كوروناۆيرۋستان قايتىس بولعانداردى جەرلەۋگە ارنالعان زيرات. قاراوي اۋىلىنىڭ ماڭى، الماتى وبلىسى، 29 مامىر 2020 جىل. فوتو: ماناس قايىرتايۇلى / ازاتتىق راديوسى

سانيتاريالىق-ەپيدەميولوگيالىق باقىلاۋ كوميتەتى QT-نىڭ رەسمي سۇراۋ حاتىنا بەرگەن جاۋابىندا كوروناۆيرۋستىڭ جاناما اسەرىنەن قايتىس بولعان ادامداردىڭ سانى 764-كە جەتكەنىن حابارلادى.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 143 مىڭعا، 1 تامىزدان بەرگى كوروناۆيرۋس پنەۆمونياسى 44 مىڭعا جۋىقتاعان. ددسۇ مالىمەتىنشە، قازاقستاندا اۋىرعانداردىڭ سانى 185,5 مىڭعا، ال ۇلتتىق ستاتيستيكادا 187 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردىڭ 3382-ءسى (كۆي+ / U07.1 – 2152, كۆي- / U07.2 – 466, ىلەسپە اۋرۋلاردان – 764) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 764 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنا جۋىعى سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازان ايىنىڭ  ورتاسىندا سول كەزدەگى دەنساۋلىق ساقتاۋ مينيسترلىگىنىڭ رەسمي وكىلى قىزمەتىندە بولعان «ەرىكتى» باعدات قوجاحمەتوۆ QT رەداكتسياسىنىڭ قويعان سۇراعىنا جالپى ەسەپكە كىرمەيتىن  كوروناۆيرۋستىڭ جاناما اسەرىنەن قايتىس بولعانداردىڭ سانى 672-گە جەتكەنىن مالىمدەگەن. كەيىننەن قاراشانىڭ باسىندا دەنساۋلىق ساقتاۋ ۆيتسە-ءمينيسترى اجار عينياتقىزى رەداكتسيانىڭ تالاپ-سۇراۋىمەن 709-عا وسكەنىن ايتقان. ۆەدومستۆو بۇل ينديكاتورعا تيەسىلى دەرەكتى تۇراقتى تۇردە ەمەس، تىلشىلەردىڭ سۇراۋىمەن عانا جاريالايدى.

اقپاراتتىڭ جاڭارماعالى ءبىر ايدان استام ۋاقىت ءوتتى. رەداكتسيا ءجۋرناليسى ۆيتسە-مينيستر عينياتقىزىنىڭ ۋادەسىن (قاراشا ايىنىڭ باسىندا عينياتقىزى اتالعان اقپاراتتى ايىنا ءبىر رەت جاريالاۋدى جولعا قويۋعا ۋادە بەرگەن – QT) ەسكە سالىپ، قايتا سۇراۋ جولدادى. دەر كەزىندە جاۋاپ بولماعاسىن وتكەن سارسەنبىدە باس سانيتار-دارىگەر ەرلان قياسوۆقا بريفينگ بارىسىندا قويىلدى. ەشبىر سۇراعىمىزعا جاۋاپ بەرە الماعان ول مالىمەتتى جازباشا نۇسقادا جولداۋعا ۋادە ەتكەن. ءباسپاسوز جيىنىنان كەيىن تۇششىمدى اقپارات بەرىلمەدى. اقىرى ورىنداۋسىز قالعان ۆيتسە-ءمينيستردىڭ ۋادەسىن، پرەزيدەنتتىڭ تاپسىرماسىن رەداكتسيا تاباندى تۇردە تالاپ ەتىپ ءجۇرىپ، سانيتاريالىق-ەپيدەميولوگيالىق باقىلاۋ كوميتەتىنىڭ جۇرتشىلىقپەن بايلانىس باسقارماسىنان جاۋاپ الدى.

«دەنساۋلىق ساقتاۋ مينيستىرلىگى «رەسپۋبليكالىق ەلەكتروندىق دەنساۋلىق ساقتاۋ ورتالىعى» شجق رمك دەرەكتەرىنە سايكەس 2020 جىلدىڭ 1 ناۋرىزى مەن 30 قاراشاسىنىڭ ارالىعىندا كوروناۆيرۋس ينفەكتسياسى ىلەسپە دياگنوزى بولعان 764 ءولىم جاعدايى تىركەلدى»، – دەلىنگەن رەسمي جاۋاپ حاتتا.

  • تىنىس الۋ جۇيەسىنىڭ اۋرۋلارى – 360 (47%);
  • قاناينالىم جۇيەسىنىڭ اۋرۋلارى – 251 (33%);
  • ەندوكريندىك جۇيەنىڭ اۋرۋلارى، تاماقتانۋ جانە الماسۋ بۇزىلۋى – 37 (4,8%);
  • جاڭا وسكىندەر – 35 (4,6%);
  • باسقا جاعدايلار – 81 (10,6%).

«ماۋسىم-شىلدە قىرعىنىندا» 500-گە جۋىق، تامىز بەن قىركۇيەك ايلارىندا 146, ال كۇزگى تولقىن ەكپىندەي باستاعان قازان جانە قاراشا ايلارىندا 115 ادام ومىردەن وتكەن. ەڭ كوپ ءولىم جاعدايى شقو، قاراعاندى، قىزىلوردا، پاۆلودار وبلىستارىندا تىركەلگەن.

"The Qazaq Times"