قامالعان بەلسەندىلەر: جاڭاوزەندە تاۋەلسىزدىك كۇنى تاعزىم ەتۋگە شاقىرعاندار «جازالانادى»

دۇيسەنبى، 14 جەلتوقساندا تاڭەرتەڭ جاڭاوزەن قالاسى اكىمدىگىنىڭ الدىنا ون شاقتى ادام جينالدى. ولار جەكسەنبى قامالعان بەلسەندىلەر تۋرالى اقپارات بەرۋدى تالاپ ەتىپ، 16 جەلتوقساندا جاڭاوزەن قۇرباندارىن ەسكە الۋ ءۇشىن ورتالىق الاڭعا جينالىپ، قۇران باعىشتايتىنىن ەسكەرتتى.

دەمالىس كۇنى، جەلتوقساننىڭ 13-ءى جاڭاوزەننىڭ ەكى بەلسەندىسى مۇراتباي جۇماعاليەۆ پەن نۇرجان ارەنوۆتىڭ 7 كۇنگە قامالعانى تۋرالى اقپارات تاراعان. بۇگىن اكىمدىك الدىنا جينالعان ادامدار «ولاردى نە ءۇشىن قامادى، بيلىك ءتۇسىندىرسىن!» دەپ تالاپ ەتتى.

اكىمدىكتەن جاڭاوزەن قالاسى اكىمىنىڭ ورىنباسارى امانعالي نۇرداۋلەتوۆ جانە قالا پروكۋرورى ەرمەك ەلۋباەۆ شىقتى. ولار «ەكى بەلسەندىنىڭ حالىقتى ميتينگىگە شاقىرىپ، زاڭعا قايشى ارەكەت جاساعانى» انىقتالعاننان كەيىن اكىمشىلىك كودەكستىڭ 488-باپ 7-تارماعى بويىنشا ءىس قوزعالعانىن ايتتى. ىلە-شالا سوت ولاردىڭ ارقايسىسىن 7 تاۋلىككە قاماعان. ولاردىڭ ايتۋىنشا، جاڭاوزەندەگى يزولياتورلاردا ورىن بولماعاندىقتان جۇماعاليەۆ – اقتاۋ قالاسىنا، ارەنوۆ تۇپقاراعان اۋدانىنىڭ يزولياتورىنا قامالعان. جەرگىلىكتى حالىق مۇنىمەن كەلىسپەيدى.

«ارۋاقتارىمىزعا قۇران باعىشتاعىمىز كەلەدى. نەگە ەكەنى الماتى مەن استانادا جەلتوقسانشىلارعا رۇقسات بەرىپ وتىر، جاڭاوزەندە باسقاشا» دەيدى بەلسەندىنىڭ ءبىرى.

وقيعا ورنىنان حابار تاراتقان ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىنىڭ اتىراۋ وبلىستىق فيليالىنىڭ ءتورايىمى اسەل نۇرعازيەۆا رەداكتسياعا وڭىردەگى ءۇشىنشى بەلسەندىنىڭ ۇستالعانىن حابارلادى.

– بىزگە كەزىندە جاڭاوزەن وقيعاسىندا جارالانعان، قازىرگى دەمپارتيانىڭ ماڭعىستاۋداعى وكىلى نۇرلىبەك نۇرعاليەۆتىڭ قاماۋعا الىنعانى جايلى حابار كەلدى. جينالعانداردىڭ ءبىرىنشى تالابى – بەلسەندىلەردىڭ قامالۋ سەبەبىن سۇراۋ، ەكىنشىسى – تاۋەلسىزدىك قۇرباندارىن ەسكە الۋ، قۇران باعىشتاۋ، گۇل شوقتارىن قويۋعا جارتى ساعاتقا رۇقسات بەرۋ. ازاماتتار ەكىنشى تالاپ بويىنشا بەيبىت باسقوسۋعا ارىز جازىپ تاپسىردى، – دەيدى قۇقىق قورعاۋشى نۇرعازيەۆا.

سونداي-اق، ول جاڭاوزەننەن وزگە ايماقتاردا اتىراۋدا جىل سايىن ەسكە الۋ ءىس-شاراسىن وتكىزۋگە كەدەرگى جوعىن ايتادى.

جينالعاندار اكىمدىك پەن پروكۋراتۋرا وكىلدەرىن 16 جەلتوقساندا الاڭعا كەلىپ، جاڭاوزەن وقيعاسىنىڭ قۇرباندارىن ەسكە الىپ، قۇران باعىشتاماق نيەتىمەن قۇلاعدار ەتتى.

16 جەلتوقسان — قازاقستان تاۋەلسىزدىگى كۇنى. مەملەكەتتىك ارناۋلى داتا بولىپ بەلگىلەنگەن كۇندى قازاقستاندىقتار جارماق كۇيدە وتكىزەدى. قارالى كۇن رەتىندە ازا تۇتسا، ءبىر جاعى مەرەكەلىك كوڭىل-كۇيدە اتاپ وتىلەدى. 1986 جىلعى ماسكەۋ پارمەنىمەن باسشىلىققا كەلگەن گەننادي كولبينگە قارسى قازاق جاستارىنىڭ باس كوتەرىسى جاپپاي قۋدالاۋمەن جانە 2011 جىلعى بىرنەشە ايعا سوزىلعان ەڭبەك داۋىنىڭ سوڭى پوليتسيانىڭ مۇنايشىلارعا وق اتۋىمەن اياقتالعان. بيلىكتىڭ رەسمي مالىمەتىنشە، «جاڭاوزەن وقيعاسى» كەزىندە 17 ادام كوز جۇمعان. ال قۇقىق قورعاۋشىلار ەگەمەن تۇستا قارا تاڭبامەن قالعان قۇپياسى قالىڭ وقيعادان زارداپ شەگىپ، قايتىس بولعاندار الدەقايدا كوپ دەپ ەسەپتەيدى.

"The Qazaq Times"