پرەزيدەنت توقاەۆتىڭ قابىلداۋىنا كىرگەن ۇكىمەت باسشىسى اسقار مامين قازاقستاندىق ۆاكتسينانىڭ ءوندىرىسى تۋرالى ايتتى.

اقوردا تاراتقان اقپارات بويىنشا، «ماۋسىم-شىلدە قىرعىنىنا» جول بەرىپ العان ۇكىمەت قۇرامىنىڭ جەتەكشىسى مامين 29 قاراشا كۇنى كلينيكالىق سىناقتاردىڭ ەكى كەزەڭى دە اياقتالعانى تۋرالى جەتكىزگەن. پرەمەردىڭ سوزىنشە، ۆاكتسينانىڭ كەرى اسەرى انىقتالماعان ءارى تيىمدىلىگى بايقالعان. ءۇش اپتادان كەيىن، انىعى 25 جەلتوقساننان باستاپ كلينيكالىق سىناقتىڭ 3-ءشى كەزەڭىندە بارىسىندا 3 مىڭ ەرىكتىگە ەكپە سالۋ جوسپارلانعان.

رەسمي مالىمەتكە قاراعاندا، سىناقتار تولىعىمەن 2021 جىلعى ناۋرىز ايىنىڭ سوڭىنا قاراي اياقتالادى. كەزدەسۋدە مامين توقاەۆقا وسى جىلدىڭ اياعىنا دەيىن «وتاندىق ۆاكتسينانىڭ» العاشقى پارتياسى رەتىندە 2 ملن دوزاسى شىعارىلاتىنىن حابارلادى.

بۇدان وزگە، توقاەۆ پەن ءپۋتيننىڭ ورتاق كەلىسىمشارتىنا سايكەس، 22 جەلتوقسانىنان باستاپ قازاقستاندا رەسەيلىك «سپۋتنيك V» ۆاكتسيناسىن ءوندىرۋ قولعا الىنباق.

«2021 جىلدان باستاپ تۇرعىندارعا ەرىكتى تۇردە جاپپاي ۆاكتسينا ەگۋ جوسپارلانىپ وتىر. العاشقى كەزەڭدە تۇرعىنداردىڭ اۋرۋدى جۇقتىرۋ قاۋپى جوعارى توبى، ياعني دارىگەرلەر، پەداگوگتار، كۇشتىك قۇرىلىمداردىڭ قىزمەتكەرلەرى قامتىلادى.  قاسىم-جومارت توقاەۆ اسقار مامينگە وتاندىق ۆاكتسينا وندىرىسىنە قاتىستى بەرىلگەن تاپسىرمانى جەدەل ورىنداعانى ءۇشىن العىس ءبىلدىرىپ، ءدارىنىڭ تيىمدىلىگىنە باسا ءمان بەرۋدى جانە تۇرعىندارعا قول جەتىمدى بولۋىن باقىلاۋدا ۇستاۋدى تاپسىردى»، – دەلىنگەن اقوردا حابارلاماسىندا.

ددسۇ-نىڭ دەرەگىنشە، الەمدە كوروناۆيرۋسقا قارسى 212 ۆاكتسينا-كانديدات زەرتتەۋ جۇرىگىزىپ جاتىر. ونىڭ تەك 48-ءى كلينيكالىق سىناق ساتىسىندا. بۇعان ءبىلىم جانە عىلىم مينيسترلىگىنىڭ بيوقاۋىپسىزدىك ماسەلەلەرى جونىندەگى عزي ازىرلەپ جاتقان قازاقستاندىق QazCovid-in ەكپەسى دە ەنگەن.

جامبىل وبلىسىندا سالىناتىن ۆاكتسينا وندىرۋگە ارنالعان زاۋىتتىڭ قۇرىلىسىنا ۇكىمەت كوكتەمدە ءوڭىر اكىمدىگىنە قوردان 685,9 ملن تەڭگە بولگەن.

12 ماۋسىم كۇنى زاۋىت قۇرىلىسى باستالعانى حابارلانعان. قۋاتى جىلىنا 60 ملن دوزاعا دەيىن ەكپە شىعاراتىن ءوندىرىس ورنىنىڭ بيۋدجەتى 7 ملرد تەڭگە. ءبىلىم مينيسترلىگى جاريالاعان تەندەردى «كا-ستروي لتد» جشس ۇتىپ العان. جوسپار بويىنشا زاۋىت ەندىگى جىلدىڭ العاشقى توقسانىندا جۇمىسىن باستاۋى ءتيىس.

قاراشانىڭ ورتاسىندا دەنساۋلىق ساقتاۋ ءمينيسترى الەكسەي تسوي ونلاين-بريفينگتە الەۋمەتتىك وسال توپقا جاتاتىن 3,6 ملن تۇرعىندى ۆاكتسينالاۋعا ۇكىمەت قورىنان 47 ملرد تەڭگە قاراستىرىلعانىن حابارلاعان. ءتىپتى ول 14 قازانداعى مالىمدەمەسىندە «اتالعان (قازاقستاندىق – QT) ەكپە قىمباتقا تۇسپەيدى، وزىندىك قۇنى 2-3 دوللار توڭىرەگىندە بولادى» دەگەن. ءبىر ادام QazCovid-in ەكپەسىنىڭ ەكى دوزاسىن الۋى كەرەك.

"The Qazaq Times"