DSM medicinalıq jäne farmacevtikalıq baqılau komiteti törağasınıñ orınbasarı  Nwrlıbek Asılbekov särsenbi küni OKQ-da ötken brifingte şeteldik vakcina öndirisin Qarağandı farmacevtikalıq keşeniniñ bazasında iske asırılatının habarladı.

Ümitker tört birdey kompaniyanıñ («Himfarm» AQ, «Nobel'», «Evrohim» jäne Qarağandı farmacevtikalıq keşeni) arasınan qarağandılıq mekeme öndriske meyilinşe dayın bolğandıqtan tañdalıptı.

«Joba qoldanılıstağı öndiris ornında jüzege asırıladı. Sondıqtan jeke zauıt nemese ceh saludıñ qajeti joq. Memleket tarapınan qarjı qarastırılmaydı», – dep sendirdi Asılbekov.

Sonday-aq, ol vakcina öndirisine qazaqstandıq kompaniyamen qatar reseylik qatısatının aytadı.

«Qazir seriktes tarap – Reseylik tikeley investiciyalar qorımen kelissözder jürip jatır. Kelisim  negizinde öndiristi jolğa qoyu, mamandardı tartu mäseleleri qamtılğan qwjatqa qol qoyıladı", – dep naqtıladı ministrlik ökili.

Kontragentter servisindegi derekterge qarağanda, 150-den astam qızmetkeri bar «Qarağandı Farmacevtikalıq keşeni» JŞS 15 jıldan beri farmacevtika preparattarın öndirumen aynalısadı. Kompaniya keyingi üş jılda memleketke 888 mln teñge salıq tölegen. Tabıstı kompaniyanıñ jetekşisi Sergey Baron Almatı qalasında tağı bir «Medinvestgrupp Kazahstan» JŞS-ine ielik etedi.

Eki el basşıları Toqaev pen Putinniñ ortaq kelisimşartına säykes, 22 jeltoqsanınan bastap Qazaqstanda reseylik «Sputnik V» vakcinasın öndiru qolğa alınbaq.

DDSW-nıñ dereginşe, älemde koronavirusqa qarsı 212 vakcina-kandidat zertteu jürigizip jatır. Onıñ tek 48-i klinikalıq sınaq satısında. Bwğan Bilim jäne ğılım ministrliginiñ Bioqauipsizdik mäseleleri jönindegi ĞZI äzirlep jatqan qazaqstandıq QazCovid-in ekpesi de engen.

Jambıl oblısında salınıp jatqan quatı jılına 60 mln dozağa deyin ekpe şığaru josparlanğan öndiris ornınıñ byudjeti 7 mlrd teñge. Bilim ministrligi jariyalağan tenderdi «Ka-Stroy LTD» JŞS wtıp alğan. Jospar boyınşa zauıt endigi jıldıñ alğaşqı toqsanında jwmısın bastauı tiis.

Qaraşanıñ ortasında densaulıq saqtau ministri Aleksey Coy onlayn-brifingte äleumettik osal topqa jatatın 3,6 mln twrğındı vakcinalauğa Ükimet qorınan 47 mlrd teñge qarastırılğanın mälimdegen.

"The Qazaq Times"