2021 جىلدان باستاپ قىتايدىڭ شىعىسىندا اسكەري قيمىلدار جيىلەي تۇسپەك. سەبەبى، قىتايدىڭ اسكەري قاتەرىنەن الاڭداعان باتىس ەلدەرى، سونىڭ ىشىندە ناتو قۇرامىنداعى بريتانيا، فرانتسيا قاتارلى ەلدەر تىنىق مۇحيتىنىڭ باتىس جاعالاۋىندا اسكەري بەلسەندىلىك تانىتپاق.

وتكەن اپتادا ناتو قىتايدى وزىنە تونگەن قاۋىپ رەتىندە اتاعاننان بەرى، ۇيىم مۇشەلەرى قىتايدىڭ ارتىپ كەلە جاتقان اسكەري قاتەرىنە قارسى شارلارىن قابىلداي باستادى. ارينە، قىتايدىڭ شىعىسىنداعى اسكەري شارالارعا وڭىردەن جاپونيا مەن اۋستراليا، ولارعا قوسا اقش تا قولداۋ كورسەتەدى.

بىرەر كۇن بۇرىن Sankei Shimbun اتتى جاپوندىق باسىلىمى جاپونيا، فرانتسيا جانە اقش اراسىنداعى العاش رەت بىرلەسكەن اسكەري جاتتىعۋ وتكىزىلەتىنىن جازدى. باسىلىمنىڭ مالىمەتىنشە، اسكەري جاتتىعۋ 2021 جىلدىڭ مامىر ايىنا جوسپارلانعان ەكەن.  Sankei Shimbun باسىلىمى بۇل جاتتىعۋدىڭ ماقساتى قىتايدىڭ اسكەري ىقپالىنا قارسى تۇرۋ ەكەنىن اشىق جازعان.

ال، كەشە جاپونيانىڭ Kyodo News اگەنتتىگى بريتاننىڭ HMS Queen Elizabeth R08 اتتى ۇشاق تاسىمالداۋشى الىپ كەمەسى ءوزىنىڭ كەمەلەر قوسىنىمەن بىرگە جاڭا جىلدان كەيىن تىنىق مۇحيتتىڭ باتىس جاعالاۋىنا ورنالاساتىنىن حابارلادى.  بريتانيانىڭ قۋاتتى تەڭىز قوسىندارىنىڭ ءبىرى سانالاتىن بۇل كەمە قوسىنى ازيانىڭ شىعىس ايماعىندا جاپونيا مەن اقش-تىڭ تەڭىز كۇشتەرىمەن ىنتىماقتاستىق ورناتپاق.

بريتاننىڭ HMS Queen Elizabeth R08 اتتى ۇشاق تاسىمالداۋشى الىپ كەمەسى

قىتايدىڭ شىعىس قىتاي تەڭىزىندە جاپونيامەن تەرريتوريالىق تالاسى، وڭتۇستىك قىتاي تەڭىزىندە وسى تەڭىزگە شەكتەسەتىن بارلىق ەلدەرمەن تالاستى داۋلارى بار. سوڭعى جىلدارى قىتاي ءوزىنىڭ قارقىندى دامىعان ەكونوميكالىق، قورعانىس مۇمكىندىكتەرىنە سۇيەنىپ، تەڭىزىندەگى ەگەمەندىك قۇقىق ماسەلەسىندە وزگە كورشىلەستەرىنە ەسە بەرمەي كەلە جاتقانى بەلگىلى. باتىس ەلدەرى قىتايدىڭ بۇل ارەكەتتەرىن باعالاي وتىرىپ، بولاشاقتا وزدەرىنىڭ جانە تۇتاس الەمدىك تۇراقتىلىققا جاڭا قاتەردىڭ ءوسىپ شىققانىن ءبىلدى.

باتىس ەلدەرىنىڭ قىتاي شىعىسىنا قۋاتتى تەڭىز قوسىندارىن اتتاندىرىپ جاتۋى بولاشاقتاعى كوپتەگەن ماسەلەلەردەن حابار بەرگەندەي. بۇل ەڭ اۋەلى تىنىق مۇحيت، قىتايعا جاقىن تەڭىز جاعالاۋلارىندا قاقتىعىس قاتەرىنىڭ ارتا تۇسكەنىن بىلدىرەدى. بۇعان قوسا ءبىر كەزدەرى ارميا جاساقتاۋىنا شەكتەۋ قويىلعنا جاپونيانىڭ وسى ورايدا كۇش الىپ، قۋاتتى قورعانىس كۇشىنە يە بولۋعا مۇمكىندىك العانىن بىلدىرەدى. اعىلشىن مەملەكەتى قالايدا ەسكى داۋىردەن تەڭىز ءۇستى دەرجاۆاسى سانالىپ كەلەدى. جاپونيانىڭ تەڭىز دەرجاۆاسىمەن وداقتاسۋعا مۇمكىندىك الۋى الەمدە بولماسا دا تىنىق مۇحيتىندا جاڭا ەرەجەلەر ورناتىلۋى مۇمكىن دەگەندى كورسەتكەندەي.

“The Qazaq Times”