فوتو: QT

بۇگىن قازاقستاندا پارلامەنت سايلاۋى باستالدى. توقاەۆ «نارازىلىق بىلدىرۋشىلەرگە ەشقانداي رەپرەسسيالىق شارالار قولدانىلمايدى» دەسە دە، الماتى مەن استانادا سايلاۋعا بويكوت جاريالاپ، ميتينگىگە شىققان جۇزدەن استام ادامدى پوليتسيا ۇستاپ اكەتتى. ميتينگ بەلگىلەنگەن اۋماقتا عالامتور بۇعاتتالىپ، جۋرناليستەردىڭ حابار تاراتۋى قيىندادى.

ساعات 12-دەن بەرى الماتى پوليتسياسى «استانا» الاڭىندا 40 شاقتى ادامدى ۇستادى. 15-20 ادامنان تۇراتىن نارازىلىق بىلدىرۋشىلەر توبى پانفيلوۆ كوشەسىنىڭ بويىندا، تاعى بىرنەشە ادام تولە بي مەن پانفيلوۆ كوشەلەرىنىڭ قيىلىسىندا ارنايى جاساق قورشاۋىندا قالدى.

الماتىدا ارنايى جاساق وكىلدەرى پارلامەنت سايلاۋىنا بويكوت جاريالاپ، ميتينگىگە شىققان تىركەلمەگەن «دەمپارتيا» مەن «Oyan, Qazaqstan» قوزعالىسىنىڭ وكىلدەرىن تۇسكى ساعات 12-دەن بەرى ءالى قورشاپ تۇر. پوليتسيا بەلسەندىلەردى دارەتحاناعا دا جىبەرمەدى. فوتو: QT

نارازىلار «شال، كەت!»، «نۇرسۇلتان، وتانىمدى جەمەش»، «نازارباەۆ كەتسىن!»، «سايلاۋعا بويكوت»، «نۇر وتان – ساتقىندار پارتياسى» دەپ ۇراندادى. ولارعا قورشاۋ سىرتىندا تۇرعان ءبىر توپ ادام كەدەرگى كەلتىرىپ، بارىنشا توقساۋىل بولۋعا تىرىستى.

بۇعان دەيىن پوليتسيا تىركەلمەگەن دەموكراتيالىق پارتيانىڭ جاقتاستارى وتكىزگەن شەرۋدە كەمىندە 30 ادامدى ۇستاعان. سونداي-اق، دەمپارتيانىڭ تاعى 70 وكىلىن جاساعى مەن Oyan, Qazaqstan قوزعالىسىنىڭ وكىلدەرىن ساتپاەۆ كوشەسىندە قورشاۋعا الدى.

ارنايى جاساق قورشاۋىنداعى دەمپارتيا مەن Oyan, Qazaqstan قوزعالىسىنىڭ وكىلدەرى. فوتو: QT

سايلاۋ كۇنى تاڭەرتەڭ قازاقستان پرەزيدەنتى توقاەۆ: «بارلىق كانديداتقا تەڭ جاعداي جاسالدى. ال ۇكىمەت، زاڭعا ساي، سايلاۋدان كەيىن وتستاۆكاعا كەتۋى ءتيىس. سايلاۋدان سوڭ پارلامەنتكە بارىپ، فراكتسيا جەتەكشىلەرىمەن، جاڭا دەپۋتاتتارمەن پرەمەر مينيستر مەن مينيسترلەردىڭ كانديداتۋراسىن اقىلداسامىن»، – دەپ مالىمدەگەن. الايدا الماتىدان بولەك، استانا مەن شىمكەنتتە دە وسىعان ۇقساس ۇستاۋلار بولىپ جاتىر. مالىمەتتەر بويىنشا، شىمكەنت پەن استاندا  ارقايسىسىندا ونعا جۋىق ادام ۇستالعان.

10 قاڭتار – قازاقستاندا پارلامەنت ءماجىلىسى مەن جەرگىلىكتى ءماسليحات سايلاۋى ءوتىپ جاتىر. سايلاۋعا «Nur Otan»، «اقجول»، «ادال»، «اۋىل» جانە «قازاقستان حالىق پارتياسى» قاتىسادى. وسك مالىمەتىنشە، بەس پارتيا ءماجىلىس سايلاۋىنا – 312 كانديدات (90 ايەل، 222 ەر ادام), ماسليحاتقا 832 كانديدات ۇسىنعان. سايلاۋ وسك ۇيىمداستىرۋىمەن 232 ايماقتىق سايلاۋ كوميسسيا وكىلدىك ەتەتىن 10 مىڭنان استام سايلاۋ ۋچاسكەسىندە وتەدى.

ساياسي ۇيىمداردىڭ اراسىندا وپپوزيتسيالىق پارتيا جوق.

سايلاۋ قارساڭىندا قۇقىق قورعاۋشىلار جەر-جەردە بەلسەندىلەردىڭ ۇيىنە ءتىنتۋ جۇرگىزىلىپ، قۋدالاۋ كۇشەيگەنىن حابارلاعان. بۇعان دەيىن ەشبىر حالىقارالىق ۇيىم قازاقستانداعى سايلاۋلاردىڭ ەشقايسىسىن ءادىل، اشىق ءوتتى دەپ باعالاماعان.

"The Qazaq Times"