ازاماتتىق قوعامنىڭ كونتر-سپيكەرلەرى يبرايموۆ، سارسەنباي مەن ستانيسلاۆ ماسليحاتقا ءوتتى

قالا اكىمىنىڭ ءباسپاسوز قىزمەتى الماتى ءماسليحاتىنا Nur Otan پارتياسىنان سايلانعان دەپۋتاتتاردىڭ ءتىزىمى بەكىتىلگەنىن حابارلادى. ناتيجەسىندە 37 ورىننىڭ 29-ى (بىلتىر 35 ماندات العان – QT) بيلىك پارتياسىنا بۇيىرعان. 

29 دەپۋتاتتىڭ ءتىزىمى اۋماقتىق سايلاۋ كوميسسياسىنا جىبەرىلگەن. ونىڭ 19-ى الدىڭعى شاقىرىلىمدا بولماعان، 10-ى قايتا دەپۋتات اتانعان.

Nur Otan پارتياسى الماتى ءماسليحاتىنا ۇسىنعان كانديداتتاردىڭ اراسىندا بەلگىلى شاحماتشى-گروسسمەيستەر جانسايا ابدىلمالىك، وقۋ ورىندارىنىڭ باسشىلارىنان ارمان جۇدەباەۆ، گۇلجان بەكەنوۆا مەن رايحان بولەكباەۆا، Forbes جۋرنالىنىڭ قازاقستان، وزبەكستان جانە گرۋزياداعى فرانشيزاسىنىڭ يەسى ارمانجان بايتاسوۆ، سايلاۋ كۇنگى ميتينگتە ازاماتتىق بەلسەندىلەرگە كۇش كورسەتكەن تانىمال وليمپيادا چەمپيونى، بوكستان وليمپياداعا دايارلاۋ ورتالىعىنىڭ ديرەكتورى ەرماحان يبرايموۆ پەن سول كۇنى بيلىكتى جاقتاپ الاڭعا كەلگەن «الماتى اقشامى» گازەتىنىڭ باس رەداكتورى  قالي سارسەنباي، شەرۋ-ميتينگتەردە ۇنەمى كونتر-سيپكەر بولىپ جۇرەتىن، نۇر وتاننىڭ قالالىق فيلالى باسشىسىنىڭ ورىنباسارى ستانيسلاۆ كانكۋروۆ، بيلىكشىل كاسىپكەر قايرات قۇدايبەرگەن ت.ب. بيزنەس وكىلدەرى، دارىگەرلەر بار.

پارتيانىڭ قالالىق فيليالىنىڭ توراعاسى، الماتى قالاسىنىڭ اكىمى باقىتجان ساعىنتاەۆتىڭ ايتۋىنشا، جاڭا فراكتسيانىڭ الدىندا «الماتى-2050» ستراتەگياسى نەگىزىندە ازىرلەنگەن سايلاۋالدى باعدارلاما مەن سايلاۋشىلاردىڭ اماناتتارىنىڭ ورىندالۋىن جۇيەلى تۇردە قاداعالاۋ مىندەتى تۇر. ۇسىنىلعان تىزىمدە ايەلدەردىڭ ۇلەسى 31%، جاستاردىڭ ۇلەسى – 24% ەكەن. دەپۋتاتتاردىڭ ورتاشا جاسى – 43 جاس كورىنەدى.

10 قاڭتاردا وتكەن ءماجىلىس جانە ءماسليحاتتار سايلاۋىندا ارنايى جاساق الاڭعا نارازىلىق بىلدىرۋگە كەلگەن دەمپارتيا باستاماشىل توبى مەن Oyan, Qazaqstan ازاماتتىق قوزعالىسىن ون ساعاتقا دەيىن قورشاۋدا ۇستاعان. بۇل حالىقارالىق ادام قۇقىقتارى جونىندەگى ۇيىمدار مەن ەقىۇ تاراپىنان وتكىر سىنعا ۇشىرادى. سايلاۋ كۇنگى ايازدا ساعاتتاپ تۇرۋعا ءماجبۇر بولعان ازاماتتىق قوعام بەلسەندىلەرىنە قارسى ءارتۇرلى ارانداتۋ ارەكەتتەرى ورىن الدى. ەرماحان يبرايموۆ بەلسەندىنىڭ بىرىنە جۇلقىپ، قولىنداعى پلاكاتىن جىرتىپ تاستاعان. سونىمەن قوسا، بەلسەندىلەردىڭ ءسوزىن تەرىستەپ، بيلىك ساياساتىن ۇگىتتەپ باققاندار قاتارىندا ءجۇزى تانىس، بىراق اتى-ءجونىن ايتقىسى كەلمەيتىن «ادەتتەگى ايتقىشتار» مەن اباي اتىنداعى قازۇپۋ رەكتورى تاحير بالىقباەۆ، تۇران ۋنيۆەرسيتەتىنىڭ باسشىسى راحمان الشانوۆ، «الماتى اقشامى» گازەتىنىڭ باس رەداكتورى  قالي سارسەنباي ت.ب. بولدى. ودان وزگە ەلگە تانىمال اقىن-جازۋشىلار ەسەنعالي راۋشانوۆ، مارالتاي رايىمبەك، باقىت بەدەلحانوۆ تا توبە كورسەتتى، دەگەنمەن ەشقانداي پىكىر بىلدىرگەن جوق.

سايلاۋدى ءجىتى باقىلاعان «تاۋەلسىز باقىلاۋشىلار» ۇيىمى سارسەنبى رەسمي نۇسقادان  ايىرماشىلىعى ەداۋىر كوپ بالاما ەسەبىن جاريالادى. وسك الماتى قالاسى رەسپۋبليكا بويىنشا ەڭ از كورسەتكىشپەن سايلاۋشىلاردىڭ نەبارى 30,3%-ى سايلاۋعا قاتىستى دەسە، ۇيىم بۇل كورسەتكىش 15,3% بولدى دەيدى. سونداي-اق، وسك / «تاۋەلسىز باقىلاۋشىلار» ۇيىمىنىڭ دەرەگىن سالىستىرساق، سايلاۋعا بارعان الماتىلىقتاردىڭ 55,54 / 45,8%-ى Nur Otan, 15,21 / 20,8%-ى «اق جول»، 13,49 / 10%-ى قحپ، 9,9 / 9,5%-ى اۋىل، 5,86 / 13,9%-ى Adal پارتيالارىنا داۋىس بەرگەن.

"The Qazaq Times"