى (كۆي+ / U07.1 – 2423, كۆي- / U07.2 – 542, ىلەسپە اۋرۋلاردان – 938) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 938  ادامدى جالپى ستاتيستيكاعا ەنگىزبەيدى.

"The Qazaq Times"