Körneki suret. Foto: gettyimages.com

Prezident Toqaevtıñ qabıldauına kirgen ükimet basşısı Asqar Mamin qazaqstandıq vakcinanıñ öndirisi turalı ayttı.

Aqorda taratqan aqparat boyınşa, «mausım-şilde qırğınına» jol berip alğan ükimet qwramınıñ jetekşisi Mamin 29 qaraşa küni klinikalıq sınaqtardıñ eki kezeñi de ayaqtalğanı turalı jetkizgen. Prem'erdiñ sözinşe, vakcinanıñ keri äseri anıqtalmağan äri tiimdiligi bayqalğan. Üş aptadan keyin, anığı 25 jeltoqsannan bastap klinikalıq sınaqtıñ 3-şi kezeñinde barısında 3 mıñ eriktige ekpe salu josparlanğan.

Resmi mälimetke qarağanda, sınaqtar tolığımen 2021 jılğı naurız ayınıñ soñına qaray ayaqtaladı. Kezdesude Mamin Toqaevqa osı jıldıñ ayağına deyin «otandıq vakcinanıñ» alğaşqı partiyası retinde 2 mln dozası şığarılatının habarladı.

Bwdan özge, Toqaev pen Putinniñ ortaq kelisimşartına säykes, 22 jeltoqsanınan bastap Qazaqstanda reseylik «Sputnik V» vakcinasın öndiru qolğa alınbaq.

«2021 jıldan bastap twrğındarğa erikti türde jappay vakcina egu josparlanıp otır. Alğaşqı kezeñde twrğındardıñ aurudı jwqtıru qaupi joğarı tobı, yağni därigerler, pedagogtar, küştik qwrılımdardıñ qızmetkerleri qamtıladı.  Qasım-Jomart Toqaev Asqar Maminge otandıq vakcina öndirisine qatıstı berilgen tapsırmanı jedel orındağanı üşin alğıs bildirip, däriniñ tiimdiligine basa män berudi jäne twrğındarğa qol jetimdi boluın baqılauda wstaudı tapsırdı», – delingen Aqorda habarlamasında.

DDSW-nıñ dereginşe, älemde koronavirusqa qarsı 212 vakcina-kandidat zertteu jürigizip jatır. Onıñ tek 48-i klinikalıq sınaq satısında. Bwğan Bilim jäne ğılım ministrliginiñ Bioqauipsizdik mäseleleri jönindegi ĞZI äzirlep jatqan qazaqstandıq QazCovid-in ekpesi de engen.

Jambıl oblısında salınatın vakcina öndiruge arnalğan zauıttıñ qwrılısına Ükimet köktemde öñir äkimdigine qordan 685,9 mln teñge bölgen.

12 mausım küni zauıt qwrılısı bastalğanı habarlanğan. Quatı jılına 60 mln dozağa deyin ekpe şığaratın öndiris ornınıñ byudjeti 7 mlrd teñge. Bilim ministrligi jariyalağan tenderdi «Ka-Stroy LTD» JŞS wtıp alğan. Jospar boyınşa zauıt endigi jıldıñ alğaşqı toqsanında jwmısın bastauı tiis.

Qaraşanıñ ortasında densaulıq saqtau ministri Aleksey Coy onlayn-brifingte äleumettik osal topqa jatatın 3,6 mln twrğındı vakcinalauğa Ükimet qorınan 47 mlrd teñge qarastırılğanın habarlağan. Tipti ol 14 qazandağı mälimdemesinde «atalğan (qazaqstandıq – QT) ekpe qımbatqa tüspeydi, özindik qwnı 2-3 dollar töñireginde boladı» degen. Bir adam QazCovid-in ekpesiniñ eki dozasın aluı kerek.

"The Qazaq Times"