Uaqıt därgeyinen är wlttıñ enşisine berilgen ataulı kün bolatın bolsa,  qazaqqa 16 jeltoqsandı atap bergendey. Tayau kezeñdegi el tarihınıñ eleuli künderi osı 16 jeltoqsanmen sabaqtasıp jatatını beker emes. 

Äueli bwl kün tarihımızda 1986 jılı Kreml'diñ pärmenine qarsı ün qatqan qazaq jastarınıñ dabılı bolıp jazıldı. Tegeurini qattı temir bilik şeñgelinde qazaqtıñ örimdey jas wl-qızdarı öziniñ ör ruhın tarihqa tañbalap ketti. Jeltoqsan alañına tögilen qızıl qan aqırı qızıl imperiyanıñ tağanın qopsıtıp, şañırağın şayqalttı. Köp wzamay osı küni Qazaq memlekettiligi jalpaq älemge jariya boldı.

"Ättegen-ay"-ımız –  wlt ruhınıñ dür silkinip, wlt sanasın tünekten silkip oyatqan, täuelsizdik  tañına jetelegen osı künge  bostan, egemen şağımızda  qara daq  salıp alğanımız. 2011 jılı Jañaözende bilik öz halqına oq atıp, tarihi künniñ qasietin manswqtadı. Onda da öz haqısın swrağan qazaq jastarı mert boldı. Saldarınan täuelsizdik tañımızben qatar qwrbandarımızdı da eske alatın kün bolıp qaldı.

Ataulı künge oray barşa qazaqstandıqtardı merekelerimen qwttıqtay otırıp, 1986 jılğı Jeltoqsan qwrbandarı men 2011 jılğı Jañaözen-Şetpe qwrbandarınıñ ruhına qayırlı dwğa tileymiz!

Täuelsizdigimiz bayandı, elimiz aman, jwrtımız tınış, el irgesi bütin bolsın!

"The Qazaq Times"