Qamalğan belsendiler: Jañaözende Täuelsizdik küni tağzım etuge şaqırğandar «jazalanadı»

Düysenbi, 14 jeltoqsanda tañerteñ Jañaözen qalası äkimdiginiñ aldına on şaqtı adam jinaldı. Olar jeksenbi qamalğan belsendiler turalı aqparat berudi talap etip, 16 jeltoqsanda Jañaözen qwrbandarın eske alu üşin ortalıq alañğa jinalıp, qwran bağıştaytının eskertti.

Demalıs küni, jeltoqsannıñ 13-i Jañaözenniñ eki belsendisi Mwratbay Jwmağaliev pen Nwrjan Ärenovtiñ 7 künge qamalğanı turalı aqparat tarağan. Bügin äkimdik aldına jinalğan adamdar «olardı ne üşin qamadı, bilik tüsindirsin!» dep talap etti.

Äkimdikten Jañaözen qalası äkiminiñ orınbasarı Amanğali Nwrdäuletov jäne qala prokurorı Ermek Elubaev şıqtı. Olar «eki belsendiniñ halıqtı mitingige şaqırıp, zañğa qayşı äreket jasağanı» anıqtalğannan keyin Äkimşilik kodekstiñ 488-bap 7-tarmağı boyınşa is qozğalğanın ayttı. İle-şala sot olardıñ ärqaysısın 7 täulikke qamağan. Olardıñ aytuınşa, Jañaözendegi izolyatorlarda orın bolmağandıqtan Jwmağaliev – Aqtau qalasına, Ärenov Tüpqarağan audanınıñ izolyatorına qamalğan. Jergilikti halıq mwnımen kelispeydi.

«Äruaqtarımızğa qwran bağıştağımız keledi. Nege ekeni Almatı men astanada jeltoqsanşılarğa rwqsat berip otır, Jañaözende basqaşa» deydi belsendiniñ biri.

Oqiğa ornınan habar taratqan Adam qwqıqtarı men zañdılıqtı saqtau jönindegi qazaqstan halıqaralıq byurosınıñ Atırau oblıstıq filialınıñ törayımı Äsel Nwrğazieva redakciyağa öñirdegi üşinşi belsendiniñ wstalğanın habarladı.

– Bizge kezinde Jañaözen oqiğasında jaralanğan, qazirgi Dempartiyanıñ Mañğıstaudağı ökili Nwrlıbek Nwrğalievtiñ qamauğa alınğanı jaylı habar keldi. Jinalğandardıñ birinşi talabı – belsendilerdiñ qamalu sebebin swrau, ekinşisi – täuelsizdik qwrbandarın eske alu, qwran bağıştau, gül şoqtarın qoyuğa jartı sağatqa rwqsat beru. Azamattar ekinşi talap boyınşa beybit basqosuğa arız jazıp tapsırdı, – deydi qwqıq qorğauşı Nwrğazieva.

Sonday-aq, ol Jañaözennen özge aymaqtarda Atırauda jıl sayın eske alu is-şarasın ötkizuge kedergi joğın aytadı.

Jinalğandar äkimdik pen prokuratura ökilderin 16 jeltoqsanda alañğa kelip, Jañaözen oqiğasınıñ qwrbandarın eske alıp, qwran bağıştamaq nietimen qwlağdar etti.

16 jeltoqsan — Qazaqstan täuelsizdigi küni. Memlekettik arnaulı data bolıp belgilengen kündi qazaqstandıqtar jarmaq küyde ötkizedi. Qaralı kün retinde aza twtsa, bir jağı merekelik köñil-küyde atap ötiledi. 1986 jılğı Mäskeu pärmenimen basşılıqqa kelgen Gennadiy Kolbinge qarsı qazaq jastarınıñ bas köterisi jappay qudalaumen jäne 2011 jılğı birneşe ayğa sozılğan eñbek dauınıñ soñı policiyanıñ mwnayşılarğa oq atuımen ayaqtalğan. Biliktiñ resmi mälimetinşe, «Jañaözen oqiğası» kezinde 17 adam köz jwmğan. Al qwqıq qorğauşılar egemen twsta qara tañbamen qalğan qwpiyası qalıñ oqiğadan zardap şegip, qaytıs bolğandar äldeqayda köp dep esepteydi.

"The Qazaq Times"