Foto: QT

Bügin Qazaqstanda parlament saylauı bastaldı. Toqaev «narazılıq bildiruşilerge eşqanday repressiyalıq şaralar qoldanılmaydı» dese de, Almatı men astanada saylauğa boykot jariyalap, mitingige şıqqan jüzden astam adamdı policiya wstap äketti. Miting belgilengen aumaqta ğalamtor bwğattalıp, jurnalisterdiñ habar taratuı qiındadı.

Sağat 12-den beri Almatı policiyası «Astana» alañında 40 şaqtı adamdı wstadı. 15-20 adamnan twratın narazılıq bildiruşiler tobı Panfilov köşesiniñ boyında, tağı birneşe adam Töle bi men Panfilov köşeleriniñ qiılısında arnayı jasaq qorşauında qaldı.

Almatıda arnayı jasaq ökilderi parlament saylauına boykot jariyalap, mitingige şıqqan tirkelmegen «Dempartiya» men «Oyan, Qazaqstan» qozğalısınıñ ökilderin tüski sağat 12-den beri äli qorşap twr. Policiya belsendilerdi därethanağa da jibermedi. Foto: QT

Narazılar «Şal, ket!», «Nwrswltan, otanımdı jemeş», «Nazarbaev ketsin!», «Saylauğa boykot», «Nwr Otan – satqındar partiyası» dep wrandadı. Olarğa qorşau sırtında twrğan bir top adam kedergi keltirip, barınşa toqsauıl boluğa tırıstı.

Bwğan deyin policiya tirkelmegen Demokratiyalıq partiyanıñ jaqtastarı ötkizgen şerude keminde 30 adamdı wstağan. Sonday-aq, Dempartiyanıñ tağı 70 ökilin jasağı men Oyan, Qazaqstan qozğalısınıñ ökilderin Sätpaev köşesinde qorşauğa aldı.

Arnayı jasaq qorşauındağı Dempartiya men Oyan, Qazaqstan qozğalısınıñ ökilderi. Foto: QT

Saylau küni tañerteñ Qazaqstan prezidenti Toqaev: «Barlıq kandidatqa teñ jağday jasaldı. Al ükimet, zañğa say, saylaudan keyin otstavkağa ketui tiis. Saylaudan soñ parlamentke barıp, frakciya jetekşilerimen, jaña deputattarmen prem'er ministr men ministrlerdiñ kandidaturasın aqıldasamın», – dep mälimdegen. Alayda Almatıdan bölek, astana men Şımkentte de osığan wqsas wstaular bolıp jatır. Mälimetter boyınşa, Şımkent pen astanda  ärqaysısında onğa juıq adam wstalğan.

10 qañtar – Qazaqstanda parlament mäjilisi men jergilikti mäslihat saylauı ötip jatır. Saylauğa «Nur Otan», «Aqjol», «Adal», «Auıl» jäne «Qazaqstan halıq partiyası» qatısadı. OSK mälimetinşe, bes partiya mäjilis saylauına – 312 kandidat (90 äyel, 222 er adam), mäslihatqa 832 kandidat wsınğan. Saylau OSK wyımdastıruımen 232 aymaqtıq saylau komissiya ökildik etetin 10 mıñnan astam saylau uçaskesinde ötedi.

Sayasi wyımdardıñ arasında oppoziciyalıq partiya joq.

Saylau qarsañında qwqıq qorğauşılar jer-jerde belsendilerdiñ üyine tintu jürgizilip, qudalau küşeygenin habarlağan. Bwğan deyin eşbir halıqaralıq wyım Qazaqstandağı saylaulardıñ eşqaysısın ädil, aşıq ötti dep bağalamağan.

"The Qazaq Times"