Koronavirustan qaytıs bolğandardı jerleuge arnalğan zirat. Qaraoy auılınıñ mañı, Almatı oblısı, 29 mamır 2020 jıl. Foto: Manas Qayırtaywlı / Azattıq radiosı

Sanitariyalıq-epidemiologiyalıq baqılau komiteti QT-nıñ resmi swrau hatına bergen jauabında koronavirustıñ janama äserinen qaytıs bolğan adamdardıñ sanı 764-ke jetkenin habarladı.

13 naurızdan beri COVID-19 infekciyasın jwqtırğandar qatarı 143 mıñğa, 1 tamızdan bergi koronavirus pnevmoniyası 44 mıñğa juıqtağan. DDSW mälimetinşe, Qazaqstanda auırğandardıñ sanı 185,5 mıñğa, al Wlttıq statistikada 187 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardıñ 3382-si (KVI+ / U07.1 – 2152, KVI- / U07.2 – 466, ilespe aurulardan – 764) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 764 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısına juığı sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazan ayınıñ  ortasında sol kezdegi Densaulıq saqtau ministrliginiñ resmi ökili qızmetinde bolğan «erikti» Bağdat Qojahmetov QT redakciyasınıñ qoyğan swrağına jalpı esepke kirmeytin  koronavirustıñ janama äserinen qaytıs bolğandardıñ sanı 672-ge jetkenin mälimdegen. Keyinnen qaraşanıñ basında densaulıq saqtau vice-ministri Ajar Ğiniyatqızı redakciyanıñ talap-swrauımen 709-ğa öskenin aytqan. Vedomstvo bwl indikatorğa tiesili derekti twraqtı türde emes, tilşilerdiñ swrauımen ğana jariyalaydı.

Aqparattıñ jañarmağalı bir aydan astam uaqıt ötti. Redakciya jurnalisi vice-ministr Ğiniyatqızınıñ uädesin (qaraşa ayınıñ basında Ğiniyatqızı atalğan aqparattı ayına bir ret jariyalaudı jolğa qoyuğa uäde bergen – QT) eske salıp, qayta swrau joldadı. Der kezinde jauap bolmağasın ötken särsenbide bas sanitar-däriger Erlan Qiyasovqa brifing barısında qoyıldı. Eşbir swrağımızğa jauap bere almağan ol mälimetti jazbaşa nwsqada joldauğa uäde etken. Baspasöz jiınınan keyin twşımdı aqparat berilmedi. Aqırı orındausız qalğan vice-ministrdiñ uädesin, prezidenttiñ tapsırmasın redakciya tabandı türde talap etip jürip, Sanitariyalıq-epidemiologiyalıq baqılau komitetiniñ Jwrtşılıqpen baylanıs basqarmasınan jauap aldı.

«Densaulıq saqtau ministirligi «Respublikalıq elektrondıq densaulıq saqtau ortalığı» ŞJQ RMK derekterine säykes 2020 jıldıñ 1 naurızı men 30 qaraşasınıñ aralığında koronavirus infekciyası ilespe diagnozı bolğan 764 ölim jağdayı tirkeldi», – delingen resmi jauap hatta.

  • Tınıs alu jüyesiniñ auruları – 360 (47%);
  • Qanaynalım jüyesiniñ auruları – 251 (33%);
  • Endokrindik jüyeniñ auruları, tamaqtanu jäne almasu bwzıluı – 37 (4,8%);
  • Jaña öskinder – 35 (4,6%);
  • Basqa jağdaylar – 81 (10,6%).

«Mausım-şilde qırğınında» 500-ge juıq, tamız ben qırküyek aylarında 146, al küzgi tolqın ekpindey bastağan qazan jäne qaraşa aylarında 115 adam ömirden ötken. Eñ köp ölim jağdayı ŞQO, Qarağandı, Qızılorda, Pavlodar oblıstarında tirkelgen.

"The Qazaq Times"