2021 jıldan bastap Qıtaydıñ şığısında äskeri qimıldar jiiley tüspek. Sebebi, Qıtaydıñ äskeri qaterinen alañdağan Batıs elderi, sonıñ işinde NATO qwramındağı Britaniya, Franciya qatarlı elder Tınıq mwhitınıñ batıs jağalauında äskeri belsendilik tanıtpaq.

Ötken aptada NATO Qıtaydı özine töngen qauip retinde atağannan beri, wyım müşeleri Qıtaydıñ artıp kele jatqan äskeri qaterine qarsı şarların qabılday bastadı. Ärine, Qıtaydıñ şığısındağı äskeri şaralarğa öñirden Japoniya men Australiya, olarğa qosa AQŞ ta qoldau körsetedi.

Birer kün bwrın Sankei Shimbun attı japondıq basılımı Japoniya, Franciya jäne AQŞ arasındağı alğaş ret birlesken äskeri jattığu ötkiziletinin jazdı. Basılımnıñ mälimetinşe, äskeri jattığu 2021 jıldıñ mamır ayına josparlanğan eken.  Sankei Shimbun basılımı bwl jattığudıñ maqsatı Qıtaydıñ äskeri ıqpalına qarsı twru ekenin aşıq jazğan.

Al, keşe Japoniyanıñ Kyodo News agenttigi Britannıñ HMS Queen Elizabeth R08 attı wşaq tasımaldauşı alıp kemesi öziniñ kemeler qosınımen birge jaña jıldan keyin Tınıq mwhittıñ batıs jağalauına ornalasatının habarladı.  Britaniyanıñ quattı teñiz qosındarınıñ biri sanalatın bwl keme qosını Aziyanıñ şığıs aymağında Japoniya men AQŞ-tıñ teñiz küşterimen ıntımaqtastıq ornatpaq.

Britannıñ HMS Queen Elizabeth R08 attı wşaq tasımaldauşı alıp kemesi

Qıtaydıñ Şığıs Qıtay teñizinde Japoniyamen territoriyalıq talası, Oñtüstik Qıtay teñizinde osı teñizge şektesetin barlıq eldermen talastı dauları bar. Soñğı jıldarı Qıtay öziniñ qarqındı damığan ekonomikalıq, qorğanıs mümkindikterine süyenip, teñizindegi egemendik qwqıq mäselesinde özge körşilesterine ese bermey kele jatqanı belgili. Batıs elderi Qıtaydıñ bwl äreketterin bağalay otırıp, bolaşaqta özderiniñ jäne twtas älemdik twraqtılıqqa jaña qaterdiñ ösip şıqqanın bildi.

Batıs elderiniñ Qıtay şığısına quattı teñiz qosındarın attandırıp jatuı bolaşaqtağı köptegen mäselelerden habar bergendey. Bwl eñ äueli Tınıq mwhit, Qıtayğa jaqın teñiz jağalaularında qaqtığıs qateriniñ arta tüskenin bildiredi. Bwğan qosa bir kezderi armiya jasaqtauına şekteu qoyılğna Japoniyanıñ osı orayda küş alıp, quattı qorğanıs küşine ie boluğa mümkindik alğanın bildiredi. Ağılşın memleketi qalayda eski däuirden teñiz üsti derjavası sanalıp keledi. Japoniyanıñ teñiz derjavasımen odaqtasuğa mümkindik aluı älemde bolmasa da Tınıq mwhitında jaña erejeler ornatıluı mümkin degendi körsetkendey.

“The Qazaq Times”